Zechariah 12

Da valaun pa Ierusalem

Go ra mamat na tinata kai ra Luluai ure Israel.

A Luluai, nina i vuare ra lavur bakut, ma i vung ra vunapai ra rakarakan a gunagunan, ma i vaki ra tulungea i ra tarai, i biti dari:
Ea, Ierusalem na da ra la na tava longlong pire ra tarai par dia ki kikilane, ma ure Iuda bula, ba da tur vartakalat bat Ierusalem.

Ma ta nam ra bung Ierusalem na da ra mamat na vat pire ra tarai par; ma diat par ba diat a puak pa ia diat a vakaina mule diat me; ma ra tarai ta ra rakarakan a gunagunan diat a tut varurung ure. Ta nam ra bung, ra Luluai i biti, ina vakaian ra lavur os par, ma ra tarai dia ki ta diat diat a papaua; ma ina bobe ung ra tarai Iuda, ma ina vapula bat ra lavur os kai ra umana vuna tarai. Ma ra umana luluai Iuda diat a biti ta ra bala i diat dari: A tarai Ierusalem diat ra dekdekigu tai ra Luluai kai ra lavur kor kadia God. Ta nam ra bung ra umana luluai Iuda diat a da ra ubu i birao livuan ta ra davadavai, ma da ra birao na ul livuan ta ra umana vinvin kunai, ma diat a vaimur vue ra lavur vuna tarai ba dia ki kikil diat, ta ra papar a lima tuna ma ta ra papar a maira; ma Ierusalem na tavua mulai ta kana kiki iat. Ma ra Luluai na valaun value ra umana pal na mal kai Iuda, upi koko da pite pa ra minamar i ra kuba i David ma ra minamar kai ra tarai Ierusalem, ma Iuda pata. Ta nam ra bung ra Luluai na varubu maravut ra tarai Ierusalem; ma nina i malmalu pire diat ta nam ra bung dir a varogop ma David; ma ra apik na tarai kai David na da God iat, da ra angelo kai ra Luluai na lua ta diat.

Ma ta nam ra bung ina anan upi ina li vue ra lavur vuna tarai par nina dia vana upi diat a varubu ma Ierusalem. 10 Ma ina lolonge tar ra tulungea i ra varmari ma ra niaring ta ra apik na tarai David ma taun ra tarai Ierusalem; ma diat a bobe nina dia ga or ia, ma diat a tangie da tikai i tangie natuna, a tutana ma ra kavakake, ma diat a ki na niligur ure da tikai i ki na nilugur ure natuna, a luaina. 11 Ta nam ra bung da pait ra ngala na tinangi arama Ierusalem da ra tinangi ure Adadrimon ta ra tamataman Megido. 12 Ma ra gunan na tangi, tikatika na apik na tarai na tangi irai; a apik na tarai kai David irai, ma kadia vaden irai; a apik na tarai kai Natan irai, ma kadia vaden irai; 13 a apik na tarai Levi irai, ma kadia vaden irai; a apik na tarai Simei irai, ma kadia vaden irai; 14 a umana apik na tarai par ba dia tur valili, tikatika na apik na tarai irai, ma kadia vaden irai.

Copyright information for `KSD