Joshua 7

Akan i varpiam

Ma ra tarai Israel dia ga varpiam ure ra magit i tabu: tago Akan, natu i Karmi, natu i Sabdi, natu i Sera, ta ra vuna tarai Iuda, i ga tak pa ra magit i tabu, ma ra kankan kai ra Luluai i ga vana rikai ure ra tarai Israel.

Ma Iosua i ga tulue ta umana tutana maro Ieriko uro Ai ta ra paparai Bet-Aven ta ra papar a taur tai Betel, ma i ga biti ta diat dari: Avat a vana ma avat a makile ra gunan. Ma ra tarai dia ga vana oai ma dia ga makile ra gunan Ai. Ma dia ga lilikun tadav Iosua, ma dia ga biti tana: Koko una tulue ra tarai par urama; i topa ia ba ta urua ba ta utul a arip na marmar na tarai diat a vana ma diat a ubu Ai; koko una vabalaguan ra tarai par upi diat a vana urama, tago a paupau ka diat. Io, a utul a arip na marmar na tarai bar dia ga vana urama; ma dia ga vilau ka kan ra tarai Ai. Ma ra tarai Ai dia ga ubu a utul a vinun ma laptikai na tarai bar ta diat, ma dia ga korot mur diat papa aro ra mataniolo tuk tar ta ra gunan Sebarim, ma dia ga ubu diat ta ra kububa; ma ra bala i ra tarai i ga bilua, ma i ga da ra tava ka.

Ma Iosua i ga rada kana mal, ma i ga bura timtibum ta ra luaina mata i ra bok kai ra Luluai tuk tar ta ra ravian, diat ma ra umana patuana kai ra tarai Israel; ma dia ga vung ra tobon ta ra ulu i diat. Ma Iosua i ga biti: Ui, Luluai God, ta ra ava u ga agure vabolo go ra tarai ta ra Iordan, upi una tul tar avet ta ra lima i ra tarai Amor, upi avet a virua? Gala ave ga ngo ko, ma ave ga ki ta ra papar a Iordan maro, gala na boina! Ea Luluai, ava ina tatike, tago ra tarai Israel dia tar takap kan kadia umana ebar! Tago ra tarai Kanaan ma ra tarai par dia ki ta ra gunan diat a valongore boko, ma diat a vartakalat bat avet, ma diat a vapanie vue ra iang i vevet ta ra rakarakan a gunagunan; ma ava una pait ia ure ra ngala na iangim?

10 Ma ra Luluai i ga biti tai Iosua dari: Una tut; ta ra ava u va timtibum dari? 11 Israel i ga pait ra kaina; maia pa, dia ga piam vue kaugu kunubu nina iau ga vartuluai tana pire diat; maia, dia ga tak pa ra magit i tabu, ma dia ga loalong, ma dia ga vartuam bula, ma dia ga vung potone ma kadia lavur tabarikik. 12 Kari ra tarai Israel pa dia pait valar pa ia ba diat a tur ta ra luaina mata i kadia umana ebar, dia lop uka kan kadia lavur ebar, tago dia tur ure ra vinirua; pa ina maravut mule avat, ona pa avat a li vue nam ra magit i tabu kan avat.

13 Ea, una tut, ma una vagomgom ra tarai, ma una biti: Avat a vagomgom avat upi ningene, tago ra Luluai ra God kai Israel i biti: Tika na magit i tabu i ki pire vavat a tarai Israel; i dekdek upi avat a tur ta ra luaina mata i kavava umana ebar, tuk tar ta nam ra bung ba ava vung vue nam ra magit i tabu kan avat. 14 Ta ra malana tikatika na vuna tarai ta vavat na kakari maravai; ma ra lavur apik na tarai ta nam ra vuna tarai ba ra Luluai i vakilang ia, diat a maravai tikatikai; ma ra lavur kakang ta nam ra apik na tarai ba ra Luluai i vakilang ia, diat a maravai tikatikai; ma ra umana tutana ta nam ra kakang ba ra Luluai i vakilang ia, diat a maravai tikatikai. 15 Ma nina ba ra magit i tabu i tur pirana, da tun vue ma ra iap, ma damana kana lavur tabarikik, tago i tar piam vue ra kunubu kai ra Luluai, ma tago i ga pait ra mangamangana papaua livuan tai Israel.

16 Io, Iosua i ga tut ta ra kavunvun, ma i ga agur pa ra tarai Israel, tikatika na vuna tarai, ma di ga vakilang ra vuna tarai Iuda; 17 ma i ga agur pa ra lavur apik na tarai ta ra vuna tarai Iuda, ma i ga vakilang ra apik na tarai kai Sera; ma i ga agur pa ra apik na tarai kai Sera, a umana tutana tikatikai, ma di ga vakilang Sabdi; 18 ma i ga agur pa diat dia barniuruna me, a umana tutana par tikatikai, ma di ga vakilang Akan natu i Karmi, natu i Sabdi, natu i Sera, ta ra vuna tarai Iuda.

19 Ma Iosua i ga biti tai Akan: Natugu, i boina ba una ru ra Luluai ra God kai Israel, ma una tata kapa pirana; una ve iau ure ra magit u tar pait ia, ma koko una vapidik ia kan iau. 20 Ma Akan i ga tata bali Iosua, ma i ga biti dari: A dovotina iau tar piam vue ra Luluai ra God kai Israel, ma iau tar pait ra dari: 21 iau ga gire tika na bo na olovoi maro Babilon ta ra tabarikik di ga ra pa ia, ma a ura mar na pakana silva, ma tika na pakana goled a mamatina a ilima na vinun na pakana mamat, ma i ga kaina ra balagu upi diat ma iau ga vatur vake diat; gire, iau tar ive diat ra pia livuan ta kaugu pal na mal, ma ra silva i va ra vavaina.

22 Ma Iosua i ga tulue ra umana tultul, ma dia ga vutvut upi ra pal na mal; ma gire, i ga tar ive ra tabarikik ta kana pal na mal, ma ra silva i ga va ra vavaina. 23 Ma dia ga kap vairop ra tabarikik kan ra pal na mal, ma dia ga vung kapi ia pire Iosua ma ra tarai Israel par; ma dia ga vung kapi ia ta ra luaina mata i ra Luluai.

24 Ma Iosua ma ra tarai Israel par varurung me dia ga agur pa Akan natu i Sera, ma dia ga kap ra silva ma ra olovoi, ma ra pakana goled, ma ra umana natuna, a umana tutana ma ra umana vavina, ma kana umana bulumakau, ma kana umana as, ma kana umana sip, ma kana pal na mal, ma kana tabarikik par, ma dia ga kap diat tar ta ra male Akor.

25 Ma Iosua i ga biti: Upi ra ava u ga vakaina avet? Ra Luluai na vakaina u go ieri. Ma ra tarai Israel par dia ga tupar ia ma ra vat; ma dia ga tun vue diat ma ra iap, ma dia ga tupar diat ma ra vat.

26 Ma dia ga punang taun ia ma ra ngala na anguvai vat, i tuk tar ta ra bung gori; ma ra Luluai i ga ngo kan ra karangap i kana kankan. Kari di vatang ra iang i nam ra pakana ba ra male Akor (”A Varmonong”), tuk tar ta ra bung gori.

Copyright information for `KSD