Psalms 59

A niaring upi ra bo na kini

Kai nina i lue ra kakailai; a Miktam kai David, ba Saul i ga vartuluai ma di ga kiki uai ta ra kubana upi da doka.

Kaugu God, una valangalanga iau kan kaugu lavur ebar,
Una vabakite iau arama kan diat dia tut na vinarubu ure iau.
Una valangalanga iau kan ra umana tena pait ra kaina,
Ma una valaun iau kan ra umana lup vardodoko.

Tago dia kiki uai upi kaugu nilaun;
A umana ngalangala dia vana varurung upi iau;
Vakir ure kaugu varpiam, vakir ure kaugu nirara, Luluai.
Dia vutvut ma dia vaninara ma vakir iau ra vuna;
Una tavangun, ma una totongo upi iau, ma una gire.

Maia, u iat Luluai, ra God kai ra lavur kor, ra God kai Israel,
Una tut ma una kure ra lavur Tematana;
Koko una mari ta tika na bilak na tena varpiam. Sela.

Dia lilikun na ravian,
Dia loalor da ra pap,
Ma dia vana vurvurbit ta ra pia na pal.
Ea, a umana lup tinata diat;
A umana pakat na vinarubu dia ki ta ra bul na ngie i diat;
Tago (dia biti:) To ia na valongore?

Ma u, Luluai, una ga nongone diat,
Una ga kulume ra lavur Tematana par.
U ra dekdekigu, ina ki pa u;
Tago God kaugu dekdek na pal na bakbakit.
10 Kaugu God na totongo upi iau ma kana varmari.
God na tul tar iau ba ina gire ra magit iau mainge ta kaugu lavur ebar.

11 Koko una ubu doko diat, kan kaugu tarai diat a valubane;
Boina diat a tenten vurvurbit ika ure ra dekdekim; una vaikilik pa diat,
Luluai, kaveve ramravit.
12 Ea, i tup ia ra kaina ta ra ngie i diat!
Ea, i tup ia ra tinata na bul na ngie i diat!
Boina ba da kinim pa diat ta kadia mangamangana kolakolo,
Ma ure ra varvul ma ra vavaongo ba dia vatang ia.
13 Una vapanie diat ta kaum kulot, una vapanie diat upi koko dia laun mulai.
Ma una vaminana diat upi diat a nunure ba God i varkurai pire ra tarai Iakob,
Ma i tuk tar ta ra mutuai ra rakarakan a gunagunan. Sela.

14 Ma una tul tar diat ba diat a lilikun na ravian,
Boina ba diat a loalor da ra pap,
Ma diat a vana vurvurbit ta ra pia na pal.
15 Diat a vana vurvurbit upi ta magit,
Ma diat a ki ra marum bula ona pa dia maur.
16 Ma iau, ina kakailai ure ra dekdekim;
Maia, ina manga kakailai ure kaum varmari ta ra malana;
Tago u ga da ra dekdek na pal na bakbakit piragu,
Ma a rivarivan ta ra bung iau ki na malari tana.
U ra dekdekigu, ina kakailai tadav u,
Tago u, God, kaugu dekdek na pal na bakbakit, ra God ba i mari tuna iau.
17 

Copyright information for `KSD