Job 31

Iob i tata dekdek ba i dovot kana mangamangana

Iau tar pait ra kunubu ure ra ura kiau na matagu;
Ina bobe davatane ta gara na vavina?
Ava bar ina vatur vake tai God ure nam,
Ma ava bar ra Dekdek Muka na tul tar ia tagu ure?
Dave, ra tena varpiam pa na vatur vake laka ra varmonong,
Ma diat dia varpiam pa diat a kale pa ra vinirua?
Pa i gire vang kaugu lavur mangamangana,
Ma pa i luk vang kaugu umana tak keke?

Gala iau ga vanavana upi ra magit vakuku,
Ma gala ra kakigu i ga vutvut upi ra vartuam;
(Boina ba da valar iau ta ra valavalar na mamat i takodo,
Upi God na nunure ba i takodo ra maukuagu!)
Gala iau ga vana rara,
Ma ra balagu i ga mur ra kiau na matagu,
Ma ta magit i dur i ga ki petep ta ra limagu;
Boina ba ra umana enana diat a en nam iau ga vaume;
Ma boina ba da rubat vue kaugu uma.
Gala ra balagu i ga anan upi ta vavina,
Ma gala iau ga tar kiki ta ra matakilalat kai talaigu;
10 Boina ba kaugu taulai na tultul ure ta enana,
Ma ra umana enana diat a po me.
11 Tago nam ia ra kaina magit,
A bilak na magit nina ba da kure;
12 Tago nam ia ra iap nina i vavaimur upi ra tavul a vinirua,
Ma na en vapar vue ra lavur vuai kaugu papalum.

13 Gala iau ga nur vue ra kinail kai kaugu tultul, a tutana ba ra vavina,
Ba dia ga kail piragu;
14 Ava ina pait ia ba God i tut na varkurai?
Ma ba i titir, ava ina tatike?
15 Dave, kaugu tena vavaki pa i ga vaki vang bula kaugu tultul?
Dave, pa i ga pait vardadane amir ta ra tatal na bul?

16 Gala iau ga muie ta magit tai ta luveana,
Ba iau ga nur vue ta ua na vavina pi na tangtangi ma ra niiba,
17 Ba iau ga ian varkolono
Ma pa iau ga tabar ra umana nat na ling;
18 (Tago da tama i ra bul i balaure natuna, damana iau ga balaure,
Ma iau ga lue rap ia papa ra bala i nana;)
19 Gala iau ga gire ta tikai i iba upi ra mal ma i to na virua,
Ba ta luveana ba pa kana ta mal na tubatuba,
20 Ma pa iau ga vamaram ia ma kaugu pal a sip,
Tuk tar i ga tata vadoane iau;
21 Gala iau ga al pa ra nat na ling tadav ra varkurai,
Tago iau ga nunure ba ra tena varkurai na torom tagu;
22 Boina ba ra kelakelegi tagu na takunu varbaiai ta ra varpakan,
Ma ra limagu na takavir kan ra ul a varagu.
23 Tago iau ga burutue ra varmonong kai God,
Ma pa iau ga pait valar pa ta magit ure kana ngala na kini.
24 Gala iau ga nurnur ta ra goled,
Ma iau ga biti tana: U kaugu tena maramaravut;
25 Gala iau ga gugu tago iau ga manga uviana,
Ma tago ra limagu i ga kale pa mangoro na tabarikik;
26 Gala iau ga gire ra keake ba i ga pupua,
Ba ra gai ba i ga talapar,
27 Ma ra balagu i ga vana ivai irai,
Ma ra ngiegu i ga galum ra limagu;
28 Nam bula a kaina mangamangana nina ba da kure,
Tago iau ga tia piam vue ra God liu.

29 Gala iau ga gugu ure ra vinirua kai nina i ga milikuane iau,
Ma iau ga ga ba ra kaina i ga tadav ia;
30 (A ngiegu pa i pait ra kaina mangamangana,
Pa iau ga tatike ra varong ure kana nilaun;)
31 Gala ra tarai ta ra kubagu pa dia ga biti:
To ia bar nina ba pa i maur ma ra ana nian?
32 Tago pa ta vaira i ga va ta ra nga;
A banbanu ai kaugu pal i ga tapapa milat ure ra umana tena vinavana;
33 Gala iau ga ive kaugu varpiam da ra tarai,
Ba iau ga tuba, ta ra bongobongogu,
34 Tago iau ga burut ure ra tarai,
Ma ra varmilikuanai kai ra umana apik na tarai i ga vaburut iau,
Ma damana iau ga ki mut ara ra bala na pal.

35 Gala ta tikai na valongore iau!
(Ea, kaugu vakilang akari! Boina ba ra Dekdek Muka na bali iau!)
Gala ina ga vatur vake ra vartakun nina kaugu ebar i ga tar tumu vake!
36 A dovotina ina puak ia ta ra ul a varagu;
Ma ina vung vapetep tar ia tagu da ra kere ta ra ulugu;
37 Ina ve vapar tar ia tana ra lavur magit parika ta kaugu vinavana;
Ma ina kakari maravai pirana da ra natu i ra king.

38 Gala kaugu pia i ga takun iau,
Ma ra umana nga na ipipuk ta kaugu uma dia ga tangtangi varurung;
39 Gala iau ga en ra vuai ra pakana ba pa iau ga kul ia,
Ba iau ga doko ko diat ba kadiat nam ra pia;
Boina ba a kait na tavua kia vue ra vit,
Ma ra vura vat na tavua kia vue ra barli.

I ga par ra lavur tinata kai Iob.
40 

Copyright information for `KSD