Proverbs 29

Nina ba di vala pit ia ma i pue ngangar ika,
Na virua vakaian, ma pa da valaun valar pa ia.
Ba ra umana tena takodo dia tavua, a tarai dia gugu;
Ma ba ra tena varpiam i vatur vake ra varkurai, a tarai dia oir.
Ba tikai i mainge ra dovotina i vagagane tamana,
Ma ga nina i laure ra umana igoro na vavina i vole vue kana tabarikik.
A king i mal vapadikat ra gunan ma ra bo na varkurai,
Ma ga nina ba i vo pa a vartabar i pukue vakaina.
Nam ra tutana ba i manane vavaongo talaina
I pale ra ubene ure ra kauna.
A kun i ki ta ra varpiam kai ra tena varpiam,
Ma ga ra tena takodo i kakailai ma i gugu.
A tena takodo i nuk pa ra magit kai ra umana luveana;
A tena varpiam pa i kapa ra nuknukina upi na nunure.
A umana tena varkulumai dia vautunge ra pia na pal,
Ma ra umana tena kabinana dia tigal valar pa ra kankan.
Ba tika na tena kabinana dir varngangar ma ra lunga,
Ba i matana kankan ba i nonganongon, i varogop uka, pa i ngo ra varngangar.
10 A umana tena vinarubu dia milmilikuane nina i ko kakit,
Ma dia anan upi ra nilaun kai nina i dovot.
11 A lunga i vaarike kana kankan par,
Ma ga ra tena kabinana i tur bat ia ma i vangoa.
12 Ba tika na luluai i kapupi ra vaongo,
Kana lavur tultul par dia kaina.
13 Ra luveana ma nina i ki taun ia dir varkuvo;
A Luluai i vakapa ra mata i dir par.
14 A king ba i kure vadovot ra umana luveana,
Kana kiki na king na tur pa na mutu.
15 A virvirit ma ra varpit dir vuna ta ra kabinana,
Ma ra bul ba da nur vue ke na varuva nana.
16 Ba ra umana tena varpiam dia varkurai, a varpiam i tavua;
Ma ra umana tena takodo diat a gire boko kadia bunura.
17 Una vapagumanene natum, ma na vango u;
Maia, na vagagane ra balam.
18 Ona pa ta tinata na vavaarikai ra tarai dia kuabar,
Ma nina ba i toratorom ta ra varkurai i ti doan.
19 Pa da tovo valar pa ra tultul ma ra tinata ka,
Tago a dovotina, kan i kapa ra nuknukina, ma pa na torom.
20 Dave, u gire tika na tutana i rurut ma kana tinata?
Kan ra lunga na boina namur, ma nam pata.
21 Nina i vangala kana bul na tultul da ra vamel,
Na vatur vake boko da natuna.
22 A tena kankan i vuna ta ra varngangar.
Ma ra balakadik i peal kana mangamangana varpiam.
23 Ba tikai i ngala ra nuknukina ure mule, na ruva boko;
Ma nina i madu ra nuknukina na vatur vake boko ra pite varpa.
24 Nina dir varbete ma ra tena nilong i milikuane kana nilaun;
I valongore ra varvabilak, ma pa i vaarike ta magit.
25 A bunurut ure ra tarai i da ra palai,
Ma ga nina ba i nurnur tai ra Luluai i ki bulbulu.
26 Mangoro dia tikatikan upi ra varmananai kai ra luluai,
Ma ga ra takodo na varkurai ure ta tikai i vana rikai tai ra Luluai.
27 A tutana ba pa i takodo kana mangamangana i da ra bilak na magit pire ra umana tena takodo,
Ma nina ba i takodo kana mangamangana i da ra magit na milmilikuan pire ra tena varpiam.
Copyright information for `KSD