Matthew 17

A ninana ta ra ul a luana

(Mar 9:2-13; Luk 9:28-36)

Ba i par laptikai na bung i ting pa Petero ma Iakobo, ma Ioanes, dir turana, ma i agure vaire dital urama ra luana i manga tuluai, ma i ria ra pakana ta ra mata i dital, ma ra matana i pupua da ra matana keake, ma kana lavur mal dia pua da ra kapa. Ma Moses ma Elias dir tur pa pire diat, ma dital tata me. Ma Petero i biti tai Iesu: Luluai, boina muka go da ki ati, ona u mainge, ina pait ra utul a pal na turturup ati, tikai pi kaum, tikai pi kai Moses, ma tikai pi kai Elias. Ba i tatata boko, a bakut i kapa i vamalur pa diat, ma ra nilai tikai tana i biti: Go Natugu, a bul na vakak, iau ti gugu muka tana, avat a valongore. Ba ra utul a bul na vartovo dital valongore, dital burut muka, ma dital bura palar uro ra pia. Iesu i vana tadav dital, i bili dital ma i biti: Amutal a tut, ma koko amutal a burut. Ba dital tadaraka, pa dital gire ta na, Iesu ka.

Ba dia vanavana ba ta ra luana, Iesu i tigal dital dari: Koko amutal a ve ta tikai ta go ra magit amutal tar gire tuk tar ta ra bung ba Natu i ra tutana i laun mulai kan ra minat. 10 Ma kana a utul a bul na vartovo dital tir ia dari: Ba damana, dave ra umana tena tutumu dia tatike ba Elias na vana rikai lua? 11 Ma i biti: A dovotina ba Elias na pot ma na mal mule ra lavur magit par. 12 Ma iau tatike ta vavat: Elias i ga tar pot ma pa dia nunure ilam ia, dia pait nam ra magit i tana dia mainge. 13 Ma ra utul a bul na vartovo dital nunure nagam ba i tata ta dital ure Ioanes ra Tena Baptaiso.

Iesu i vairop ra tabaran kan ra bul tutana

(Mar 9:14-29; Luk 9:37-43a)

14 Ba dia tadav ra kor na tarai, tika na tutana i tadav ia, ma i va timtibum, ma i biti: 15 Luluai, una mari natugu, a tutana, tago i matmat vakaian, ma i tup ia ra kinadik, ma i vala bura ta ra iap ma ta ra tava bula. 16 Iau ga ben ia tadav kaum tarai na vartovo ma dia mama valagar pa ia. 17 Iesu i biti: Avat ra taun tarai pa ava nurnur ma ava ti gegagege! Aivia ra kilakilala ina ki pire vavat? Aivia ra kilakilala ina ungung pa avat? Avat a ben ia uti tadav iau. 18 Ma i bor vue ra tabaran, ma i vana kan ia, ma ra bul i oton ta nam iat ra pakana bung. 19 A tarai na vartovo dia tadav Iesu irai, ma dia tir ia: Ma dave avet, ave mama okole vue? 20 Ma i biti ta diat: Tago i ikikilik kavava nurnur; a dovot go iau tatike ta vavat: Ona kavava nurnur i ngala da ra pat i ra mastad ik, avat a tatike ta go ra luana: Una kakari pa mamati uro; ma na kakari ka, ma pa ta magit na dekdek ta vavat. [ 21 la kaka, pa ta magit a mangamangana dari na irop tana, ta ra niaring ma ra vinevel ika.]

Iesu i varvai mulai ure kana minat

(Mar 9:30-32; Luk 9:43b-45)

22 Ba dia ki boko Galilaia, Iesu i biti ta diat: Da tul tar boko Natu i ra tutana ta ra lima i ra tarai, 23 diat a doka ma ta ra vautuluna bung na laun mulai. Ma i tabun muka ra bala i diat tana.

A totokom ure ra pal na vartabar

24 Ba dia pot Kapernaum, diat dia varurue ra totokom ure ra pal na vartabar, dia tadav Petero ma dia tatike: Dave, kavava tena vartovo i vue ra totokom ure ra pal na vartabar ba pata? 25 Ma i biti: Maia. Ba i tar ruk na pal Iesu i tata lua tana, i biti: Simon, ava u nuk ia, a lavur king ra pia dia vatur vake ra totokom ma ra vapuak tai ia, tai ra lavur natu i diat, ba tai ra lavur vaira? 26 Ma i biti: Tai ra lavur vaira. Iesu i biti tana: Damana a lavur natu i diat dia langalanga. 27 Ia kaka, kan dat a varara diat, una vana na ta, una il ma nina ra en u il value pa ia, una pagal ra ngiene, ma una na tadav ra mani tana; una tak pa ia, ma una totokom me ure dor parika.

Copyright information for `KSD