2 Thessalonians 2

Satan

Ure ra vinavana mulai uti kai kada Luluai Iesu Kristo, ma ure bula kada vinavana varurung tadav ia, ave lul pa avat, a tara na turagu, ba koko na malmaliara lulut ra nuknuk i vavat, ma koko avat a ngarao, tai ta tulungen, ba ta varvai, ba ta buk da mamati pire vevet, varogop ba i maravai ra bung kai ra Luluai; ma koko ta tikai na vagu pa avat ma ta mangana magit; tago ra ngala na bunura na lua, ma da ga vaarike boko ra tutana na varpiam, ra natu i ra vinirua, nina i ga varongongoi, ma i vangala pa mule upi na lia ta nam di vatang ia ba God, ba nam di lolotu tana; ma i ki ta ra kuba i God, ma i vuar pa mule ba ia God. Ma pa ava nuk pa ia laka, ba iau ga ki boko pire vavat, iau ga ve avat ta go ra lavur magit? Ma go ava tar nunure ra magit i tur bat ia boko, upi da ga vaarike ta ra kilalana iat; tago ra magit na pidik kai ra varpiam i tar papalum gori; ma i tuk ta nam ra bung ba da ga tak vaire vue nina i onge bat ia. Ma ta nam ra e da vaarike ra tena varpiam, nina ba ra Luluai na vapanie vue ma ra vuvu na ngiene, ma na kamare vue ma ra vinavana rikai ta kana pinot; nina muka, ba kana pinot i varogop ma ra papalum kai Satan, ure ra ngala na dekdek ma ra lavur vakilang ma ra lavur vaongo na magit i varvakaian, 10 ma ra lavur vavagu i ra mangamangana gegagege ure diat, dia vana ta ra vinirua; tago pa dia ga vatur vake ra mamainga upi ra dovotina, nina ba diat a laun tana. 11 Kari go God i tulue ra dekdek na varvagu pire diat, upi diat a kapupi ra vaongo; 12 Upi da kure vakaina diat par, ba pa dia kapupi ra dovotina, ma dia tar gugu ka ta ra magit pa i takodo.

Di ga pilak pa avat upi ra varvalaun

13 Ma i manga topa avet upi avet a pite varpa milat tadav God ure avat, a tara na turagu, a umana vakak kai ra Luluai, tago papa ra vunapaina God i ga pilak pa avat upi avat a laun ta ra varvagomgom na Tulungen ma ra nurnur ta ra dovotina; 14 go ra magit i ga oro pa avat i tana ta kaveve bo na varvai, upi avat a kale pa ra minamar tana kai kada Luluai Iesu Kristo. 15 Io, a tara na turagu, avat a tur padikat, ma avat a vatur vake ra vartovo di ga tovo tar ia ta vavat ma kaveve tinata, ba ta kaveve buk.

16 Ma kada Luluai Iesu Kristo iat, ma God, ra Tama i dat, nina i ga mari dat ma i tul tar ra varmaram tukum ta dat ma ra bo na kini nunur ta ra varmari, 17 na vamaram ra bala i vavat ma na vapadikat avat ta ra lavur bo na papalum ma ta ra lavur bo na tinata parika.

Copyright information for `KSD