Proverbs 6

A tinata na vartigal ure ra kini na tabauma ma ra vavaongo

Natugu, ba u ga mulaot pi u a tur kia ure talaim,
Ba u ga vavalima pire tika na vaira,
Ma di tar kete u ma ra tinata na ngiem,
Ma di tar kinim vake u ma ra tinata na ngiem,
Io, una pait go, natugu, ma una valaun mule u,
Tago talaim i tar vatur vake ra varkurai ure u:
Una vana ma una bura timtibum pirana, ma una kakail pire talaim.
Koko ra matam na pula ma ra va mat,
Ma koko ra pilpil na matam na mata vava;
Una pila ka da ra king na me i vilau kan ra tena nirovoi,
Ma da ra beo i lop kan ra tena kapi beo.

U ra tabauma, una vana tadav ra rumi;
Una nuk pa kana mangamangana, ma una minana tana.
A dovotina, pa kana ta luluai,
Ba ta monamono, ba ta tena varkurai,
Ma i vaninare ke ra ana magit ta ra kilala na keake,
Ma i varurue ra ana magit ta ra e na varuruai.
Aivia ra bung una va boko, u a tabauma?
Vingai una ga tut kan kaum nidiop?
10 Ta ik a mata vava, ta ik a nidiop,
Da likun ra lima ta ik upi da ngo,
11 Ma ra kini na luveana na tadav u da ra tena limlibur vakuku,
Ma ra niiba da ra tena kap vargal.

12 A tutana vakuku, a tena varpiam,
I vanavana ma i rara ra ngiene,
13 I pitu mata, i gege ra kakene,
I tutu ma ra kaka na limana,
14 A nuknukina i gegagege, i nuknuk upi ra kaina vatikai,
I vaume ra varngangar;
15 Kari ra ana vinirua na tadav vakaian ia,
Na tagigi vakaian, ma pa da valaun ia.
16 Laptikai na magit ra Luluai i milmilikuane diat,
Lavurua dia da ra bilak na magit pirana:
17 A mara i kolakolo, a karameme i vaongo,
A lima ba i ubu doko ra tena takodo,
18 A bala ba i nuk upi ra varpiam,
A keke i vutvut upi ra kaina,
19 A tena varvai ba i vatang ra vaongo,
Ma nina ba i vaume ra varngangar pire diat dia barturana.

A tinata na vartigal ure ra nipo

20 Natugu, una mur ra vartuluai tamam i tul tar ia tam,
Ma koko una vana irai kan ra vartovo kai tinam.
21 Una vung vake ta ra nuknukim,
Una kurkurua me.
22 Ba u vanavana na rap lue u;
Ba u vava na balaure u;
Ma ba u tavangun amur a pirpir me.
23 Tago ra vartuluai i da ra lamp, ma ra tinata na vartovo i da ra kapa,
Ma ra varpit ta ra varvateten i da ra nga na nilaun,
24 Upi na balaure bat u kan ra kaina vavina,
Kan ra varmananai vavaongo ba ra enana i pait ia.
25 Koko ra balam na kaina upi ia tago a metekina,
Ma koko na valam pa u ma ra pilpil na matana;
26 Tago ra paiga na vavina i mainge ke ra ana nian,
Ma ga ra tena nipo, a vavina, i rovoi upi ra ngatngat na nilaun.

27 Dave, ta tikai na kap ra iap ta ra bongobongono,
Ma pa na birao bar kana mal?
28 Ma dave, ta tikai na rua taun ra lakit,
Ma pa na rang ra kauna bar?
29 Damana nina i vana tadav ra taulai kai talaina;
Nina i bili ia pa na langalanga.
30 A tarai pa dia manga milikuane ra tena nilong, ba i long
Upi na maur tago i mulmulum;
31 Ma ba di babare, na valavurua ma ra balbali;
Na bali ia ma ra lavur magit ta ra kubana.
32 Nina dir po ma ta vavina i tabobo;
Nina i pait ia i vakaina ra tulungeana iat.
33 Na kinkin ma na vavirvir,
Ma pa da pun vue kana niruva.
34 Tago ra tutana na ngangal ma ra varvapir,
Ma ta ra bung na varobo pa na varmari.
Na vue ke ra varkul;
Ma ba ra vartabar i ngala kakit, pa na maram tana.
35 

Copyright information for `KSD