Job 34

Eliu i vaarike ba God i takodo

Ma Eliu i ga biti bula:
Ea, avat a umana tena kabinana. avat a valongore kaugu tinata;
Ma avat, a minatoto i ki pire vavat, avat a ki na valavalongor.
Tago ra talinga i ta tikai i valar kilang ra umana tinata,
Da ra karameana i dum kilang ra nian.
Boina ba dat a pipilak upi kadat nina ra magit i takodo;
Ma dat iat dat a kapa ure ra magit i boina.
Tago Iob i ga biti: Iau takodo,
Ma God i ga tak vue ra varkurai takodo kan iau;
A dovotina iau takodo, ma God i takun iau ba iau vaongo;
I vakinkin iau ma ina mat tana, ma a dovotina pa iau rara.

To ia bar dir varogop ma Iob,
Nina i mome ra varkulumai da ra tava?
Ma dir varagur ma ra umana tena pait ra kaina,
Ma dir talaina ma ra umana bilak na tutana.
Tago i ga biti ba Pa i vadongone ta tikai
Ba dir a talaina ma God.
10 Ea, avat a umana tena minatoto, avat a ki na valavalongor,
Vakir i topa God ba na varpiam,
Ba ra Dekdek Muka ba na pait ra nirara.
11 Tago na kure bali ta tutana ure kana lavur papalum,
Ma na vapuak ia da kana mangamangana.
12 God pa na pait ta magit i kaina, pata tuna,
Ma ra Dekdek Muka pa na pait ta kaina varkurai.
13 To ia laka i ga tibe upi na kure ra rakarakan a gunagunan,
To ia i ga nur tar ia tana pi na balaure?
14 Gala na kap valilikun ra Tulungeana,
Ma na kap mule kana ubar na nilaun,
15 Gala ra tarai par diat a mat varurung,
Ma ra tutana na lilikun tadav ra tobon.

16 Ona u kabinana, una valongore go;
Una nuk pa kaugu lavur tinata.
17 Dave, na topa tikai nina i milikuane ra takodo na varkurai ba na ki na varkurai?
Ma dave, una takun laka nina i takodo ma i dekdek?
18 I topa ia laka ba da biti tai ta king: U a tutana vakuku,
Ba tai ta luluai: U ti kaina muka?
19 God pa i ru ra umana luluai,
A umana uviana ma ra umana luveana dia varogop pirana,
Tago diat parika a vuai ra papalum na limana.
20 Ta ra kopono pitu mata dia mat, ta ra mutumut;
Di vadadar ra tarai ma di kari vue diat,
Ma ra umana luluai dia papaniai vakaian.
21 A mata i God i gire ra tutana,
Ma i kapa ure kana lavur vinavana.
22 Pa ta bingnimuna, ma pa ta malur bula,
Nina ba ra umana tena pait ra kaina diat a parau tana.
23 God pa i ga tibe ra bung ure ta tikai,
Upi na tur ta ra varkurai ta ra luaina matana.
24 I bubur gigi ra umana ngalangala ba pa i titir ure diat,
Ma i vaki ra umana enana ta kadia umana tiniba.
25 Tago i kapa ure kadia lavur mangamangana papalum,
I vue pukue diat ta ra marum, ma dia kinkin.
26 I ubu diat da di ubu ra umana tena varpiam
Ta ra mata i ra tarai,
27 Tago dia ga lingan irai kan ia,
Ma pa dia ga ru kana lavur nga,
28 Ma tago ra kinail kai ra umana luveana i ga arikai tadav ia,
Ma i ga valongore ra tinangi kadiat di vakadik diat.

29 Ba i ki vovovon, to ia na vartakun?
Ona i ive ra matana, to ia na gire?
Nam i pait ia ure ra tarai ma ure ra vuna gunan bula,
30 Upi koko nina i piam vue God na ki na varkurai,
Ma upi koko ta tikai na ben varara ra tarai.
31 Dave, ta tikai i ga biti tai God:
Iau tar kairane ra kinadik, ma pa ina varpiam mulai;
32 Una tovo iau ta ra magit iau. tuptup tana;
Ma gala iau ga tar pait ta kaina mangamangana, pa ina pait ia mulai?
33 Dave, na bali u da u mainge, tago u ole?
Tago ra varpilak i tur piram, ma vakir piragu;
Damana una vaarike ra magit u nunure.

34 A umana tena minatoto diat a biti tagu,
Ma ra tena kabinana nina i valongore kaugu tinata na biti:
35 Iob i tata na tuptup,
Ma pa ta kabinana ta kana lavur tinata.
36 Boina ba da valar Iob tuk ta ra mutuaina,
Tago i balbali da ra umana tena varpiam.
I vaot kana kaina mangamangana ma ra varpiam,
I pakat ra limana livuan ta dat,
Ma i vapeal kana umana tinata ure God.
37 

Copyright information for `KSD