Job 40

Ma ra Luluai i ga tata pire Iob, ma i ga biti:

Dave, nina i varngangar na tadav ra
Dekdek Muka?
Nina i vartoto ma God, na bali ia.
Ma Iob i ga tata bali ra Luluai, ma i ga biti:

Ea, iau da ra magit vakuku; ava ina tatike piram?
Ina ki mut uka.
Tika na pakana iau ga tata, ma pa ina tata mulai;
Maia, a ura pakana, ma pa ina vatang mule ta tinata.

Ta umana magit nina dia vaarike ra dekdek i God

Ma ra Luluai i ga tata pire Iob ta ra bala na kalivuvur, ma i ga biti:

Una vi pit da ra tutana;
Ina tir u, ma una bali iau ma ra kabinana.
Dave, una vakaina vue kaugu takodo na varkurai?
Dave, una takun iau, upi u iat una tur langalanga?
Dave, ra limam i da ra lima i God,
Ma i tale u pi ra nilaim na oraoro da kana pangpagur?
10 Una mong ma ra minamar ma ra kini na ngala;
Ma una vung bula ra variru ma ra kini na luluai.
11 Una lolonge ra karangap i kaum kankan,
Ma una vaikilik diat par dia kolakolo.
12 Una bobe diat ma una varuva diat;
Ma una rua bereng ra umana tena varpiam ta ra pakana dia ki tana.
13 Una punang guve diat ta ra tobon;
Ma una tuba ra pal a mata i diat ta ra pakana i ki ivai.
14 Ma damana ina pite pa u,
Tago ra limam tuna iat i valaun u.

15 Ea, una gire ra os na tava,
Nina iau ga vaki ia da iau ga vaki u;
I en ra vura da ra bulumakau.
16 Una gire, i dekdek ra pagupagu na kakene,
Ma ra dekdekina i ki ta ra lolo na balana.
17 A taukuna i dekdek da ra tagatagal;
Ma ra umana al vakai ta ra pagupagu na kakene dia ki varpetep.
18 A umana uruna dia da ra lolo na palariam gobol,
Ma ra umana rakana dia da ra palariam.
19 I lia ta ra lavur magit na vavaki kai God;
I tale ke nina i ga vaki ia pi na tadav ia ma ra pakat na vinarubu.
20 Tago ra umana luana dia vatavua ra ana nian
Ta ra pakana ba ra umana leing ra pupui dia libur tana.
21 I va ta ra malur i ra umana davai,
Ba i parau ta ra titiparar ta ra lum.
22 A umana davai dia malmalur dia tuba bat ia;
Ma ra umana iara ta ra papar a tava dia tur kikil ia.
23 Ea, pa i burut ba ra tava i lovon;
Ma ba ra Iordan i noro ta ra ngiene i tur patuan ika.
Dave, i tale ta tikai ba na kinim ia ba i bobe bat ia,
Ma na al pa ia ma ra vinau ta ra bilauna?
24 

Copyright information for `KSD