Deuteronomy 33

Moses i vadoane ra umana vuna tarai Israel

Ma Moses i ga tata.vadoane value ra tarai Israel ma go ra tinata na varvadoan, ma namur i ga mat. Ma i ga biti dari:

A Luluai i ga vut maro Sinai,
Ma i ga vana rikai tadav diat maro Seir;
I ga pupua rikai maro ra luana Paran,
Ma i ga vana kan ra vinun na arip na marmar na tena gomgom;
A birao na varkurai i ga tur ta ra papar a limana tuna ure diat.

Maia, i ga mari kana tarai;
Kana lavur viviliai dia bakit ta ra limana;
Ma dia kiki pire ra kaum,
Diat par tikatikai dia tar vaturk vake kaum tinata.

Moses i ga tul tar ra varkurai ta dat,
Upi ra tiniba ta ra kivung kai Iakob.
Ma ra Luluai i ga ki na king pire Iesurun.
Ba ra umana patuana kai ra tarai dia ga ki rangup,
A lavur vuna tarai Israel varurung.

Boina ba Ruben na laun, ma koko na mat,
Ma koko ra taraina na paupau ka.

Ma i ga vatang go ra tinata ure Iuda:
Luluai, una valongore ra nilai Iuda,
Ma una agur pa ia tadav kana tarai;
I ga varubu ma ra limana ure diat;
Ma una ga maravut ia ure kana lavur ebar.
Ma ure Levi, i ga biti:
Kaum Tumim ma kaum Urim dir tur pire kaum vakak na tutana,
Nina u ga valar ot pa ia aro Masa,
Nina amur ga vartoto me ta ra tava Meriba;
Nina i ga biti ure tamana ma ure nana dari: Pa iau gire dir;
Pa i ga mulaot bula ta ra umana turana,
Ma damana ra umana natuna iat, pa i ga nunure diat;
Tago dia ga nuk pa kaum tinata,
Ma dia torom ta kaum kunubu.
10 Diat a vateten tar kaum lavur varkurai tai Iakob,
Ma kaum tinata na vartovo tai Israel;
Diat a vung ra bulit na davai i ang na katkat ta ra luaina matam,
Ma ra kidoloina tinabar di tuntun tar ia ta kaum uguugu na vartabar.
11 Luluai, una vadoane kana tabarikik,
Ma una manane ra papalum na limana;
Una kita kang ra lu i diat dia tut na vinarubu ure,
Ma ra lu i diat dia milmilikuane, upi koko diat a tut mulai.

12 Ure Beniamin, i ga biti:
A vakak kai ra Luluai na ki bulu pirana;
I kove ta ra bung parika,
Ma i kiki livuan ta ra ul a varana.

13 Ma ure Iosep, i ga biti:
Kana gunan na kedek tai ra Luluai,
Ta ra lavur ngatngat na magit marama ra bala na bakut, ta ra mavoko,
Ma ta ra tava i ninim rikai mara ra pia,
14 Ma ta ra lavur ngatngat na magit dia matuka ta ra keake,
Ma ta ra lavur ngatngat na magit dia tavua ta ra gaigai,
15 Ma ta ra lavur bo na magit dia tavua ta ra lualuana ania tana,
Ma ta ra lavur ngatngat na magit dia tur ta ra buabuana pa na mutu,
16 Ma ta ra lavur ngatngat na magit dia tavua ta ra rakarakan a gunagunan, ma dia koakor tana,
Ma ta ra varmari kai nina i ki ra pupui;
Boina ba ra nidoan na ki ta ra ulu i Iosep,
Ma ta ra tunurot na ulu i nina i ga luluai ta ra tara na turana.
17 Kana luaina nat na bulumakau, i lia tuna,
Ma ra ramuna i da ra ram u ra bulumakau i leing;
Na tumatumak ra lavur vuna tarai me tuk tar ta ra ngu na rakarakan a gunagunan;
Damana ra vinun na arip na marmar kai Epraim,
Ma ra arip na marmar kai Manase.

18 Ma ure Sebulun, i ga biti:
Sebulun, una gugu ta kaum lavur vinavana,
Ma u Isakar, ta kaum lavur pal na mal.
19 Da ting pa ra tarai upi diat a vana ta ra luana;
Ma diat a tul tar ra umana takodo na tinabar abara;
Tago diat a maur ma ra ngala na tabarikik na ta,
Ma ra ngatngat na tabarikik i tur ivai ta ra veo.

20 Ma ure Gad, i ga biti:
Nina ba na vangala Gad na ti doan;
I kiki da ra leon,
Ma i karat kadakadal ra lima, ma ra tunurot na ula.
21 I ga pilak vake ra luaina tiniba ure mule,
Tago di ga tibe vaire pa ra pakana abara pi kai ra tena varkurai;
Ma i ga vut tadav ra umana luluai kai ra tarai,
Ma i ga pait ot pa ra magit i takodo kai ra Luluai,
Ma kana lavur varkurai pire Israel.

22 Ma ure Dan, i ga biti:
Dan i da ra nat na leon,
Ma i pil rikai maro Basan.
23 Ma ure Naptali, i ga biti:
U Naptali, u tar maur ma ra varmari,
Ma u tar kor ma ra magit na nidoan tai ra Luluai;
Una kale pa ra ta ma ra papar a taubar.

24 Ma ure Aser, i ga biti:
Aser na ti doan muka, ma na lia ta ra umana bul;
Boina ba ra umana turana diat a manane,
Ma boina ba na puk ra kauna ta ra dangi.
25 Da pait kaum babat ma ra palariam tuna ma ra palarian gobol;
Ma da ra e, damana bula ra dekdekim.

26 Iesurun, pa ta na mulai dir varogop ma God,
Nina i ki ra bala na bakut upi na maravut u,
Ma ta kana minamar ta ra ul a bakut.
27 God tukum ia ra kubam,
Ma da bokaboko ta ra limana pa i mutu;
I ga okole vue ra ebar kan ra luaina matam,
Ma i ga biti: Una vamutue.
28 Ma Israel i kiki bulu,
A vunapai Iakob kaka i ki,
Ta ra gunan na kon, ma ta ra gunan na vain;
Maia pa, kana bala na bakut i vatua ra mavoko.
U Israel, u ti doan; la mulai amur varogop me, a tarai a Luluai i tar valaun ia,
A bakbakit na maramaravut piram,
Ma kaum pakat na vinarubu na niuvia!
Kaum lavur ebar diat a va dudur pa u;
Ma una ruarua taun kadia lavur lualuana.
29 

Copyright information for `KSD