Job 22

Elipas i takun Iob ure ra ngala na varpiam

Ma Elipas ra te Teman i ga tata ma i ga biti:

Dave, i tale ta tikai pi na vadongone God?
A dovotina nina i kabinana i vadongone ia iat mulai.
Dave, ra Dekdek Muka i gugu vang, ona i takodo kaum mangamangana?
Ba i kale pa ta magit, ona u ko kakit?
Dave, i pit u, ma i varkurai ure u laka,
Tago u burut ure?
I ngala kaum varpiam, laka?
Ma pa ta mutuaina ta kaum bilak na mangamangana.
Tago u ga kap vakuku ra umana vuvung varirap pire turam,
Ma u ga tak vue ra mal kai ta umana upi dia tavaturia.
Pa u ga tul tar ta tava pire diat dia bilua upi diat a momo,
Ma pa u ga tabar vamaur diat dia mulmulum.
A rangrang na tutana i ga kale vanavana ra gunan,
Ma nina di ga manane i ga ki tana.
U ga tulue ra umana ua na vavina, ma pa ta magit ta ra lima i diat,
Ma u ga bubur ra lima i ra umana nat na ling.
10 Damana a umana kun dia va kikil u,
Ma ra bunurut i tup vakaian u;
11 Kaum kapa i bobotoi ka,
Ma ra lovon i alir taun u.

12 Dave, God pa i ki vang arama ra bala na bakut?
Una gire ra umana tagul arama liu, dia ki arama liu kakit iat!
13 Ma u, u biti: Ava vang God i nunure?
Na kure valar pa diat vang dia ki ta ra vavai ra ngala na bingnimuna?
14 I vanavana ta ra ul a bakut,
Ma pa i gire dat, tago a dekdek na bakut i tuba bat ia.

15 Una mur laka ra nga kai ra umana tena varpiam, papa amana iat?
16 Di ga ra vue diat ba pa i ot boko kadia kilala na nilaun,
Ma ra lovon i ga kap vue ra vunapai diat.
17 Dia ga biti tai God: Una vana kan avet,
Ma, Ava bar avet a vatur vake tai ra Dekdek Muka?
18 Ma i ga vabuka ra kubakuba i diat ma ra bo na tabarikik;
A ninunuk kai ra umana tena varpiam i ki vailik kan iau.
19 A umana tena takodo dia gire ma dia gugu;
Ma diat dia langalanga kan ra varpiam dia nongone diat,
20 Ma dia biti: A dovotina di ga vapanie vue diat dia ga tut ure dat,
Ma ra magit i ga ki valili, a iap i ga en vue.

21 Amur a ki na varnunurai ma God, ma una ki na malmal;
Damana a boina na tadav u.
22 Una kapupi ra tinata na vartovo nina i irop kan ra ngiene,
Ma una kodop vake kana lavur tinata ta ra balam.
23 Ona una talil tadav ra Dekdek Muka ma ra variru,
Ma ona una tak vue ra kaina mangamangana kan ra kubam,
24 Ma ona una vue tar kaum ngatngat na tabarikik ta ra tobon,
Ma kaum goled maro Opir livuan ta ra umana vat ta ra tava alir,
25 Upi ra Dekdek Muka, ia kaka nam kaum ngatngat na tabarikik,
Ma na da ra ngatngat na silva piram;
26 Damana una ga ta ra Dekdek Muka,
Ma una tadaraka urama pire God.
27 Ba una araring tadav ia na valongore u,
Ma una pait ot pa kaum lavur vavalima.
28 Ra magit u nuknuk ure, da pait ot pa ia,
Ma ra kapa na pupua ta kaum lavur nga.
29 Tago God i varuva nina i malamala ngala,
Ma i valaun nina i madu ra balana.
I valaun nina i langalanga kan ra varpiam;
Maia, da valaun u tago i gomgom ra limam.
30 

Copyright information for `KSD