Psalms 49

Diat dia nurnur ta ra tabarikik, dia lunga

Kai nina i lue ra kakailai; a kakailai kai ra tarai Kora.

Avat a lavur vuna tarai par, avat a valongore go;
Avat a valavalongor, avat a tarai ta ra rakarakan a gunagunan;
Avat par a tarai tuna ma ra umana ngalangala,
A umana uviana ma ra umana luveana.
A ngiegu na tatike ra tinata i kabinana,
Ma ra nuknuk ta ra balagu na kabatau.
Ina valongore ra tinata valavalar;
Ina pala kaugu tinata i pidik ta ra pagol.

Ina burut dave ta ra kaina e,
Ba ra varpiam kadiat dia ki ur vue iau na tur kikil iau?
Diat dia nurnur ta ra ngala na tabarikik,
Ma dia vavagia pa diat mulai tago i peal kadia magit;
Pa ta tikai ta diat i valaun valar pa turana
Ba na varkul pire God ure,
(Tago ra varkul ure kadia nilaun i ngala mat,
Ma pa na pait valar pa ia vatikai namur),
Upi na laun vatikai,
Ma koko na gire ra tung na minat.

10 Tago i gire ba ra umana tena kabinana dia mat,
A lunga bula ma ra koloata dir par dir virua,
Ma ra umana enana dia kale pa kadia pepeal magit.
11 Diat a ki vatikai ta kadia tung na minat;
Nam iat a kubakuba i diat ta ra lavur taun tarai namur,
Kadiat dia vaiang tar ra iang i diat iat ta ra umana gunan.
12 Damana a tadar na tarai pa dia laun vatikai,
Dia da ra umana leing nina dia virua ka.

13 Diat dia nurnur ta diat mulai, dia mur go ra nga,
Ma ra umana talai diat bula nina dia mulaot ta kadia tinata. Sela.
14 Di tulue varuk diat ta ra ruarua na tulungen da ra kikil na sip;
A minat kadia tena varbalaurai;
A umana tena takodo diat a kure diat ta ra malana,
A pal a paka i diat na panie, ma diat a kuba ta ra ruarua na tulungen.
15 Ma God na valaun ra tulungeagu kan ra dekdek i ra ruarua na tulungen,
Tago ia iat na onge iau. Sela.

16 Koko u burut ba tikai i uviana vanavana,
Ba i tavua ra minamar ta ra kubana,
17 Tago ba i mat pa na kap vue ta magit;
Kana ngala na minamar pa na kuba mur ia.
18 A dovotina ba i ga laun boko i biti ba i ti doan,
Ma ra tarai dia pite pa u ba i tavua kaum tabarikik;
19 Na vana tadav ra umana tamana,
Nina ba pa dia gire ra keake mulai.
Ba tikai i tadar ma pa i matoto,
I da ra umana leing nina dia virua ka.
20 

Copyright information for `KSD