Psalms 75

God ia ra Tena Varkurai

Kai nina i lue ra kakailai; a tiun Al-Tasket; a kakailai kai Asap.

God, ave pite pa u;
Ave pite varpa, tago ra iangim i maravai;
A tarai dia varvarvai ta kaum lavur enana papalum.

Ba ina tadav ra bung di ga kubu ia,
Iau ina varkurai takodo.
Ba ra rakarakan a gunagunan i purpuruan ma ra tarai tana bula,
Iau, iau tar vatur vapadikat ra pagapaga tana. Sela.
Iau biti dari ta diat dia malamala luluai: Koko avat a malamala luluai;
Ma ta ra umana tena varpiam dari:
Koko avat a vatur ra ulu i vavat urama;
Koko avat a vatur ra ulu i vavat urama liu,
Ma galiaka avat a vatang ra nginangal na tinata.

Tago ra maramaravut pa na vana rikai ta ra papar a taur,
Ta ra papar a taoai ma ta ra papar a taubar bula pata.
God kaka ra tena varkurai;
I vaikilik pa tikai, ma ta ra tikai i vangala pa ia.
Tago ra Luluai i vatur vake ra momamomo, ma ra polo na vain tana i buabuai;
I buka ma ra tava di ga pota, ma i lolonge vue;
A dovotina, a lavur tena varpiam par ta ra rakarakan a gunagunan diat a mome ra mapak na magit tana.

Ma iau, ina varvarvai vatikai,
Ina kakailai na pite varpa tadav ra God kai Iakob.
Ina bubur vue kabila ra ram kai ra umana tena varpiam,
Ma ra ram kai ra umana tena takodo na tavua rikai.
10 

Copyright information for `KSD