Psalms 132

A pite varpa ure ra pal na lotu

A kakailai na nitutua.

Luluai, una nuk pa mule David
Ure ra lavur mangana i monong ia;
Ba i ga vavalima tadav ra Luluai,
Ma i ga varvatading pire ra Ngala Kakit kai Iakob dari:
A dovot, pa ina ruk ra kubagu,
Ma pa ina diop ta kaugu vava;
A matagu pa na pula,
Ma ra pilpil na matagu pa na mata vava,
Tuk tar ta ra bung ba ina gire tadav ta kiki upi kai ra Luluai,
Ma tadav ta pal ba ra Ngala Kakit kai Iakob na ki ie.

Ea, da ga valongore ta ra gunan Eprata,
Da ga tikan tadav ia ta ra langun lar.
Dat a ruk ta kana palpal,
Dat a va timtibum pire ra ruarua na kauna.

Luluai, una tut, una ruk ra kubam,
Amur ma kaum dekdek na bok.
Boina ba kaum umana tena tinabar diat a vavauluvai ma ra mangamangana takodo.
Ma boina ba kaum umana tena lotu diat a kukula ma ra gugu.
10 Koko una okole vue nina u ga ku ia,
Ure David kaum tultul.

11 Ra Luluai i ga vavalima ma ra dovot ure David,
Pa na nur vue, dari:
Ina vaki tikai ta ra umana bul mur tam ta kaum kiki na king.
12 Ona ra umana natum dia toratorom ta kaugu kunubu,
Ma ta kaugu tinata ba ina vateten tar ia ta diat,
A umana natu i diat diat a kabila ki vatikai ta kaum kiki na king.
13 Tago ra Luluai i tar pilak pa Sion;
I mainge ba na ki tana.
14 Go ra gunan ina ngo vatikai tana;
Ina kiki ati, tago iau tar mainge.
15 Ina tata vadoane tuna ra ana nian,
Ina tabar vamaur ra lavur luveana tana ma ra magit.
16 Ina vavauluve bula ra umana tena tinabar tana ma ra varvalaun,
Ma kana lavur tena lotu diat a kukukula ma ra gugu.
17 Abara tika na ram u David na ing rikai,
Iau tar vaninare tika na lamp ure nina iau ga ku ia.
Ina vavauluve kana lavur ebar ma ra vavirvir,
Ma ta ra uluna iat a kere na king na bagabagele.
18 

Copyright information for `KSD