2 Thessalonians 3

Avat a araring ure avet

A mutuaina go, a tara na turagu, avat a araring ure avet, upi na vutvut ra tinata kai ra Luluai ma upi da mar ia, varogop pire vavat; ma upi da valaun avet kan ra tarai dia gegagege ma dia kaina; tago pa dia nurnur par. Ma ra Luluai i dovot, nina ba na vapadikat avat, ma na mono bat avat kan ra kaina. Ma go kaveve kap varupui ta ra Luluai ure avat, tago ava pait nam ra lavur magit ave ga kure tar ia ta vavat, ma avat a pait bula diat namur. Ma ra Luluai na vateten ra bala i vavat upi avat a tadav ra varmari kai God, ma ra kini vovovon kai Kristo.

A mamat i ra papalum

A tara na turagu, ave vartuluai tadav avat ta ra iang i kada Luluai Iesu Kristo, ba avat a vana kan diat ra umana tura i vavat par dia vanavana gegagege, ma pa dia mur nam ra vartovo ave ga tul tar ia ta vavat. Ava tar nunure, i topa avat upi avat a kap lap avet; tago avet, pa ave pait ta mangamangana gegagege livuan ta vavat; ma pa ave ga en vakuku ra magit kai tikai, tago i ga tup avet ra niongor ta ra papalum, ta ra marum ma ra keake, upi koko avet a vamangula ta tikai ta vavat; vakir tago pa i ga takodo tar ta vevet, upi ka avet a umana valavalar pire vavat, upi avat a kap lap avet. 10 Tago ba ave ki boko pire vavat, ave ga vartuluai tadav avat dari, ba ona tikai i ole ra papalum, koko muka na ian. 11 Tago ave valongore ba ta umana ta vavat dia vanavana gegagege, ma pa dia papalum muka, dia varvakai vakuku ma ra magit kai ra enana. 12 Ma diat dia dari, ave vartuluai tadav diat, ma ave pit diat ure kada Luluai Iesu Kristo, ba diat a papalum ma ra madu na maukua i diat, ma diat a ian ika ra adiat iat. 13 Ma avat, a tara na turagu, koko avat a talanguan ta ra papalum ure ra magit i boina. 14 Ma gala tikai pa i torom ta kaveve tinata ta go ra buk, avat a vakilang nam, ma koko avat a ki varurung me, upi na vavirvir tana. 15 Ma galiaka avat a nuknuk pa ia ba kavava ebar, avat a pit ia da a tura i vavat.

A mutuaina tinata

16 Ma go, a Luluai na malmal iat na tul vatikene tar ra malmal ta vavat ta ra lavur magit parika. Boina ba ra Luluai na ki pire vavat.

17 Iau Paulo, iau varvatatabai ma ra limagu iat; ia ra vakilang ta ra lavur buk parika; iau tar tumu ia damana. 18 A varmari kai kada Luluai Iesu Kristo na ki pire vavat par.
(A vauruana buk tadav ra tarai Tesalonika, di ga tumu ia maro Korinto.)


Copyright information for `KSD