Psalms 69

A kinail upi ra maramaravut

Kai nina i lue ra kakailai; a tiun Sosanim; kai David.

God, una valaun iau;
Tago ra tulungeagu i to na virua ta ra lovon ta.
Iau dongol ta ra ngala na pikai ba pa ta turtur tana,
Iau tar tur ta ra lulur na polo, ma iau dudu ta ra lovon ta.
Iau mila ka ma ra tinangi, a kongkongigu i dengdeng ika.
A kiau na matagu i papait na pula ma ra tinangi upi God.

Diat dia milikuane vakuku iau dia peal, ma ra pepe na ulugu pata;
Diat dia mainge ba diat a vamutue iau dia ongor mat, kaugu umana ebar vakuku diat;
Iau ga vamule ra magit ba pa iau ga ra pa ia.
God, u nunure kaugu papaua;
Ma kaugu varpiam pa i tur ivai kan u.

Luluai, ra Luluai kai ra lavur kor, koko diat dia nurnur tam diat a vavirvir ure iau.
God kai Israel, koko diat dia tikan up u diat a ruva ure iau.
Tago di ga vul iau ure u;
A vavirvir i turup ra matagu.
Iau tar ki na vaira pire ra umana turagu,
Ma iau a tematana pire ra umana natu i nagu,
Tago ra niongor ure ra kubam i tar vaimur iau;
Ma ra tinata na varvul kadiat dia vul u i tup uka iau.
10 Ba iau ga tangi, ma ba iau ga vevel,
Dia ga pukue, ma dia vul iau me.
11 Ba iau mal ma ra mal na tabun,
Iau da ra magit na varvakok pire diat.
12 Diat dia ki ta ra mataniolo dia tata bat ika iau,
Ma ra umana lup tava longlong dia kulume iau ta kadia lavur kakailai.

13 Ma iau, Luluai, iau araring tadav u ta ra bo na e;
God, ta kaum pepeal na varmari,
Una torom tagu, tago i dovot kaum valavalaun.
14 Una al vairop iau kan ra paipai ma koko ina dudu;
Una valangalanga iau kan diat dia milikuane iau ma kan ra tava i lubu.
15 Koko ra lovon na lubu taun iau,
Ma koko ra marumian na konome iau,
Ma koko ra tung na paum bat ra ngiene ba iau tar ki tana.

16 God, una torom tagu, tago i boina kaum ngala na varmari;
Una lingan upi iau varogop ma ra pepeal i kaum varmari.
17 Ma koko una ive ra matam kan kaum tultul;
Tago iau ki na malari; una torom lulut i tagu.
18 Una maravai tadav ra tulungeagu, ma una valaun ia,
Una kul valangalanga iau ure kaugu umana ebar.

19 U tar nunure ra varvul piragu, ma kaugu vavirvir ma kaugu niruva;
Kaugu umana ebar dia tur ta ra luaina matam.
20 A varvul i tar vatakunuan ra balagu, ma i tup iau ra niligur;
Ma iau ga nuk upi ta umana ba dia mari iau, ma pata;
Iau ga nuk upi ta umana tena varmaram, ma pa iau na tadav ta na.
21 Dia tabar bula iau ma ra taring ba ra agu nian,
Ma ba iau mar, dia vamomo iau ma ra tava mapak.
22 Kadia kadui ta ra luaina mata i diat na da ra kun,
Maia, ma kadia kini na malmal na da ra palai.
23 A mata i diat na gavul upi koko diat a nana,
Ma ra lu i diat na dadadar vatikai.
24 Una lolonge tar kaum kulot taun diat,
Ma kaum kankan, a karangapuna, na vila mur tadav diat.
25 Kadia gunan na uliran,
Koko ta tikai na ki ta kadia lavur pal na mal.
26 Tago dia vakaina nina ba u ga luba ia,
Ma dia varvai ta ra kinadik kadiat u ga vakinkin diat.
27 Kadia varpiam na ngala vanavana,
Ma koko diat a vatur vake kaum mangamangana takodo.
28 Da pun vue diat kan ra buk na nilaun,
Ma koko da tumu diat i tana varurung ma ra umana tena takodo.

29 Ma iau, i monong iau ra kinadik, ma ra ngunungut;
God, kaum valavalaun na vaki iau arama liu.

30 Ina pite pa ra iang i God ma ra kakailai,
Ma ina vangala pa ia ma ra pite varpa.
31 Ma ra Luluai na manane go, ma pa na manane ra nat na bulumakau,
Ba ra bulumakau nina i vung ra ramuna ma ra pal a kauna.
32 Ba diat i madu ra bala i diat dia gire, diat a ga tana;
Avat ava tikan upi God, boina ba ra bala i vavat na lagar mulai.
33 Tago ra Luluai i torom ta ra vulavula,
Ma pa i pidimuane diat i ga varuk diat ta ra pal na banubat.

34 A bala na bakut ma ra rakarakan a gunagunan dir a pite pa ia,
A ta bula ma ra lavur mangana i laun tana.
35 Tago God na valaun Sion, ma na pait ra umana pia na pal Iuda;
Ma ra tarai diat a ki ie, ma diat a kale pa ia.
A umana bul mur ta kana umana tultul diat a kabila kale pa ia;
Ma diat dia mari ra iangina, diat a ki ie.
36 

Copyright information for `KSD