Romans 15

Koko dat a nuk pa ka kada mamainga

Ma i topa dat, da tur padikat, ba dat a puak pa ra lavur binilua kadiat dia bilua, ma koko dat a nuk pa ka ra magit ba dat ika, da mainge. Boina ba dat par, tikatikai, dat a pait nam ra magit ba na vamaroro talai dat, dat a vair ia ma ra magit ba na boina tana. Tago Kristo bula pa i ga pait ra magit ba ia kaka iat i ga mainge; ma da di ga tumu ia: “Kadia tinata na varvul, di ga vul u me, i ga bura taun iau.” Tago ra lavur magit par, di ga tumu diat amana, di ga tumu diat ure kada varvair, upi ba ure ra kini vovovon ma ure ra varmaram ta ra Buk Tabu dat a vatur vake ra nurnur. Ma go, boina ba God, nina i vuna ta ra kini vovovon, ma ra varmaram, na tul tar avat ba na tikai ka ra nuknuk i vavat ure avat vargil varogop ma Kristo Iesu; Upi avat a pite pa ra God ma Tama i kada Luluai Iesu Kristo ma ra kopono nuknuk i vavat ma ra kopono ngie i vavat bula.

A bo na varvai pire ra umana Tematana

Kari avat a mal vargiliane avat, da Kristo bula i tar vatur pa avat, ure ra variru tadav God. Tago iau biti ba Kristo ia ra tultul pire diat ra pokakikil upi na arikai ra dovotina kai God, upi na vadovot muka ra lavur tinata na varvatading dia ga tatike tar diat tai ra lavur patuana, ma upi ra lavur Tematana diat a pite pa God ure kana varmari; da di ga tumu ia dari:

“Ure ke go ina pite varpa tam livuan ta ra lavur Tematana,
Ma ina kakakailai ta ra iangim.”
10 Ma i biti mulai dari:
“A umana Tematana par, avat a gugu varurung ma ra taraina.”
11 Ma i tatike mule dari:
“A umana Tematana par, avat a pite pa ra Luluai;
Ma boina ba ra lavur vuna tarai mutu diat a pite pa ia.”
12 Ma go mulai Iesaia i tatike dari:
“A okor i Iese na arikai,
Ma nina i vana rikai upi na vatur ra varkurai ure ra lavur Tematana:
A lavur Tematana diat a nurnur tana.”
13 Ma go muka, boina ba ra God i ra kini nunur na vabuka avat ma ra gugu ma ra malmal par ure ra nurnur, upi na pepeal kavava kini nunur, ta ra dekdek i ra Takodo na Tulungen!

Paulo i rurung ta kana tutumu

14 Ma iau iat, a tara na turagu, i tar ot muka ra nuknukigu ure avat, ba avat iat, ava tar buka ma ra ko na nuknuk, ma ava buka ma ra kabinana par, ma i tale avat, ba avat a pit vargiliane avat. 15 Ma iau ga papait na rurung ma kaugu tutumu tadav avat, upi ina vanuk tar ia mulai ta ra nuknuk i vavat ta go ra varmari God i ga tul tar ia tagu, 16 Upi iau a tultul kai Kristo Iesu tadav ra lavur Tematana, upi ina pait ra papalum ta ra bo na varvai kai God, pi ra tinabar na Tematana na ti kat muka, ba di vagomgom ia ma ra Takodo na Tulungen. 17 Damana kaugu ra langlang tai Iesu Kristo ta ra magit kai God. 18 Tago pa ina rurung dari, ba ina tata. ure ra lavur magit, ina vatang ika nam diat ba amir ma Kristo amir ga pait diat ma ra tinata ma ra papalum, 19 ta ra dekdek i ra lavur vakilang, ma ra lavur magit na padapada varvo, ta ra dekdek i ra Takodo na Tulungen upi ra lavur Tematana diat a torom; damana aro Ierusalem ma ta ra gunagunan i tur vurkikilane ma i tuk tar Ilirikum, iau tar varvai rit bulbulu ta ra bo na varvai kai Kristo; 20 maia pa, iau tar nuk pa ia pi koko ina ve ra bo na varvai tai ta gunan ba ra iang i Kristo i tar rararang tana, upi koko ina bili taun ta tavul a papalum kai ta ra tikai. 21 Ma, da di ga tumu ia dari:

“Diat ba pa ta varvai ure i ga vana rikai tadav diat, diat a nana,
Ma diat ba pa dia ga valavalongor, diat a matoto.”

Paulo i vaninara upi na vana uro Rom

22 Ia go i ga vake iau a do na pakana ta kaugu vinavana tadav avat; 23 ma gori, tago pa ta gunan mulai ta go ra langlangun ba ina ki pa ia, ma tago mangoro na kilala iau tar mainge tuna ba ina vana tadav avat, 24 ba ina vana Spania ina ga vana pire vavat (tago iau ki nunur upi ina gire avat ta kaugu vinavana, ma ba avat a tule kapi iau ta kaugu vinavana tana, ba i tar ot kada kini varirivut), 25 ma go, iau biti, ba ina vana uro Ierusalem, upi ina kap tabar diat ra umana tena gomgom abara. 26 Tago a Makedonia ma ra Akaia dia tar gugu upi diat a tul tar ta vartabar ure diat dia luveana pire ra umana tena gomgom aro Ierusalem. 27 A dovotina, dia tar ga tana; ma i tar topa ia muka, tago dia tar kakang pire diat. Tago ona ra lavur Tematana dia tar vatur vake ta tiniba ta kadia lavur magit na tulungen, i takodo muka ba diat a maravut diat ma ta umana magit ure ra paka i diat. 28 Ba iau tar pait ot pa go, ma iau ga vakilang tar go ra vuai na varmari ta diat, ina vana gil pire vavat ba ina vana Spania. 29 Ma iau nunure ba ina pot tadav avat, ina pot ma ra pepeal varvadoan tai Kristo.

30 Ma go iau lul vovo pa avat, a tara na turagu, ure kada Luluai Iesu Kristo, ma ure ra varmari kai ra Tulungen, pi dat a ongaongor varirivut ma ra niaring tadav God ure iau; 31 pi na valaun pa iau kan diat dia varongoi aro Iudaia, ma upi go ra papalum iau pait ia ure diat aro Ierusalem na boina ta ra mata i diat ra umana tena gomgom; 32 pi ina vana ma ra gugu tadav avat ta ra mamainga kai God, ma upi dat a ngo varurung. 33 Ma go, boina ba ra God na malmal na ki pire vavat par. Amen.

Copyright information for `KSD