Psalms 146

A pite varpa tadav God ra Tena Valaun

Avat a pite pa ra Luluai.
A tulungeagu, una pite pa ra Luluai.
Ba iau laun boko ina pite pa ra Luluai;
Ina kakailai na pite varpa tadav kaugu
God ba iau ki ati ra pia boko.

Koko avat a nurnur ta ra umana luluai,
Ma koko avat a nurnur ta ra tarai, tago pa i tale diat ra varvalaun.
A tulungea i diat i irop, ma dia lilikun mulai tadav ra pia,
Ta nam ra bung a nuknuk i diat i panie.

Nina ba ra God kai Iakob i maravut ia i ti doan,
Nina ba i ki nunur tai ra Luluai kana God.
God i ga pait ra bala na bakut ma ra rakarakan a gunagunan,
A ta ma ra lavur magit ta dital;
I dovot vatikai.
I pait ra takodo na varkurai ure diat di ki taun diat,
I tabar diat dia mulmulum ma ra magit na nian;
Ra Luluai i pala vue diat di ga vi diat.

Ra Luluai i vanana pa ra umana pula,
Ra Luluai i vatvatur diat dia ki ma ra tinabun,
Ra Luluai i mainge ra umana tena takodo.
Ra Luluai i ki ravie ra umana vaira,
I maravut ra umana nat na ling ma ra umana ua na vavina;
Ma i vapurpuruan ika ra nga kai ra umana tena varpiam.

Ra Luluai na varkurai pa na mutu;
Sion, kaum God na kure ra lavur taun tarai par.
Avat a pite pa ra Luluai.
10 

Copyright information for `KSD