Romans 11

A varmari kai God pire ra tarai Israel

Io, iau biti dari ba: Dave, God i tar okole vue ra taraina laka? Koko muka! Tago iau bula a te Israel, a bul mur tai Abaraam, ta ra vuna tarai Beniamin. God pa i ga okole vue ra taraina, diat, i ga nunure value diat! Pa ava ga nunure laka nam ra tinata a Buk Tabu i ga tatike ure Elias? Ba i araring tadav God ma i takun ra Israel dari: “Luluai, dia tar doko kaum umana propet, dia tar kal kopo kaum lavur uguugu na vartabar; ma iau kaka, iau ki varkolono ma dia tikan upi iau bula, upi ina mat.”

Ma ava God i tatike bali ia me? “A lavurua na arip na marmar na tarai, iau tar balaure vake upi kaugu, diat ba pa dia ga likun ra malmalikun i ra kau i diat tadav Baal.” Damana muka go gori bula ra ibaiba i tur vada ra pipilak na varmari. Ma gala i vuna ta ra varmari, gala vakir i vuna mulai ta ra papalum; gala pa i damana, a varmari gala vakir a varmari mulai. Ma ava muka tana? A Israel pa dia ga vatur vake nam dia ga tikan upi ia; diat ika, di ga pilak value pa diat, dia tar vatur pa ia, ma di tar vamaliu pa ra bala i diat ra ibaiba; da di ga tumu ia dari: “God i tar tul tar a tulungen na nidiop ta diat, a kiau na mata i diat upi koko diat a nana, ma ra talinga i diat upi koko diat a valavalongor, tuk tar ta go ra bung.” Ma David i biti dari:

“Boina da pait pukue kadia vuvuvung na nian upi a palai, ma ra kun,
Ma ra timul na tukatukai, ma ra balbali pire diat;
10 Boina da vabobotoi ra kiau na mata i diat, upi koko diat a nana.
Ma boina ba una likun ra tamuru i diat upi na potok vatikai.”
11 Iau titir mulai: Dave, dia ga tutukai laka upi diat a bura? Koko muka! Ma ure kadia bunura a varvalaun i tar vana rikai tadav ra lavur Tematana, upi na vangangap diat ta ra mamainga. 12 Ma go, ona ra rakarakan a gunagunan i uviana ure kadia bunura, ma ra lavur Tematana dia uviana tago di vabilua diat; na dave bar ba di vatur guve diat par mulai?

A varvalaun kai ra umana Tematana

13 Ma iau tata tadav avat, ava Tematana. Ma tago iau ra apostolo kai ra umana Tematana, iau nuk vangalangala pa kaugu tiniba ta ra papalum; 14 kan ure ta minigui na magit ina vangangal vaarike ra mamainga ta kaugu vuna tarai ma upi ina valaun ta na ta diat. 15 Ma ona di vamaram pa mule ra rakarakan a gunagunan tago di ga vue diat, ava na vana rikai ba da vatur vake mule diat? Go muka, a nilaun mulai kan ra minat. 16 Ma gala ra luaina vuai e i gomgom vurakit, gala i gomgom vurakit parika; ma gala ra okor i ra davai i gomgom vurakit, na damana ra lavur ingaingarina par bula. 17 Ma ona di tar pit bubur vue ta umana ingaingarina, ma u, a kuabar na oliva, di ga pakan guve avat varurung ma diat, ma avat, ava vatur vake varurue nam ra okorina ma ra bira i ra davai na oliva; 18 koko una vangavangala u urama ta ra lavur ingaingarina tuna; ma ona u vangavangala u urama tana, una nunure, ba vakir u, u puak ra okorina, ra okorina iat i puak u. 19 Kan una ga tatike ba: Di ga pit bubur vue ra umana ingaingarina tuna, upi da pakan tar iau tana. 20 Io, tago pa dia ga nurnur, kari di ga pit bubur vue diat, ma u tur uka ure kaum nurnur. Koko u nuk vangala pa u ure, una burut uka; 21 tago gala God pa i ga nur vue ra lavur ingaingarina tuna, gala pa na ga nur vue u bula. 22 Una gire tana ra varmari ma ra dekdek na nuknuk i God; a dekdek na nuknuk tadav diat dia ga bura; ma ra varmari kai God tadav u, ona una tur padikat ta kana varmari; ona pata, da ga kutu vue u bula. 23 Ma diat bula, ona pa dia ki vatikai ma ra tamtavun, da ga pakan tar diat mulai: tago God na pait valar pa ia upi na pakan tar diat mulai. 24 Tago ona di ga kutu pa iu ta ra davai na oliva nina i kuabar ta kana mangamangana iat, ma di ga pakan guve u ma ra bo na oliva, ma pa i da ra mangamangana kai ra kuabarina iat, na dave bar laka ure ra umana ingarina tuna? Da ga pakan guve diat muka ma ra vunapai diat iat.

A varmari kai God pire ra tarai par

25 Tago pa iau mainge ba avat a ngulngul, a tara na turagu, ure go ra magit na pidik, kan avat a malamala kabinana ta ra nuknuk i vavat vakuku, ba ta umana ta diat ra Israel dia maliu tuk tar ta nam ra bung ba ra pepeal ta diat ra umana Tematana dia ga ruk; 26 ma damana da ga valaun vapar ra Israel; da di ga tumu ia dari:

“A Tena Valaun na vana rikai tai Sion;
Na valilie vaire vue ra varpiam kan Iakob;
27 Ma go kaugu kunubu tadav diat,
Ba ina kap vue kadia lavur varpiam.”
28 Tago ure ra bo na varvai, dia ebar kan ia ure avat; ma ure ra pipilak, di mari diat ure ra umana patuana. 29 Tago God pa i nukpuku mulai ure kana vartabar ma kana varting. 30 Tago da amana ava ga piam vue God, ma gori ava tar vatur vake ra varmari ta kadia varpiam, 31 damana bula go diat dia ga varpiam, upi, ure ra varmari di vaarike tadav avat, diat bula diat a vatur vake ra varmari gori. 32 Tago God i tar vaki guve diat par upi ra varpiam, upi na mari diat par.

A pite varpa tadav God

33 Io, i ti lulur mat ra pepeal bo na magit ta ra kabinana ma ra minatoto kai God! Pa dat a nunure valar pa kana lavur varkurai, ma pa dat a tikan mur valar pa bula kana lavur mangamangana! 34 Tago to ia i ga nunure ra nuknuk i ra Luluai? Ba to ia bar kana tena varvateten? 35 Ba to ia i ga lua ma ra vartabar pirana, ma da ga bali ia mulai? 36 Tago tana iat a lavur magit par dia vuna, ma dia tur ure ma upi ia bula. Ma kana ka ra variru ba pa na mutu. Amen.

Copyright information for `KSD