Joshua 13

A gunan i tur valili boko

Ma go Iosua i ga manga patuana ma i ga laun vue mangoro na kilala; ma ra Luluai i ga biti tana: U tar manga patuana, ma i tar peal kaum kilala na nilaun, ma a ngala na gunan i tur valili boko upi avat a kale. Go ia ra gunan i tur valili boko:

A langlangun par kai ra tarai Pilistia, ma ra langun kai ra tarai Gesur par,
(papa aro ra Sikor nina i alir ta ra luaina mata i Aigipto, ma tuk tar ta ra langun Ekron ta ra papar a labur, di vatang ia ba kai ra tarai Kanaan; ra ilima na luluai kai ra tarai Pilistia, diat maro Gasa, Asdod, Askelon, Gat, ma Ekron;) ma ra langun kai ra tarai Ava, ta ra papar a taubar, a gunan par kai ra tarai Kanaan, ma Meara kai ra tarai Sidon, tuk tar aro Apek ta ra langun kai ra tarai Amor, ma ra gunan kai ra tarai Gebal, ma Lebanon parika, ta ra papar a keake i vana rikai tana, papa aro Baal-Gad ta ra bit a luana Kermon ma tuk tar ta ra langun Kamat, ra tarai par ta ra lualuana papa aro Lebanon ma tuk tar aro Misrepot-Maim, a tarai Sidon par; ina korot vue diat ta ra luaina mata i ra tarai Israel, ma una tibe tar ra gunan ta ra tarai Israel ma ra padapadailam upi diat a kale, da iau ga ve u. Io, una tibe go ra gunan ta ra lavuvat na vuna tarai upi diat a kale, ma ta ra ngungu vuna tarai Manase bula.

A pakana gunan nina ba Ruben, Gad ma ra ngungu tarai Manase dia kale pa ia

A vuna tarai Ruben ma ra vuna tarai Gad dia ga kale pa ra gunan varurung ma ta ra ngungu ta ra vuna tarai Manase, nam ba Moses i ga tul tar ia ta diat ta ra papar a Iordan maro ba ra keake i vana rikai tana, varogop Moses ra tultul kai ra Luluai i ga kure tar ia ta diat: papa aro Aroer nina i ki ta ra papar a male Amon,, ma ra pia na pal livuan ta ra male, ma ra tamataman Medeba tuk tar aro Dibon; 10 mara lavur pia na pal kai Sikon ra king kai ra tarai Amor, nina i ga varkurai aro Kesbon, tuk tar ta ra langun kai ra tarai Amon; 11 ma Gilead, ma ra langun kai ra tarai Gesur ma Makat, ma ra luana Kermon par, ma ra gunan Basan tuk tar uro Saleka; 12 a gunan par kai Og aro Basan, nina i ga varkurai aro Astarot ma Edrei, (ia ka i ga ki valili ta ra tarai Repaim); tago Moses i ga ubu diat ma i ga korot vue diat. 13 Ma ra tarai Israel pa dia ga korot vue ra tarai Gesur ma ra tarai Makat; a tarai Gesur ma ra tarai Makat dia ki livuan ta ra tarai Israel tuk tar ta go ra bung.

14 Ia kaka ra vuna tarai Levi pa i ga tul tar ta gunan ta diat upi diat a kale; a tinabar ika di tuntun tar ia ma ra iap tadav ra Luluai ra God kai Israel nam uka kadia tiniba, da i ga ve diat.

15 Ma Moses i ga tabar ra vuna tarai Ruben varogop ma kadia lavur apik na tarai. 16 Ma kadia langun i ga tur pa ia papa aro Aroer nina i ki ta ra papar a male Amon, ma ra pia na pal i ki livuan ta ra male, ma ra tamataman par maravai Medeba; 17 Kesbon ma kana lavur pia na pal ta ra gunan i tamataman; Dibon, ma Bamot-Baal, ma Bet-Baal-Meon, 18 ma Iasa, ma Kedemot, ma Mepat, 19 ma Kiriataim, ma Sibma, ma Seret-Sakar ta ra luana kai ra male, 20 ma Bet-Peor, ma ra papar a luana Pisga, ma Bet-Iesimot, 21 ma ra lavur pia na pal ta ra gunan i tamataman, ma ra gunan kai Sikon ra king kai ra tarai Amor, nina i ga varkurai aro Kesbon, nina Moses i ga ub ia, diat varurung ma ra umana luluai Midian, Evi, Rekem, Sur, Kur ma Reba, a umana luluai kai Sikon nina dia ga ki ta nam ra gunan. 22 A tarai Israel dia ga doko bula Balam natu i Beor a tena papait ma ra pakat na vinarubu, varurung ma ta ra umana dia ga doko diat. 23 Ma ra Iordan ia ra langun kai ra tarai Ruben ma ra gunan i maravai tana. Go ra gunan ia ra tiniba kai ra tarai Ruben da kadia lavur apik na tarai, a lavur pia na pal ma kadia lavur gunan ik.

24 Ma Moses i ga tabar ra vuna tarai Gad, ra umana bul mur tai Gad, varogop ma kadia lavur apik na tarai. 25 Ma kadia langun Iaser ma ra lavur pia na pal Gilead, ma ra ngungu ta ra gunan kai ra tarai Amon, tuk tar uro Aroer nina i ki ta ra luaina mata i Raba, 26 ma papa aro Kesbon tuk tar uro Ramat-Mispe ma Betonim, ma papa aro Makanaim tuk tar ta ra langun Debir, 27 ma ta ra male, Bet-Aram, Bet-Nimra, Sukot, ma Sapon, nina dia ki valili ta ra gunan kai Sikon ra king Kesbon, a Iordan ia ra langun tana, ma i tuk tar ta ra tava kikil Kineret ta ra papar a Iordan maro ta ra matana taur. 28 Go ia ra tiniba kai ra tarai Gad da kadia lavur apik na tarai, a lavur pia na pal ma kadia lavur gunan ik.

29 Ma Moses i ga tabar ra ngungu vuna tarai Manase; a ngungu ta ra vuna tarai Manase dia ga kale varogop ma kadia umana apik na tarai. 30 Ma kadia langun i ga tur pa ia aro Makanaim, Basan parika, a gunan par kai Og ra king Basan, ma ra lavur pia na pal kai Iair nina dia tur ta ra gunan Basan, laptikai na vinun na pia na pal, 31 ma ra ngungu tai Gilead, ma Astarot ma Edrei, a ura pia na pal ta ra gunan kai Og aro Basan; di ga tul tar go diat ta ra tarai Makir natu i Manase, ure ra tarai Makir nam ra ngungu vuna tarai, varogop ma kadia umana apik na tarai.

32 Go ia ra umana pakana nina Moses i ga tibe diat ta ra tamataman Moab, ta ra papar a Iordan maro, ta ra papar a taur tai Ieriko. 33 Ma Moses pa i ga tibe ra vuna tarai Levi ma ta pakana, tago ra Luluai ra God kai Israel ia iat kadia tiniba, da i ga ve diat.

Copyright information for `KSD