Psalms 28

A niaring upi ra maramaravut

Kai David.

Luluai, ina kail tadav u;
U kaugu vat ki, koko una vaut kan iau;
Kan ba una ki mut tagu,
Ina vardada ma diat dia kuba ta ra tung na minat.
Una valongore kaugu nilul vovo ba iau kail u,
Ba iau tulue ra limagu urama tadav ra kubam i tabu kakit.

Koko una tak vue iau varurung ma ra umana tena varpiam,
Ma varurung ma ra umana tena pait ra kaina,
Nina dia tata na malmal ma ra umana talai diat,
Ma ra bala i diat i kaina ka.
Una balbali ta diat da i topa kadia papalum,
Ma da i topa bula kadia kaina mangamangana;
Una bali ra papalum na lima i diat ta diat,
Una tul tar ra vapuak ta diat ba i topa diat.
Tago pa dia nuk pa ra lavur papalum kai ra Luluai,
Ma ra bibili na limana bula pata,
Na re vue diat, ma pa na vatur diat mulai.

Da pite pa ra Luluai
Tago i tar valongore kaugu lavur nilul vovo.
Ra Luluai ra dekdekigu ma kaugu ramravit;
A balagu i tar nurnur tana ma i tar maravut iau;
Kari ra balagu i manga gugu,
Ma ina pite pa ia ma kaugu kakailai.

Ra Luluai ra dekdek i kana tarai,
Ma ra dekdek na rivarivan ure ra valavalaun kai nina i ga pilak pa ia.
Una valaun kaum tarai, ma una vadoane kaum tiniba;
Una tabatabar bula diat, ma una puak vatikene pa diat.

Copyright information for `KSD