Psalms 22

A kunukula na kinadik ma ra kakailai na pite varpa

Kai nina i lue ra kakailai; a tiun Aielet-Asar; a kakailai kai David.

Kaugu God, kaugu God, ta ra ava u vana kan iau?
Ta ra ava u ki vailik kan iau, ma pa u maravut iau, ma ta ra ava pa u valongore kaugu tinata na niriri?
Ea, kaugu God, iau oraoro ta ra keake, ma pa u torom;
Ma ta ra marum bula pa iau ki mut.

Ma u, u ti lia kakit,
U nam u kiki na king livuan ta ra pite varpa kai Israel.
A umana tama i vevet dia ga nurnur tam;
Dia ga nurnur, ma u ga valaun diat.
Dia ga tangi tadav u, ma dia tar pila;
Dia ga nurnur tam, ma pa dia ga vavirvir.

Ma iau a kalolo ko, ma vakir iau a tutana;
A magit na varkulumai pire ra tarai, ma ra tarai dia pidimuane ke iau.
Diat par dia gire iau, dia nongone iau;
Dia tumul; dia lungane ra ulu i diat, ma dia biti:
Na nur tar ia tai ra Luluai! Ra Luluai na valaun ia!
Boina ba na valaun ia, tago i manga gugu tana!

Ma u kaka nam ba u ga al vairop iau kan ra tatal na bul;
U ga vanurnur iau ba iau ga u boko ta ra u i nagu,
10 Papa nam ra bung iau ga irop tana ta ra tatal na bul u ga puapuak iau;
Ma ba iau ga ki boko ta ra bala i nagu, u kaugu God.
11 Koko u ki vailik kan iau, tago a purpuruan i maravai,
Ma pa ta na ba na maramaravut.

12 Mangoro na bulumakau, a umana tomotoina, dia tar tur kikilane iau;
A umana dekdek na bulumakau, a umana tomotoina, maro Basan dia tar tur kikil iau.
13 Dia pangapanganga tadav iau da ra leon i varvarkarat ma i kukukula.

14 Di lingire vue iau da ra tava vakuku ka,
Ma ra umana urugu par dia taele;
A nuknukigu i da ra bulit na livur;
I polo ko ta ra balagu.
15 A dekdekigu i lageo da ra ngungu kabala na pia;
A karameagu i petapetep ta ra kabegu;
Ma u tar vadiop vaba iau ta ra tobon na minat.

16 Tago a umana pap dia tur kikil iau;
A kor na tarai, a umana tena kaina, dia balade kikil iau;
Dia tar go ra ura limagu ma ra ura kaugu.
17 Pa i dekdek ba ina luk guve ra umana urugu par,
Ma diat dia giragire iau, ma. dia nongone iau.
18 Dia tibe kaugu umana mal ta diat mulai,
Ma dia padapadailam ure kaugu olovoi.
19 Ma u Luluai, koko una ki vailik;
U kaugu tena maramaravut, una lulut upi una maravut iau.
20 Una valaun iau kan ra pakat na vinarubu;
Ma kaugu kopono ko una valaun ia kan ra dekdek i ra pap.
21 Una valaun iau kan ra ngie i ra leon,
Maia pa, kan ra it i ra bulumakau, a kuabar, u tar torom tagu.
22 Ina vaarike ra iangim pire ra umana turagu;
Ma ina kakailai na pite varpa tam livuan ta ra tarai na lotu.
23 Avat ava ru ra Luluai, avat a pite pa ia;
Avat par a umana bul mur tai Iakob, avat a mar ia;
Avat par a umana bul mur tai Israel, avat a ururian tana.
24 Tago pa i ga pidimuane, ma pa i ga milikuane ra kaina kini kai nina i malari;
Ma pa i ga ive ra matana kan ia;
Ma ba i ga kail tadav ia, i ga valongore.
25 Kaugu pite varpa livuan ta ra kor na tarai i vuna tam;
Ina pait ot pa kaugu lavur kunubu na vavalima ta ra luaina mata i diat dia ru ia.
26 Diat i madu ra maukua i diat, diat a ian ma diat a maur;
Diat dia mainge ra Luluai, diat a pite pa ia;
Boina ba ra bala i vavat na laun pa na mutu!

27 A umana ngungu par ta ra rakarakan a gunagunan diat a nuknuk pa mule ma diat a lilikun pire ra Luluai;
A umana apik par ta ra lavur vuna tarai diat a lotu tadav u.
28 Tago ra Luluai iat i vatur vake ra varkurai;
Ma ia iat ra Luluai kai ra lavur vuna tarai.

29 Diat par dia tubu ta ra rakarakan a gunagunan diat a ga ian ma diat a ga lotu;
Diat par dia to na mat, diat a va timtibum pirana,
Maia pa, nina bula ba i mama valaun mule.
30 Tika na taun tarai na torom tana;
Ma da varvai ure ra Luluai pire ra taun tarai namur.
Diat a vut, ma diat a varvai ta kana mangamangana takodo.
Pire ra tarai ba da kava diat boko,
Diat a vaarike ba i tar pait ia.
31 

Copyright information for `KSD