Psalms 72

A niaring ure ra king

Kai Solomon.

God, una tul tar kaum varkurai ta ra king,
Ma kaum takodo na nuknuk tai natu i ra king.
Na kure kaum tarai ma ra takodo na varkurai,
Ma kaum malari na tarai ma ra kabinana.
A umana lualuana ma ra umana ilil diat a vuai vaarike ra malmal upi kai ra tarai,
Tago dia mur ra mangamangana takodo.
Na kure maravut ra tarai dia malari,
Na valaun ra umana natu i ra luveana,
Ma na bubur gigi ra tena ki vartaun.

Diat a ru u ta ra lavur tataun
Ba ra keake ma ra gai dir pupua boko tana.
Na da ra bata i bura ta ra niraut;
Da ra ra ririmi i vabilim ra pia.
Ta kana e na varkurai a umana tena takodo diat a tavua,
Ma ra malmal na pepeal tuk tar ta ra bung ba ra gai pa na pupua mulai.
A langun i kana varkurai na tur pa ia ta ra ta, ma na tuk tar ta ra ta,
Na tur pa ia ta ra Tava Alir, ma na tuk tar ta ra ngu na rakarakan a gunagunan.
Diat dia ki ta ra pupui diat a va timtibum pirana;
Ma kana umana ebar diat a nur tar ika diat i tana;
10 A umana king Tarsis ma ra umana king kai ra umana lolo diat a kap tabar ia;
A umana king Sieba ma Seba diat a tul tar ra vartabar.
11 Maia, ra lavur king par diat a bura timtibum pirana,
Ma ra lavur Tematana par diat a toratorom tana.

12 Tago na maravut ra luveana ba i tangi,
Ma nina bula i malari ba pa ta na i maravut ia;
13 Na mari diat dia bilua, ma diat dia ki na niiba,
Ma na valaun diat dia iba upi ra magit.
14 Na valaun diat kan ra vaongo ma kan ra ra varpa;
Ma ra gapu i diat na ngatngat ta ra luaina matana.

15 Damana diat a laun, ma boina ba ra tarai diat a tabar ia ma ra goled maro Sieba;
Ma boina ba diat a araring vatikai ure,
Ma diat a pite pa ia a bungbung par.
16 Boina ba ra kon na pepeal ta ra gunan, ta ra ul a lualuana;
Ma ra vuaina na rarenge da aro Lebanon;
Ma ra tarai diat a tavua ta ra pia na pal da ra vura ta ra pia.
17 A iangina na tur vatikai;
Boina ba ra umana bul mur tana diat a kap ra iangina ta ra lavur tataun a keake i pupua tana;
A lavur vuna tarai diat a tata vadoane mule diat i tana,
Ma diat a biti ure ba i ti doan.

18 Da pite pa ra Luluai, ra God kai Israel,
Ia kaka i pait ra lavur papalum na padapada varvo.
19 Da pite vatikene pa ra iangina, a potar tuna;
Ma ra rakarakan a gunagunan na buka ma kana minamar;
Amen, ma Amen.

I par ra umana niaring kai David, natu i Iese.
20 

Copyright information for `KSD