Psalms 35

A niaring upi ra maramaravut

Kai David.

Luluai, una tata maravut iau ure diat dia takun iau,
Una tur bat diat dia tut na vinarubu ure iau,
Una tak pa ra ramravit ma ra bakbakit,
Ma una tut upi una maravut iau.
Una ele pa ra rumu, ma una pore bat ra nga ure diat dia korot mur iau,
Una biti ta ra tulungeagu dari: Iau kaum valavalaun.
Boina ba diat dia mainge ba diat a doko iau, diat a vavirvir ma diat a ruva,
Da pukue vatalil diat ma da vapurpuruan diat, ba dia abe pa ra kaina ure iau.
Boina ba ra vuvu na kap vue diat da ra mapmapina;
Ra angelo kai ra Luluai na rapu diat.
Boina ba kadia nga na bobotoi ma na duladula par;
Ra angelo kai ra Luluai na korot mur pa diat,

Tago dia ga kapi kun ivai ure iau, ma pa ta vuna;
Dia ga kal vakuku ra tung ure iau.
Boina ba ra vinirua na tadav vakaian diat;
Ma diat a taviviai ta kadia kun iat, nina dia kapi ive;
Diat a bura tana, ma diat a virua.

Ma ra tulungeagu na gugu tai ra Luluai,
Na manga ga ta kana valavalaun.
10 A urugu par na biti: Luluai, amur varogop ma to ia?
U ba u valangalanga nina i ki na malari kan ra tutana i lia ta dir ma ra niongor;
Maia, ma u valangalanga nam i malari ma i luveana kan ra tena nilong.

11 A umana tena varvai vavaongo dia tut;
Dia tir iau ta ra lavur magit ba pa iau nunure.
12 Dia bali ra boina ma ra kaina piragu,
A tulungeagu i lingligur tana.
13 Ma iau, iau ga mal ma ra mal na tabun, ba dia mait;
I tup iau ra vinevel;
Kaugu niaring i ga lilikun piragu.
14 Kaugu mangamangana tadav ia i ga da ra mangamangana tadav talaigu ba turagu;
Iau ga ula takodo ma ra tinabun da tikai i tangie nana.

15 Ma ba iau vana lebalebe dia manga gugu ka, ma dia vana varurung,
Dia vana varurung. ma dia tibul vakaian iau,
Dia kadakadal iau, ma pa dia ngo.
16 Da ra umana bilak na tena varkulumai vakuku,
Dia vangvangia ra pal a ngie i diat tadav iau.

17 Luluai, aivia ra bung boko una kiki ka?
Una valaun ra tulungeagu kan kadia lavur varli,
Ma kaugu kopono ko kan ra umana leon.
18 Ina pite pa u ta ra ngala na kor na tarai;
Ina pite pa u livuan ta ra pepeal tarai.

19 Koko kaugu umana ebar vakuku diat a gugu ma iau,
Ma koko diat dia milikuane vakuku iau diat a pitu mata.
20 Tago vakir dia tata ma ra malmal,
Dia abe pa ka ra vaongo ure diat dia ki bulu ta ra gunan.
21 Maia, a ngie i diat i manga panganga tadav iau,
Ma dia biti: Ioi, ioi, ave tar gire ma ra mata i vevet.

22 U tar gire, Luluai, koko una ki mut uka;
Luluai, koko una ki vailik kan iau.
23 Boina una ongor, ma una tavangun, upi una kure maravut iau
Ta kaugu vartakun, u kaugu God ma kaugu Luluai.
24 Una kure iau, Luluai kaugu God, da i topa ra takodo na maukuam;
Ma koko diat a gugu ma iau.
25 Koko diat a nuknuk ia dari: Io, damana ave mainge;
Koko diat a biti: Ave tar konom pa ia.

26 Boina ba diat par dia gugu ta kaugu kinadik, diat a vavirvir ma diat a ruva ka;
Boina ba diat dia malamala luluai piragu, diat a vavauluvai ma ra niruva ma ma ra vavirvir.

27 Boina ba diat dia maravut kaugu takodo na vavaarikai, diat a ngenge ma ra gugu, ma diat a ga;
Maia, diat a biti vatikai dari: Da pite vangala pa ra Luluai,
Nina i gugu ta ra tinavua kai kana tultul.
Ma ra karameagu na varvai ure kaum mangamangana takodo,
Ma ure kaum pite varpa ra bungbung parika.
28 

Copyright information for `KSD