Proverbs 31

A tinata na varvargat pire tika na king

A tinata kai ra king Lemuel; a mamat na tinata ba nana i ga tovo tar ia tana.

Ava, natugu? Ava, u natu i ra balagu?
Ava, natugu ba iau ga vavalima ure u?
Koko una vole ra dekdekim ma ra umana vavina,
Ma koko una mur nam ra mangamangana ba ra umana king dia virua tana.
Lemuel, pa i topa ra umana king, pa i topa ra umana king upi diat a mome ra polo na vain;
Ma pa i topa ra umana luluai ba diat a anan upi ra tava longlong;
Kan diat a momo, ma diat a valubane ra varkurai,
Ma kan diat a varara ra varkurai ure diat dia ki na malari.
Una tabar nina i to na virua ma ra tava longlong,
Ma nina i tup ia una vamoma ma ra polo na vain;
Boina na momo, ma na valubane kana kini na niiba,
Ma koko na nuk pa mule ra magit i tup ia.
Una tak ra ngiem ma una maravut ra bombom,
Ta ra vavaarikai ure ra umana biaui par.
Una tak ra ngiem, ma una varkurai takodo,
Ma una varkurai bulu ure ra umana luveana ma ure diat dia ki na niiba.

A pite varpa ure ra ko na vavina nina i taulai

10 A ko na vavina, to ia i tikan valar pa ia?
Tago i manga ngatngat ta ra umana kiau na kalagi.
11 A nuknuk i kana tutana i nurnur tana,
Ma pa na iba upi ra tabarikik.
12 I mal kana tutana, ma pa i vakaina,
Ta kana nilaun par.
13 I tikatikan upi ra ivuna sip ma ra mal,
Ma i mariga ta ra papalum na limana.
14 I da ra umana parau na kunukul,
I ung ra ana magit na nian maro vailik.
15 Ba i marum boko i tut,
Ma i tabar diat ta ra kubana,
Ma i tibe tar ra papalum ta kana umana tultul na vavina.
16 I nuk pa tika na pia na papapalum, ma i kul pa ia;
Ma i pait ra uma na vain ma ra vapuak ure ra papalum na limana.
17 I vi pit ra livuana ma ra ongor,
Ma i vadekdek ra limana.
18 I nunure ba kana tabarikik na kunukul i varvadongon;
Kana lamp pa i mat ra marum.
19 I kulalang ra kuara,
Ma i rau ia ta ra pakana davai ta ra limana.
20 A limana i tul tar ra magit ta ra umana luveana,
I tulue ra limana tadav diat dia ki na niiba.
21 Ra i burutue ra madoldol na mavoko ure diat ta ra kubana,
Tago diat par ta ra kubana dia mal ma ra mal meme.
22 I vir kana lavur bo na kurit; mong ma ra mal kumau ma ra meme marut.
23 Kana taulai i rararang ta ra mataniolo,
Ba i ki maravut ra umana patuana ta nam ra gunan.
24 I ingit mal ra umana kolot ma i ivure diat;
Ma i tulue ra umana vipit tadav ra tena kunukul.
25 I mong ma ra niongor ma ra variru,
Ma i nongone ke ra kilala namur.
26 I tak ra ngiene ma i tatike ra tinata na kabinana,
Ma ra karameana i vaarike ra vartovo na varmari.
27 I balaure bulu ra lavur mangamangana ta ra kubana,
Ma pa i en ra ana magit da ra tabauma.
28 A umana natuna dia tut, ma dia tata vadoane;
Ma kana tutana i pite pa ia bula dari:
29 Mangoro na vaden dia ga mal kadia papalum,
Ma u, u lia ta diat par.
30 A minong i vaongo, ma ra vakak na pakana i panie,
Ma ga ra vavina ba i ru ra Luluai, da pite pa ia.
31 Avat a la tar ra vuai ra limana tana,
Ma boina ba kana lavur papalum diat a pite pa ia ta ra mataniolo.
Copyright information for `KSD