Job 10

Iob i tata na niligur ure kana kini

A balagu i talanguan ure kaugu kini,
Ma pa ina al vake mule ra nuknukigu,
Ina tata tago i ligur ra balagu.
Ina biti tai God: Koko una kure vakaina iau;
Una ve iau ure kaum vartakun piragu.
Dave, i topa u ba una kure vadekdek ra tarai,
Ba pi una pidimuane nam u ga vaki ia,
Ma una manane ra varpit kai ra umana tena varpiam?
Dave, a kiau na matam i palapaka ka,
Ba u gigira da ra tarai ka?
Dave, kaum umana bung na nilaun dia da ra umana bung na nilaun kai ta tutana,
Ma kaum umana kilala na nilaun dia varogop laka ma nam kai ra tarai,
Upi una tikan upi kaugu lavur nirara,
Ma upi una titir upi kaugu kaina mangamangana,
Ma u nunure ba pa iau kaina,
Ma pa ta na i ki pi na pala vue iau kan ra limam?

A ura limam dir ga taba iau ma dir ga pip iau,
Ma go u nila vue ke iau.
Una nuk pa ia ba u ga pip iau da ra pia bulit;
Ma dave, una bing rigirigi iau pi ina da mule ra tobon?
10 Dave, pa u ga lingire iau da di lingire ra polo na u,
Ma pa u ga vamek iau da ra tiis?
11 U ga pulu iau ma ra viono ma ra palina,
Ma u ga pakan guve iau ma ra umana ur ma ra umana lolo.
12 U ga tul tar ra nilaun tagu ma ra varmari bula,
Ma u ga balaure vake re tulungeagu.
13 U ga vapidik go ra umana magit ta ra balam,
I kapa piragu ba i ki piram.
14 Ona iau rara, u vakilang iau tana,
Ma pa una nuk vue kaugu kaina mangamangana.
15 Na kaina piragu, ona ra kaina mangamangana i ki tagu!
Ma ona i takodo ra maukuagu, ina ive boko ra matagu,
Tago iau vavirvir muka ba iau gire kaugu kini na malari.
16 Ona iau tak vatut ra ulugu, u korot iau da ra leon,
Ma u pait mule ra umana magit na kinaian piragu;
17 U tata bat mule iau,
Ma u vatavua kaum kankan piragu,
I peal diat dia tut ure iau.

18 Ta ra ava u ga ben pa iau kan ra bala i nagu?
Gala ina ga vung vue ra tulungeagu, ma pa ta kiau na mata na ga tia gire pa iau,
19 Ina ga da pa di ga kava vaarike iau,
Ina ga da nina di puak vue kan ra tatal na bul tadav ra babang na minat.
20 Pa i peal laka kaugu umana bungbung?
Damana una nur vue ke boko iau, upi ina gugu a ik,
21 Ba pa ina vana boko tadav ta gunan nina ba pa ina lilikun kan ia,
A gunan na bobotoi ma ra malur na minat,
A gunan na bobotoi da ra bingnimuna iat,
A gunan na malur na minat ma i purpuruan,
A gunan nina ra kapa tana i bobotoi ka.
22 

Copyright information for `KSD