Joshua 1

A tarai Israel dia vaninara upi diat a ra pa ra gunan Kanaan

Ma ba Moses a tultul kai ra Luluai i ga tar mat, ra Luluai i ga biti tai Iosua natu i Nun a tultul kai Moses dari: Moses kaugu tultul i tar mat; io, una tut ma una vana bolo ta go ra Iordan, avat ma go ra tarai par, tadav ra gunan ba ina tabar diat me, diat ra tarai Israel iat. Iau tar tul tar ra lavur pakana ta vavat ba ava rua ia ma ra kau i vavat, da iau ga ve Moses. Kavava langun na tur pa ia ta ra bil ma ta go ra Lebanon, ma na tuk tar ta ra ngala na tava alir Oiparat, a gunan par kai ra tarai Ket, ma tuk tar ta ra ngala na ta ta nam ra papar i ong ra keake tana. Pa na tale ta tikai ba na tur ta ra luaina matam ta ra lavur kilala u laun tana; ma da iau ga maravut Moses, damana ina maravut u; pa ina nur vue u, ma pa ina vana balakane u.

Una ongor ma una balamat, tago una tibe go ra tarai boko ma ra gunan nina iau ga vavalima tana pire kadia lavur ngalangala ba ina tul tar ia ta diat. Ia kaka una ongor ma una balamat muka, upi una torom ta ra lavur vartuluai nina Moses kaugu tultul i ga tul tar diat i tam; koko una vana kan diat ta ra papar a lima tuna ba ta ra papar a maira, upi una mal pa ra lavur magit ta ra gunan u vana tana. Koko go ra buk na varkurai na panie kan ra ngiem, ma una nununuk tana ra keake ma ra marum bula, upi una pait ra lavur magit di ga tumu ia tana, tago ona u pait nam kaum vinavana na boina, ma ra lavur magit na tavua piram. Pa iau ga vartuluai piram laka? Una ongor ma una balamat; koko una burut ma koko una ururian; tago amur varagur ma ra Luluai kaum God ta ra lavur gunan ba una vana tana.

10 Ma Iosua i ga vartuluai pire ra umana raprap kai ra tarai dari: 11 Avat a vana alalu livuan ta ra gunan kai ra tarai ma avat a biti: Avat a vaninare ra magit na nian, tago a utul a bung boko ma avat a bolo lake go ra Iordan, upi avat a olo ta ra gunan, ma avat a kale ra gunan nina ba ra Luluai kavava God i tul tar ia ta vavat upi avat a kale pa ia.

12 Ma Iosua i ga biti ta ra vuna tarai Ruben, ma ta ra vuna tarai Gad, ma ta ra ngungu vuna tarai Manase, dari: 13 Avat a nuk pa mule ra vartuluai Moses ra tultul kai ra Luluai i ga tatike ta vavat, dari: A Luluai kavava God i tar vango avat, ma na tul tar go ra gunan ta vavat. 14 Boina ba kavava vaden, ma ra umana natu i vavat, ma kavava umana vavaguai diat a ki vatikai ta go ra gunan nina ba Moses i ga tul tar ia ta vavat ati ta ra papar a Iordan; ma avat ika a umana tena ongor ta ra vinarubu, avat a kap vargal ma avat a bolo lake ta ra luaina mata i ra umana tura i vavat, ma avat a maravut diat, 15 tuk tar ta nam ra bung ba ra Luluai na, vango ra umana tura i vavat da avat, ma diat bula diat a kale pa ra gunan nina ba ra Luluai kavava God i tul tar ia ta diat; ma namur avat a lilikun tadav kavava gunan iat ma avat a vatur vake tuna, nina ba Moses ra tultul kai ra Luluai i ga tul tar ia ta vavat ta ra papar a Iordan mati, ta ra pakana ra keake i vana rikai tana. 16 Ma dia ga tata bali Iosua, ma dia ga biti: Nam ra lavur magit u vartuluai me pire vevet avet a pait diat, ma nam ra lavur gunan u tulue avet i tana avet a vana tana. 17 Da ave ga toratorom tai Moses, damana avet a toratorom tam; ia kaka i boina ba ra Luluai kaum God na ki piram da i ga ki Moses. 18 Nina i piam vue kaum vartuluai ma pa i torom ta kaum lavur tinata ta ra lavur magit u tul tar ia tana, na virua ka; ia kaka una ongor ma una balamat.

Copyright information for `KSD