Job 21

Iob i tata dekdek ba ra umana tena varpiam dia ki bulu

Ma Iob i ga tata ma i ga biti:

Amutal a valongore bulu kaugu tinata,
Ma na da ra tinata na varmaram pire mumutal.
Amutal a tul tar iau pi ina tata,
Ma ba iau tar tata par, io, una varkulumai.
Dave, iau tata na urur ure ra tarai laka?
Ma ta ra ava ina ki vovovon?
Amutal a gire iau, ma amutal a kaian,
Ma amutal a karat liman tana.
Ba iau nuknuk tana iau kaian mat,
Ma i dadadar ra pakagu.
Ta ra ava vang a umana tena varpiam dia laun,
Ta ra ava dia laun vue mangoro na kilala ma dia dekdek ma dia rangrang?
A umana natu i diat diat a tavua bulu pire diat,
Ma kadia umana bul mur ta ra luaina mata i diat.
Dia ki bulu ta ra kubakuba i diat,
Ma ra virit kai God pa i tadav diat.
10 Kadia bulumakau, a tomotoina, i varvangala bulu vatikai;
Ma kadia tana na bulumakau i kakakava bulu.
11 Dia tulue kadia umana bul da ra kikil na sip,
Ma ra umana natu i diat dia malagene ma ra gugu.
12 A pagol ma ra kudu dir maravut diat ta ra kakailai,
Ma dia gugu ta ra nilai ra tataru.
13 Dia ki na uviana ta kadia kilala na nilaun,
Ma dia vana ba ta ra ruarua na tulungen ma ra malmal.

14 Dia biti tai God: Una vana kan avet,
Tago pa ave mainge ba avet a matoto ure kaum lavur nga.
15 To ia ra Dekdek Muka upi avet a toratorom pirana?
Ava bar avet a vatur vake, ona avet a araring tadav ia?
16 Dave, pa dia kure vang ra nga ba diat a uviana tana?
A ninunuk kai ra umana tena varpiam i ki vailik kan iau.
17 Aivia ra pakana di pun ra lamp kai ra umana tena varpiam?
Ba ra varmonong i tadav diat?
Ba God i vakadik diat ta kana kankan?
18 Ba dia da ra mapina kunai a vuvu i purpuruke,
Ma da ra pal i ra vit a ngala na vuvu i kapkap vue?
19 Amutal biti: God i vung vake kana balbali ure ra umana natuna.
Boina ba na bali ia iat, upi na kairane.
20 Boina ba ra kiau na matana na gire kana vinirua,
Boina ba na mome ra kankan kai ra Dekdek Muka.
21 Kana mangana ninunuk ava ure diat ta ra kubana ba i tar mat,
Ba di kutu pit kana umana gaigai na nilaun?
22 Dave, i tale ta tikai pi na tovo vamatotone God,
Tago i ki na varkurai ure diat dia ki arama?
23 Ta tikai i mat ba i lagar boko,
Ba i ki na malmal ma i ki bulu,
24 Kana umana pal a tava dia buka leke ma ra polo na u,
Ma ia iat pa i bilua.
25 Ta ra tikai i mat ba i kankadik ra tulungeana,
Ma pa i ga tia kairane ta bo na kini.
26 Dir par di punang dir ta ra pia,
Ma ra umana kalolo dia kakakao taun dir par.

27 Ea, iau nunure ra nuknuk i mumutal,
Ma ra umana magit amutal nuknuk kakaina ure iau tana.
28 Amutal biti laka: Akave ra kuba i ra luluai?
Akave ra kubakuba i ra umana tena varpiam?

29 Dave, pa amutal ga tir ra umana tena vinavana laka,
Ma pa amutal ga kapupi kadia varvai,
30 Ba ra tena varpiam i langalanga ta ra bung na varmonong,
Ma i pila ta ra bung na kankan?
31 To ia i varvai kapa pirana ure kana mangamangana?
To ia i kure vakaina ure ra umana kaina magit i ga pait ia?
32 Ba di puak ia ma ra variru tadav ra tung na minat,
Di mono bat ra babang na minat.
33 A pia ta ra male i kalakalami pirana;
A tarai par dia murmur ia,
Ma ra kor dia lualua tana.

Ta ra ava amutal vamaram vakuku iau?
Kamumutal lavur tinata na balbali a vaongo ko.
34 

Copyright information for `KSD