2 Samuel 22

A kakailai kai David ure ra varvalaun (Kak 18)

Ma ta nam ra bung ba ra Luluai i ga valaun pa David kan ra lima i kana umana ebar, ma kan ra lima i Saul, David i ga vatang ra umana tinata ta go ra kakailai pire ra Luluai, ma i ga biti:

Ra Luluai ia kaugu vat i ta, kaugu pal na bakbakit, ma kaugu tena valaun, nina ba kaugu iat;
Kaugu God, kaugu padikat na vat i ta, ina rivarivan tana;
Kaugu ramravit, ma ra dekdek iau lalaun tana,
Kaugu rivarivan i manga tuluai urama, ma kaugu bakbakit;
Kaugu tena valaun, u valaun iau kan ra dekdek i ra ebar.
Ina kail tadav ra Luluai, nina i topa ia ba da pite pa ia,
Ma da valaun iau kan kaugu lavur ebar.

A umana bobol na minat dia ga tur kikilane iau,
Ma iau ga burut ta ra kaina mangamangana i da ro lovon ta.
A umana vinau na ruarua na tulungen dia ga viviai tagu,
A lavur kun na minat dia ga tadav iau.
Iau ga kail tadav ra Luluai ba iau ga ki na malari,
Ma iau ga tangi tadav kaugu God;
I ga valongore ra nilaigu ta kana pal i gomgom,
Ma kaugu tinangi i ga ruk ta ra talingana.

A rakarakan a gunagunan i ga dadadar ma i ga guria,
A vunapai ra bala na bakut i ga takari
Ma i ga dadadar, tago i ga kankan.
A mi i ga tubang rikai ta kana kankan,
Ma ra iap ta ra ngiene i ga vavaimur;
A umana lakit dia ga ioaio tana.
10 I ga lele ra bakut bula ura ra pia, ma i ga kuba;
A ngala na bingnimuna i tur ta ra vavai ra kauna.
11 I ga ki ta ra ul a angelo, ma i ga pururung;
Maia pa, di ga gire ba i ga ki ta ra ul a bebea i ra vuvu.
12 I ga parau ta ra bobotoi, nam kana bakbakit kikil ia;
A umana korong na bakut, a umana ivarat arama ra maup.
13 A umana lakit dia ga ioaio
Ta ra talapar ta ra luaina matana.

14 Ra Luluai i ga pangpagur bula arama ra bala na bakut,
Ma ra ngala Kakit i tata.
15 I ga tulue kana umana pu, ma i ga korot varbaiane diat;
Maia pa, mangoro na meme, ma i ga ubu vapurpuruan pa diat.
16 A bala na ta i ga vana rikai
Ta ra varpit kai ra Luluai, ma ta ra vuvu na bilauna;
Di ga vaarike bula ra vunapai ra rakarakan a gunagunan.

17 I ga tulue ra limana marama, ma i ga vatur iau;
I ga al vairop iau kan ra do na tava.
18 I ga valangalanga iau kan kaugu dekdek na ebar,
Ma kan diat dia ga milmilikuane iau, tago dia ga manga dekdek tagu.
19 Dia ga tadav iau ta ra bung ba iau ga ki na malari tana,
Ma ra Luluai i ga tukal iau.
20 I ga ben pa iau tar ta ra pakana gunan i maup;
I ga valangalanga iau, tago i ga manga gugu ure iau.

21 Ra Luluai i ga vapuak iau da i ga topa kaugu mangamangana takodo;
I ga balbali piragu da i ga topa ra gomgom na limagu.
22 Tago iau tar mur ra nga kai ra Luluai,
Ma pa iau ga bura kakaina kan kaugu God.
23 Tago kana lavur varkurai dia ga tur ta ra luaina matagu,
Ma pa iau ga vana irai kan kana lavur togotogo.

24 Iau ga ko vurakit bula pirana,
Ma iau ga balaure bat iau kan kaugu lavur kaina mangamangana.
25 Kari ra Luluai i tar vapuak iau varogop ma kaugu mangamangana takodo,
Varogop ma kaugu gomgom ta ra luaina matana.
26 Una ga vaarike kaum varmari pire diat dia varmari,
Una ga ko vurakit tadav diat dia ko vurakit;
27 Una ga gomgom vurakit pire diat dia gomgom,
Ma una ga turtur bat diat dia bilak.
28 Ma una valaun diat a tarai dia malari;
Ia kaka u gire vakilang diat dia malamala ngala, upi una vaikilik pa diat.

29 Ea, Luluai, u kaugu lamp;
Ra Luluai na vakapa kaugu bobotoi.
30 Tago ba dor ma u, ina korot mur ra loko na tarai na vinarubu,
Ma ona amir ma kaugu God ina pil lake ra liplip.

31 Ma ure God, kana nga i ko vurakit;
A tinata kai ra Luluai i dovot;
Ra Luluai a ramravit kadiat par dia nurnur tana.
32 Tago ia God? Ia kaka ra Luluai;
Ma to ia ra vat i ta? Kada God kaka.
33 God kaugu dekdek na pal na bakbakit;
Ma i rap lue nina i ko vurakit ta kana nga.
34 I mal ra kaugu upi na varogop ma ra kau i ra kuabar na me,
Ma i vaki iau ta kaugu kiki liu.
35 I tovo ra limagu ure ra vinarubu,
Upi ra limagu na lele valar pa ra panak na palariam gobol.

36 U tar tul tar ia bula tagu ra ramravit nina ba kaum valavalaun;
Ma kaum varmari i tar pait vangala pa iau.
37 U tar valangalanga ra pakana gunan iau vanavana tana,
Ma ra ura kaugu pa dir ga tamagaga.
38 Iau ga tar korot mur kaugu umana ebar, ma iau ga tar tadav diat,
Ma pa iau ga lilikun pit tuk tar ba dia ga virua.
39 Iau ga tar vapanie vue diat, ma iau ga tar go vakakit diat, ma dia mama tut mulai;
Maia, dia ga tar bura ta ra vavai ra ura kaugu.
40 Tago u ga tar vi pit iau ma ra dekdek upi ra vinarubu;
U ga tar vamolo tar diat i tagu, diat dia ga tut na vinarubu ure iau.
41 U ga tar pukue vatalil kaugu umana ebar,
Upi ina ubu vue diat dia milmilikuane iau.
42 Dia ga tikatikan, ma pa ta na ba na valaun diat,
Dia ga tangi tadav ra Luluai iat, ma pa i ga torom ta diat.
43 Ma iau ga ubu pamar gigi diat da ra tobon na pia;
Iau ga rua diat da ra pikai ta ra nga, ma iau ga vue pikire vue diat.

44 U ga tar valaun iau kan ra varngangar kai kaugu tarai;
U ga tar vaki iau upi iau a lualua ta ra umana Tematana;
A tarai nina ba pa iau ga nunure, diat a torom tagu,
45 A umana vaira diat a ongo ko tagu;
Ma ba dia valongore ra tinata ure iau, diat a torom vuavuai tagu.
46 A umana vaira diat a bilua vanavana,
Ma diat a vana rikai ma ra nidadar kan kadia lavur pal na bakbakit.
47 Ra Luluai i laun, ma da pite pa kaugu vat i ta;
Ma da manga pite pa God, ra vat ki nina iau lalaun tana;
48 Maia pa, nam ra God nina i pait ra varobo ure iau,
Ma i vamolo tar ra tarai tagu,
49 Ma i valangalanga iau kan kaugu umana ebar;
Maia pa, u vaki iau urama kan diat dia tut na vinarubu ure iau,
U valaun iau kan ra tena vakavakaina.

50 Kari, Luluai, ina tul tar ra pite varpa tam pire ra umana Tematana,
Ma ina kakailai na pite varpa ure ra iangim.
Ra Luluai i tul tar ra ngala na varvalaun ta kana king,
Ma i vaarike tar ra varmari tai nina i ga pilak pa ia,
Tai David ma kana tarai namur ma pa na mutu.
51 

Copyright information for `KSD