Hebrews 3

Iesu i lia ta dir ma Moses

Io, avat a umana gomgom na turagu, avat ava tur maravut ta go ra varting marama ra bala na bakut, avat a nuk ot pa Iesu ra Apostolo ma ra Tena Tinabar Lualua ure kada papalum; nam i ga dovot tadav nina i ga tibe, varogop Moses i ga dovot ta ra kubana. Tago di ga biti ure go, ba i ko upi na manga ngala kana minamar ta dir ma nam kai Moses, tago nam i pait ra pal, i ruru muka, ma ra pal iat pa i manga ruru. Tago ra tarai dia pait ra umana pal tikatikai; ma God i pait vapar ra lavur magit. Ma a dovotina Moses i ga dovot ta ra papalum na tultul ta ra kubana parika, upi a vakilang ure ra lavur magit da varvai boko tana namur, ma Kristo, da natuna, i lua dovot ta ra kubana; ma dat a kubana, ba tumu da vatur vadekdek vake ra nurnur ma ra langlang ta kada kini nunur tuk ta ra mutuaina.

A ningo kai ra tarai kal God

Io, da ra Takodo na Tulungen i biti:
“Go ba ava valongore ra nilaina,
Koko avat a valeo ra bala i vavat, da ta ra varvakankan,
Varogop ta ra bung na varilam ta ra bil,
Ba ra umana tama i vavat di ga valamlam iau ma dia ga valar ot pa iau,
Ma dia ga gire kaugu papalum a ivat na vinvinun na kilakilala.
10 Io, iau ga kankanuane go ra taun tarai,
Ma iau ga biti: dia rara vatikai ta ra bala i diat;
Ma pa dia matoto pa ta kaugu mangamangana;
11 Ma iau ga vavalima ta kaugu kankan dari:
'Koko diat a olo ta kaugu ningo.'”
12 Avat a varbalaurai, a tara na turagu, kan ra kaina ninunuk na varpiam na ki ta ra bala i tikai ta vavat, tago i vana kan ra launa God; 13 ma avat a vargat vargiliane avat ra bungbung par tago di vatang ia boko ba a Bung Gori; kan ra varvarara na varpiam na valeo ra bala i tikai ta vavat; 14 tago da kakalai maravut Kristo, ona da vatur vapadikat vake ra turpa i kada nurnur tuk ta ra mutuaina; 15 ma ba dia bitbiti:

“Gori ba ava valongore ra nilaina,
Koko avat a valeo ra bala i vavat, varogop di ga pait ia ta ra varvakankan.”
16 Tago to ia diat nina dia ga valavalongor, dia ga ngangal ma ra kankan? Vakir diat par laka ba Moses i ga agure vairop diat kan ra gunan Aigipto? 17 Ma to ia diat i ga kankanuane diat ra ivat na vinvinun na kilakilala? Vakir vang nam diat, dia ga varpiam, ma dia ga mat ta ra bil? 18 Ma i ga vavalima ure to ia diat dari, ba pa diat a olo ta kana ningo? Vakir vang ure diat nam, ba pa dia nurnur? 19 Ma da nunure, dia ga mama olo, tago pa dia nurnur.

Copyright information for `KSD