Psalms 38

A niaring kai ra tutana i manga mait

A kakailai kai David, upi ra varvanuknuk.

Luluai, koko una pit iau ta kaum ngala na kankan;
Ma koko una virit iau ta kaum ngangal na kulot.
Tago kaum umana pu dia tur vadekdek iau,
Ma ra limam i mamat i tagu.

A pal a pakagu pa i lagar bulu ure kaum kankan,
Ma pa ta bo na nilaun ta ra urugu ure kaugu varpiam.
Tago iau tar dudu ta kaugu bilak na mangamangana,
Da ra mamat na kinakap dia mamat i tuna tagu.

A umana manuagu dia ang na bubu ma dia ngangar,
Tago iau a papaua.
I talikun ra murugu ma iau pa rururu tuna,
I tabun ra balagu ra bungbung parika.
A lugu i oao tuna,
Ma ra pal a pakagu pa i lagar.
Iau bilua, ma iau dala tuna,
Iau tar kukukula tago i purpuruan ra balagu.

Luluai, u tar matoto ta kaugu mamainga par,
Ma kaugu oir pa i ki ivai kan u.
10 I pipipidil ra balagu, i panie ra dekdekigu,
Ma ra matagu bula i pula.
11 Diat dia mari iau, ma ra umana talaigu, dia tur irai kan kaugu kaina minait;
Ma ra umana turagu bula dia tur aro vailik.

12 Diat bula dia mainge ba ina virua, dia kapi kun ure iau,
Ma diat dia mainge ba ina kadik, dia vatang ra vinirua,
Ma dia nununuk ta ra vartuam ra bungbung parika.

13 Ma iau da ra vaut, pa iau valavalongor,
Ma iau da ra bombom na tutana ba pa i tatata.
14 Maia, iau da ra tutana ba pa i valavalongor,
Ma pa ta tinata na varbat i irop ta ra ngiene.

15 Tago, Luluai, iau ki nunur tam;
Una ga torom, Luluai kaugu God.
16 Tago iau ga biti: Kan diat a gugu ma iau,
Ba i tagalir ra kaugu, dia malamala luluai piragu.

17 Tago iau to na bura ka,
Ma iau lingligur vatikai.
18 Tago ina varvai ure kaugu varpiam,
Na tabun ra balagu ure kaugu nirara.
19 Ma kaugu umana ebar dia ongor ika ma dia dekdek;
Ma ra kor diat, dia milmilikuane varara iau.
20 Diat bula, dia bali ra boina ma ra kaina,
Diat kaugu umana ebar, tago iau mur ra bo na mangamangana.

21 Luluai, koko una vana balakane iau,
U kaugu God, koko una ki vailik kan iau.
Una pampam, ma una maravut iau,
U Luluai, kaugu valavalaun.
22 

Copyright information for `KSD