Psalms 107

A VAILIMANA BUK A pite varpa tadav God tago ia ra tena pait ra boina

Avat a tul tar ra pite varpa tai ra Luluai, tago a tena varmari;
Tago kana varmari i tur tukum.
Boina ba diat ba ra Luluai i tar valaun diat, diat a vatang nam ra tinata,
Diat ba i tar valaun diat kan ra lima i ra ebar,
Ma i tar varurue vairop diat kan ra gunagunan,
Kan ra papar a taur ma ra papar a taoai,
Kan ra papar a labur ma ra papar a taubar.
Dia ga vana rara ta ra bil, ta ra nga i pui ka,
Pa dia ga gire tadav ta pia na pal ba ra tarai tana.
Dia ga mulmulum ma dia ga mar,
A tulungea i diat i ga matmat.
Ba dia ga malari dia ga tangi tadav ra Luluai,
Ma i ga valangalanga diat kan ra lavur magit i ga monong diat.
Ma i ga lue rap diat ta ra takodo na nga,
Upi diat a vana ta ra pia na pal ba a tarai dia ki tana.
Boina ba diat a tul tar ra pite varpa tai ra Luluai ure kana varmari,
Ma ure kana lavur enana papalum pire ra lavur natu i ra tarai!
Tago i tabar vamaur nina i merek,
Ma i vangan nina i mulmulum ma ra bo na magit.

10 Diat dia ga ki ta ra bobotoi ma ta ta malur na minat,
Dia ga malari ta ra pal na banubat, ma di ga vi diat;
11 Tago dia ga piam vue ra tinata kai God,
Ma dia ga pidimuane ra nuknuk i ra Ngala Kakit;

12 Kari i ga vamolo ra bala i diat ma ra dekdek na papalum;
Dia ga bura, ma pa ta na abara ba na maramaravut.
13 Io, ba dia ga ki na malari, dia ga tangi tadav ra Luluai,
Ma i ga valaun diat kan kadia kaina kini.
14 I ga ben vairop diat kan ra bobotoi ma ra malur na minat,
Ma i ga al kutu kadia vivi.
15 Boina ba diat a pite pa ra Luluai ure kana varmari,
Ma ure kana lavur enana papalum pire ra lavur natu i ra tarai!
16 Tago i bubur ra umana banbanu na palariam gobol,
Ma i mut kutu ra babat na palariam.

17 A umana papaua dia malari ure kadia lavur mangamangana varpiam iat,
Ma kadia kaina mangamangana i tup diat.
18 A bala i diat pa i mainge tuna ta nian,
Ma dia kakari maravai ta ra mataniolo na minat.
19 Io, dia tangi tadav ra Luluai ba dia malari,
Ma i valaun diat kan kadia kaina kini.
20 I tulue kana tinata, ma i valagar pa diat,
Ma i valangalanga diat kan kadia vinirua.
21 Boina ba diat a pite pa ra Luluai ure kana varmari,
Ma ure kana lavur enana papalum pire ra lavur natu i ra tarai!
22 Ma boina ba diat a vartabar ma ra pite varpa,
Ma diat a varvai ure kana lavur papalum ma ra gugu.

23 Diat dia vana na ta ta ra umana parau,
Diat dia vana na kunukul ta ra lamanana,
24 Go diat dia tar gire ra umana papalum kai ra Luluai,
Ma kana lavur papalum na kinaian ta ra marumian.
25 Tago i tata, ma i vatut ra ngala na vuvu,
Nina i vue ra umana bobol urama.
26 Dia tutua urama ra bakut, dia kuba mulai ta ra marumian;
I bilua tuna ra bala i diat ure ra kaina vinavana.
27 Dia vana lekaleke, ma dia pa lebalebe da tikai i longlong ma ra nimomo,
Ma pa dia nunure mulai ba ava bar diat a pait ia.
28 Io, dia tangi tadav ra Luluai ba dia malari,
Ma i valaun diat kan kadia kaina kini.
29 I vango ra ngala na vuvu upi na malila ka,
Ma ra umana bobol dia ngo.
30 Io, dia gugu, tago i malila,
Ma i vaur diat ta ra tungunana dia mainge diat a pukai tana.
31 Boina ba diat a pite pa ra Luluai ure kana varmari,
Ma ure kana lavur enana papalum pire ra lavur natu i ra tarai!
32 Ma diat a tata vangala pa ia ta ra kivung kai ra tarai,
Ma diat a pite pa ia ta ra kivung kai ra umana patuana.

33 I rang ra umana tava alir ma dia da ra bil,
Ma ra umana mata na tava upi diat a da ra pia i mage tuna.
34 I pukue ra pia na uma upi na da ra bil ika,
Ure ra varpiam kadiat dia ki tana.
35 I toro ra bil, ma i da ra kabipolo,
Ma ra pia mage upi na kor ma ra umana mata na tava.
36 Ma i vaki diat dia mulmulum ie,
Ma dia pait ra pia na pal tana,
37 Ma dia pait ra uma, ma dia vaume ra davai na vain,
Ma i vuavuai tuna.
38 I vadoane bula diat, ma dia peal na kaia;
Ma kadia umana vavaguai pa dia ikilik vanavana.

39 Ma ba dia ikilik ma ba dia bilua,
Tago di ki taun diat, ma di vakaina diat, ma i ngarao ra bala i diat,
40 I manga kulume ra umana luluai,
Ma i varara diat ta ra bil ba pa ta nga tana.
41 Ma i vaki vabakite ra luveana kan ra kinadik,
Ma i vatavua kana tarai da ra kikil na sip.
42 A umana tena takodo dia gire, ma dia ga;
Ma ra mangamangana gegagege par i ang bat ra ngiene.
Ba tikai i matoto, boina ba na nuk pa go ra lavur magit,
Ma na kapupi ra lavur varmari kai ra Luluai.
43 

Copyright information for `KSD