Proverbs 24

Koko una varngu ure ra umana tena varpiam,
Ma koko una anan upi ra kini pire diat;
Tago ra bala i diat i nuk upi ra arung varbat,
Ma ra ngie i diat i tatike ra kaina magit.

Di pait ra pal ma ra kabinana,
Ma ra minatoto i vatur vapadikat ia;
Ma ra kabinana i vangan ra lavur pakana pal
Ma ra lavur tabarikik i ngatngat ma i potar.

A tena kabinana i ti ongor,
Ma ra matotono i vangala ra dekdekina.
Ba u pait ra vinarubu una nuk mal pa ia,
Ma ba i peal ra umana tena varvateten da vatur vake ra niuvia.
A lunga pa i tadav ra kabinana tago i kiki arama iat;
Pa i tak ra ngiene ta ra mataniolo.
Nina ba i abe pa ra kaina upi na pait ia,
A tarai diat a vatang ia ba ra tena varpiam.

A nuknuk i ra umana lunga i tar kaina,
Ma ra tena varkulumai i da ra magit na milmilikuan ta ra luaina mata i ra tarai.

10 Ba u matmat ta ra bung ba di tur bat u,
A ongorim i ikilik ika.

11 Una valaun pa diat di al pa diat tadav ra minat,
Ma una tigal bat diat dia pa lebalebe tadav ra vardodoko.
12 Ba u biti, Ea, vakir ave ga nunure go,
Dave, nina ba i valar ra bala i ra tarai pa i nuk pa ia bar?
Ma nina i balaure bat ra tulungeam pa i nunure bar?
Ma pa na vabongon vang ra tarai tikatikai varogop ma kadia papalum?
13 Natugu, una en ra polo na livur, tago i boina,
Ma ra bulit na livur, nina i kalakalami ta ra ngiem.
14 Una nunure ba ra kabinana i damana ta ra tulungeam;
Ba u tar tikan tadav ia, una vatur vake ra vabongon,
Ma ra magit u kiki ung pa ia pa na panie.

15 U ra tena varpiam, koko una kobot upi ra gunan kai ra tena takodo;
Koko una vakaina kana pal na vava;
16 Tago ra tena takodo i bura lavurua na pakana, ma i tut mulai;
Ma ga ra kaina magit i vue pukue vue ra umana tena varpiam.

17 Ba kaum ebar i bura, koko una gugu;
Ma ba i tutukai, koko ra balam na ga tana;
18 Kan ra Luluai na gire, ma pa na manane,
Ma kana kankan na ngo kan ia.

19 Koko una ngarangarao ure ra umana tena varpiam,
Ma koko una pin ra umana bilak na tutana;
20 Tago ra tena varpiam pa na vatur vake ta vabongon,
Ma da pun ra lamp kai ra umana tena varpiam.

21 Natugu, una ru ra Luluai ma ra king,
Ma koko una laure diat dia pukpukue ra mangamangana;
22 Tago kadia kinadik na vut vakaian;
Ma to ia i nunure ra vinirua i vuna ta dir?

23 Go bula ra umana tinata kai ra umana tena kabinana.

Pa i boina ba di ru vakuku ra tarai ta ra varkurai.
24 Nina i biti ta ra tena varpiam, U a tena takodo,
A tarai diat a tata kaina ure, ma ra umana vuna tarai diat a milmilikuane;
25 Ma diat dia pit ra tena varpiam diat a gugu boko,
Ma ra bo na nidoan na tadav diat.

26 Nina i bali vatakodo ra tinata,
I da i galum ra bul na ngie i dat.

27 Una vaninara ure ra papalum aro ra pia,
Ma una mal varurue ra tabarikik aro ra pupui;
Ma namur una vatur kaum pal.
28 Koko una takun vakuku talaim,
Ma koko una vartuam ma ra bul na ngiem.

29 Koko una biti dari: Da i ga pait ia tagu, damana ina bali ia pirana;
Ina bali ka ra mangamangana kai nam ra tutana.

30 Iau ga vana alalu ta ra uma kai ra tabauma,
Ma ta ra uma na vain kai ra lunga;
31 Ma ea, ra kait i ga tavua tana,
Ma i ga avur ma ra kara,
Ma kana liplip na vat i ga kaina.
32 Io, iau ga bobe, ma iau ga nuk mal pa ia;
Iau ga gire ma iau ga matoto tana.
33 Ta ik a niva boko, ma ta ik a mata vava,
Da likun ra lima ta ik upi da ngo,
Damana ra kini na luveana na pot da ra kinakinao,
Ma ra kini na niiba da ra tutana i kap vargal.
34 

Copyright information for `KSD