Psalms 98

God i kure ra rakarakan a gunagunan

A kakailai.

Avat a kaile ra kalamana kakailai tadav ra Luluai;
Tago i tar pait ra umana enana magit;
A limana tuna, ma ra gomgom na limana, i pait vaarike ra varvalaun.
Ra Luluai i tar rada kana valavalaun,
I tar vaarike kana mangamangana takodo pire ra lavur vuna tarai par.
I tar nuk pa kana varmari ma kana dovot na mangamangana tadav ra kuba i Israel;
A lavur ngungu na rakarakan a gunagunan dia tar gire ra varvalaun kai kada God.

Avat a ongor ma ra papar tadav ra Luluai, avat par ta ra rakarakan a gunagunan;
Na taorong kavava kakailai na gugu, maia, avat a kakailai na pite varpa.
Avat a kakailai na pite varpa tadav ra
Luluai, ma ra pagol na maravut ia,
A pagol, ma ra kalami na nilai vavat,
A tavur, ma ra kaur bula.
Avat a manga pupunge ta ra luaina mata i ra Luluai, ra King.

A ta na roro, ma ra lavur mangana i kor tana,
A rakarakan a gunagunan, ma diat dia ki tana;
Boina ba ra lavur lovon diat a papar,
A lavur buabuana diat a taorong ma ra gugu,
Ta ra luaina mata i ra Luluai, tago i vut upi na kure ra rakarakan a gunagunan;
Na kure ra rakarakan a gunagunan ma ra varkurai i takodo,
Ma ra lavur vuna tarai ma ra varkurai i varogop.

Copyright information for `KSD