Haggai 1

Di vargat ra tarai upi diat a pait ra kuba i ra Luluai

Ta ra vauruana kilala ba Darius i ga ki na king tana, ta ra gai laptikai, ma ta ra luaina bung ta ra gai, Kagai i ga tatike ra tinata kai ra Luluai tadav Serubabel natu i Sealtiel, a luluai na gunan Iuda, ma tadav Iosua natu i Ieosadak, ra tena tinabar, dari: A Luluai kai ra lavur kor i biti dari: Go ra tarai dia biti ba ra kilala pa i ot boko ba da pait ra kuba i ra Luluai tana. Io, ra tinata kai ra Luluai i ga arikai ta ra ngie i Kagai ra propet dari: Dave, go ra kilala i topa ia bar ba ava kiki ta kavava lavur pal di alur kapi diat ma ra umana bo na davai, ma go ra pal i tarip uka? Io, ra Luluai kai ra lavur kor i biti dari: Avat a nuk pa kavava mangamangana. Ava tar vaume ra ngala, ma ava varurue ra ikilik ika; ava ian, ma pa ava maur; ava momo, ma pa i tup avat; ava mal, ma pa ava malapang tana; ma nina i kap ra vabongon i da i poe ta ra popopoi i tarada. A Luluai kai ra lavur kor i biti dari: Avat a nuk pa kavava mangamangana. Avat a tutua urama ra lualuana, ma avat a vila pa ra davai, ma avat a pait ra pal; ma ina manane, ma ina mamar tana, ra Luluai i bit!. Ava ga kaina upi ra peal, ma ra paupau ka i ga vana rikai, ma ba ava ga mulue varurue ta kavava pal, iau ga vu vue. I vuna ta ra ava? a Luluai kai ra lavur kor i biti. Ure kaugu pal, a taripuna; ma tago avat tikatikai ava varvakai ma ra kubakuba i vavat iat. 10 Kari ure avat ra bakut pa i tul tar ra mavoko, ma ra pia i muie vake ra vuaina. 11 Ma iau ga vartuluai upi ra e na keake ba na taun ra gunan, ma ra umana luana, ma ra kon, ma ra vain, ma ra oliva, ma nam ba ra pia i vuai vaarike, ma ra tarai, ma ra umana vavaguai, ma ra lavur papalum dia pait ia ma ra lima i diat.

12 Io, Serubabel natu i Sealtiel ma Iosua natu i Ieosadak, ra tena tinabar ngalangala, ma ra ibaiba na tarai, dia ga torom ta ra nilai ra Luluai kadia God, ma ta ra tinata kai Kagai ra propet, tago ra Luluai kadia God i ga tar tulue; ma ra tarai dia ga burut ta ra luaina mata i ra Luluai. 13 Ma Kagai ra tultul kai ra Luluai i ga tatike ra tinata kai ra Luluai pire ra tarai, dari: Iau ki maravut avat, ra Luluai i biti. 14 Ma ra Luluai i ga vargat ra tulungea i Serubabel natu i Sealtiel, ra luluai na gunan Iuda, ma ra tulungea i Iosua natu i Ieosadak, ra tena tinabar ngalangala, ma ra tulungea i ra tarai par ba dia ki valili; ma dia ga vut, ma dia ga papalum ta ra kuba i ra Luluai kai ra lavur kor, kadia God, 15 ta ra bung a ura vinun ma a ivat, ta ra gai laptikai, ta ra vauruana kilala Darius i ga king tana.

Copyright information for `KSD