Numbers 34

Ma ra Luluai i ga tata pire Moses dari: Una vartuluai pire ra tarai Israel ma una biti ta diat: Ba ava olo ta ra gunan Kanaan, (a gunan Kanaan da kana lavur langun ia ra gunan ba avat a kakalai tana,) kavava pakana na tuk uro ta ra bil Sin pire Edom ta ra papar a taubar, ma kavava langun ta ra papar a taubar na tur pa ia ta ra ngu na Ta Mat ta ra papar a taur tana; ma kavava langun na vila likun ta ra tavarat Akrabim, ta ra papar a taubar tana, ma na vanavana tuk uro Sin; na bolo Kades-Barnea ta ra papar a taubar; na vanavana uro Kasar-Adar, ma na bolo vanavana uro Asmon; ma ra langun na vila likun aro Asmon upi uro ra tava alir Aigipto, ma na tuk uro ra valian.

Ma ure ra langun ta ra papar a taoai, a ngala na ta ma ra valian tana, ia kavava langun ta ra papar a taoai.

Ma kavava langun ta ra papar a labur na dari: ta ra ngala na ta avat a vakilang ra luana Or; papa aro ra luana Or avat a vakilang vanavana uro ra langun Kamat; ma ra langun na tuk uro Sedad; ma ra langun na tadav Sipron, ma na tuk uro Kasar-Enan; go kavava langun ta ra papar a labur.

10 Ma avat a vakilang kavava langun ta ra papar a taur papa aro Kasar-Enan uro Sepam; 11 ma ra langun na vanavana ur maro Sepam uro Ribla ta ra papar a taur tai Ain; ma ra langun na vanavana ur ma na tuk uro ra ul a papar a tava kikil Kineret ta ra papar a taur tana; 12 ma ra langun na vana ba uro ra Iordan ma na tuk uro ta ra Ta Mat; go ia kavava gunan da ra lavur langun kikil ia.

13 Ma Moses i ga vartuluai pire ra tarai Israel, ma i ga biti: Go ia ra gunan nina avat a padapadailam upi kavava umana kakalai tana, nina ra Luluai i ga vartuluai ba da tul tar ia ta ra lavuvat na vuna tarai, ma ta ra ngungu vuna tarai; 14 tago ra vuna tarai Ruben ta kadia lavur apik na tarai, ma ra vuna tarai Gad ta kadia lavur apik na tarai, dia ga tar kakalai, ma ra ngungu ta ra vuna tarai Manase bula; 15 ra ura vuna tarai ma ra ngungu vuna tarai dia ga tar kakalai ta ra papar a Iordan maro ta ra papar a taur pire Ieriko, ta ra pakana ba ra keake i rada rikai tana.

16 Ma ra Luluai i ga tata pire Moses dari: 17 Go ra iang i diat nina diat a tibe tar ra gunan ta vavat upi avat a kale: Eleasar ra tena tinabar ma Iosua natu i Nun. 18 Ma avat a kap tika na luluai ta ra umana vuna tarai tikatikai, upi diat a tibe ra gunan ure ra kakalai. 19 Ma go ra iang i diat: Kaleb natu i Iepune ta ra vuna tarai Iuda, 20 ma Semuel natu i Amiud ta ra vuna tarai Simeon, 21 ma Elidad natu i Kislon ta ra vuna tarai Beniamin, 22 ma tika na luluai ta ra vuna tarai Dan, Buki natu i Iogli, 23 ma tika na luluai ta ra vuna tarai Manase, Kaniel natu i Epod, 24 ma tika na luluai ta ra vuna tarai Epraim, Kemuel natu i Siptan, 25 ma tika na luluai ta ra vuna tarai Sebulun, Elisapan natu i Parnak, 26 ma tika na luluai ta ra vuna tarai Isakar, Paltiel natu i Asan, 27 Ma tika na luluai ta ra vuna tarai Aser, Akiud natu i Selomi, 28 ma tika na luluai ta ra vuna tarai Naptali, Pedael natu i Amiud.

29 Ra Luluai i ga vartuluai pire go diat, upi diat a tibe tar ra kakalai ta ra tarai Israel ta ra gunan Kanaan.

Copyright information for `KSD