Acts 25

Poolnoŋ gawana Festuswaa jaanoŋ qaa kitia jero.

Festusnoŋ gawana kolooŋ prowins uutanoŋ keuma raro weeŋ karooŋ tegoro Sisaria taoŋ mesaoŋ Jerusalem sitinoŋ uro. Uro jigo gawoŋ galeŋ waŋa ano Juuda jotamemeya yoŋonoŋ jaasewaŋanoŋ kouma Pool qaa jakeyanoŋ ambombaajoŋ jeŋ aroŋ qeŋ naŋgi. Aroŋ qeŋ nama kokaeŋ jeŋ weleŋgi, “Oo gawana, giinoŋ saanoŋ nononoŋ moniŋ sokombaatiwaajoŋ jeŋ tegona qaa aŋgi Pool wama Jerusalem sitinoŋ koi kawu.” Yoŋonoŋ wala qaa kokaeŋ somoŋgoŋ jegi, “Poolnoŋ kananoŋ karo iikanoŋ mono qeniŋ komuwaa.” Kaeŋ jeŋ jojoriŋ emboŋgitiwaajoŋ ama kaŋ kaeŋ weleŋgi. Kaeŋ weleŋgito, Festusnoŋ kokaeŋ meleema oŋono, “Pool ii Sisaria taombaa kasa mirinoŋ raro galeŋ komakeju. Nii neeno kambaŋ mende koriro iikanoŋ eleema kemambaajoŋ mojeŋ.” Kaeŋ jeŋ toroqero, “Kawaajoŋ eja iikanoŋ qinjita moŋ anagati eeŋ, saanoŋ oŋoo jotamemeurugia tosianoŋ niwo Sisaria kemeŋ kanoŋ qaa selianoŋ kuuŋ jeŋ mugi momaŋa.”

Kaeŋ jeŋ weeŋ 8 me 10 kawaa so Jerusalem sitinoŋ yoŋowo laligoro tegoro eleema Sisaria taonoŋ kemero. Kemeŋ eŋ waama iikanondeeŋ qaa jenteegowaa duŋ rarayanoŋ rama jeŋ kotoro Pool wama kagi jaayanoŋ kouma nano. Poolnoŋ kouma nano Juuda jotamemeya Jerusalem sitinoŋga kagiti, iyoŋonoŋ liligoŋ muŋ nama kazi qaganoŋ qaa bologa mamaga selianoŋ kuuŋ jegi. Ii jegito, qaagiaa hoŋa ii qendeembombaajoŋ amamaagi. Kazi qaa eeŋ jeŋ naŋgito, Poolnoŋ ii qewagoŋ kokaeŋ jero, “Niinoŋ iwoi bologa moŋ mende ambe. Juuda nonoonoŋ Kana qaa mende qotogowe. Jiwowoŋ jigo mende meŋ totowiwe ano Room Siisakimbaanoŋ qaawaajoŋ tuarenjeŋ mende ambe.”

Kaeŋ jero Festusnoŋ Juuda yoŋonoŋ iyaŋaajoŋ mogi ubaatiwaajoŋ moma Pool kokaeŋ qisiŋ muro, “Selenoŋ kuukuu qaa koi jejuti, gii saanoŋ iikawaa kitia ii Jerusalem uma kanoŋ noo jaasewananoŋ nama jewaga me qaago?”

10 Qisiŋ muroto, Poolnoŋ jero, “Room Siisakiŋnoŋ jeŋ kotoro qaa jake koi kuugita koi nambe gosiŋ noma qaana jeŋ tegona sokombaa. Nii Juuda ejemba bologa moŋ mende ama oŋombe. Ii geeŋgo saanoŋ moma yagojaŋ. Mono naambaajoŋ mombo yoŋoonoŋ kembenaga? 11 Bologa moŋ mende ambeto, Kana qaa moŋ uuguŋ iwoi moŋ ama boliŋ kawaajoŋ koomuwaa buŋa koloowenagati eeŋ, ‘Niinoŋ komumambo,’ jeŋ mende oloŋ koma kemaŋa. Ii qaagoto, yoŋonoŋ kazi qaa eeŋ toontooŋ jeŋ qaagiaa kania qendeembombaajoŋ amamaajuti eeŋ, qaa omayaajoŋ ama moŋnoŋ nuama yoŋoo boronoŋ amambaajoŋ amamaawaa. Room Siisakiŋnoŋ mono qaana mindiŋgoŋ jeŋ tegoro diŋgowaa. Kawaajoŋ niinoŋ mono iwaa jaanoŋ kemambaajoŋ kotiiŋ qisijeŋ.”

12 Kaeŋ jero Festusnoŋ jawiŋuruta yoŋowo qambaŋmambaŋ qaa moŋgama gosiŋ kokaeŋ meleema muro, “Gii Siisakimbaanoŋ kemambaajoŋ moma qisijaŋi, iikawaajoŋ mono saanoŋ Room kema iwaa jaanoŋ namba.” Kiaŋ.

Poolnoŋ kiŋ Agripawaa jaanoŋ nano.

13 Weeŋ tosaaŋa tegoro kiŋ Agripa ano naaŋa Bernaisi yoronoŋ Festus iima godagara qendeembaotiwaajoŋ Sisaria taonoŋ kari. 14 Kaŋ kanoŋ weeŋ mamaga laligori Festusnoŋ Poolwaanoŋ qaa ii kiŋ pombo amiŋ moma kokaeŋ jero, “Fiiliksnoŋ eja moŋ mende isano kapuare mirinoŋ kokanoŋ rama laligoja. 15 Niinoŋ Jerusalem kembe Juuda yoŋoo jigo gawoŋ galeŋgia waŋa ano jotamemeurugianoŋ noonoŋ kouma kokaeŋ qisiŋ noŋgi, ‘Nono eja iikawaa qaa meŋ kaniŋ giinoŋ mono saanoŋ iwaa kania gosiŋ qaaya jeŋ tegowa.’

16 “Kaeŋ qisiŋ noŋgito, niinoŋ kokaeŋ iŋijowe mogi, ‘Room gawman nonoonoŋ kana ii kokaeŋ: Mombaa selianoŋ qaa bologa kuuŋ jejuti, nono ejemba mombaa qaa ii laŋ mende jeŋ tegoŋkejoŋ. Wala horoŋ qaa jakeyanoŋ aniŋ kaziurutanoŋ kagi leelee ororoŋ aroŋ qeŋ naŋgi qaa selianoŋ kuuŋ jeŋ mugi kitia saanoŋ jewaa. Qaa kitia jero ii gosiŋ hoŋa kolooro iikawaa so saanoŋ qaaya jeŋ tegoŋkejoŋ.’ 17 Yoŋonoŋ koi kaŋ ajoroogi niinoŋ kambaŋ mende koriro eŋ waama iikanondeeŋ jenteegowaa duŋ rarayanoŋ rama jeŋ kotowe eja ii wama kagi noo jaananoŋ kouro.

18 “Kouroto, qaa meŋ kagiti, iyoŋonoŋ liligoŋ muŋ aroŋ qeŋ nama qaa selianoŋ kuuŋ jeŋ mugi. Kaeŋ aŋgi iwoi bologa totooŋ moŋ anagati, kaeŋ jewuyatiwaajoŋ mambombeto, qaa iikaaŋa moŋ mende jegi mobe. 19 Ii mende jegi mobeto, kitianoŋ eja ii qetama iyaŋgiaa momalaarigiaa qaa batuya tosaaŋa ano eja moŋ qata Jiisas iwaajoŋ aŋgowowo megi. ‘Jiisasnoŋ komuro,’ jegito, Poolnoŋ ‘Gbiliŋ laligoja,’ jeŋ kaparaŋ koma kotiiro. 20 Kaeŋ jeŋ kazi aŋgi niinoŋ ‘Qaa kaaŋa ii nomaeŋ gosiwenaga?’ jeŋ kana moŋgama uuwoi mobe. Ii moma nama kokaeŋ qisiŋ mube, ‘Selenoŋ kuukuu qaa jejuti, gii saanoŋ iikawaa kitia ii Jerusalem uma kanoŋ jenaga me qaago?’ 21 Qisiŋ mubeto, Poolnoŋ Uutananaa jaanoŋ kemambaajoŋ kaparaŋ koma kokaeŋ qisiro, ‘Mono jena galeŋ koma noŋgi Siisakimbaanoŋ kembe qaana mindiŋgoro diŋgowaa.’ Kaeŋ qisiro eja waagiawo jeŋ kotoŋ oŋombe galeŋ koŋgi raja. Era wasiŋ mube Siisa-kimbaa jaasewaŋanoŋ kembaa.”

22 Festusnoŋ kaeŋ jero Agripanoŋ ijoro, “Niida moŋ eja iikanoŋ qaaya jero momambaa siiŋa mojeŋ.” Ijoro kokaeŋ meleeno, “Woraŋgo saanoŋ qaaya mobaga.”

23 Kaeŋ meleeno eŋ waagi kantriwaa jawiŋ, kawali galeŋ somata ano jotamemeya uuta yoŋonoŋ kaŋ Agripa ano Bernaisi yoroojoŋ jura soroŋ arogaranoŋ mouma korisoro rii qama koma horoŋ oroŋgi qaawaa jake miri uuta iikawaa uutanoŋ keugi. Festusnoŋ jeŋ kotoro Pool waŋgi iikanoŋ kouro. 24 Poolnoŋ kouro Festusnoŋ waama nama kokaeŋ jero, “Kiŋ Agripa ano eja somata kuuya nonowo koi rajuti, oŋo mono eja koi iibu. Juuda ejemba tuuŋ kuuya yoŋonoŋ iwaajoŋ ama noo uuna kuugi. Sisaria taoŋ kokanoŋ ano Jerusalem sitinoŋ oŋanoŋ qaanoŋ kuuŋ noma qa gigilaaŋ kokaeŋ jeŋ laligogi, ‘Eja koi kanoŋ mono balonoŋ laligowaatiwaa so qaago. Mono yamageŋ!’

25 “Kaeŋ qama laligogito, niinoŋ gosiwe iwoi moŋ koomuwaa buŋa koloowaatiwaa so ii mende ano. Niinoŋ kania kaeŋ mokolooŋ iibeto, aŋo Room Uutananaa jaanoŋ keno qaaya mindiŋgoro diŋgowaatiwaajoŋ kaparaŋ koma qisiro. Kawaajoŋ qaa somoŋgoŋ wasiwe Room kembaa. 26 Room sitinoŋ kembaato, iwaanoŋ qaa ii nomaeŋ ooŋ Room eja Poŋnaajoŋ ambe kenaga? Iwaajoŋ qaa laŋ jejuto, qaa kaniawo moŋ ii tororo mende moma asarijeŋ. Kawaajoŋ jewe wama kaŋ kiŋ Agripa goo jaaganoŋ ano oŋo tosaaŋa kiŋ pombaa gematanoŋ koi rajuti, oŋoo jaasewaŋgianoŋ aŋgi nanja. Oŋo saanoŋ borojaŋ meŋ qaaya gosigi hoŋa kolooro mono ii moma saanoŋ terenoŋ oowenaga. 27 Eja moŋ kasanoŋ somoŋgoŋ qaa jakeyanoŋ oombombaa qaaya nomaeŋ jejuti, ii asuganoŋ jewombaajoŋ amamaaŋ kileŋ eeŋ wasiwombo. Sili ii noo momonoŋ gejajojombaŋ tani kaaŋa kolooja.” Kiaŋ.

Copyright information for `KSR