a12.1:Apo 7.2-3, Hib 11.8
b12.3:Gal 3.8
c12.7:Apo 7.5, Gal 3.16

Genesis 12

Anutunoŋ Abram oono.

a  Poŋnoŋ Abram kokaeŋ ijoro: “Gii gomaŋga, kanatuuruga ano maŋgaanoŋ miri iwoi mesaoŋ baloŋ qendeema gomaŋati, mono iikanoŋ kemba. Niinoŋ kolooŋ seisei gombe gbiliuruganoŋ kanageso somata koloowuya. Niinoŋ kotuegoŋ naŋgoŋ gombe qabuŋaganoŋ somariiŋ somata koloowaa. Kaeŋ kolooro Anutu niinoŋ goojoŋ ama kanageso tosaaŋa kotuegoŋ oŋoma laligowaa. b  Daeŋ yoŋonoŋ gii kotuegoŋ gombuti, niinoŋ mono ii kotuegoŋ oŋoma laligomaŋa. Daeŋ yoŋonoŋ gii jeŋ qasuaaŋ gombuti, niinoŋ mono ii kaaŋagadeeŋ jeŋ qasuaaŋ oŋoma laligomaŋa. Goojoŋ ama noo kotumotuenanoŋ mono namowaa kanageso tuuŋ kuuya yoŋoo qagianoŋ uro oyaŋboyaŋ mokoloowuya.”

Kaeŋ ijoro Abramnoŋ Poŋnoŋ jerotiwaa so Haran gomaŋ mesaoŋ keno Lootnoŋ iwo keni. Abramnoŋ yambuya 75 kolooro kanoŋ Haran gomaŋ mesaoŋ keno. Kemaŋ jeŋ embia Saarai, beeta Loot, esuhinaya kuuya meŋ kululuugi seiroti ano weleŋqeqe ejemba Haran gomanoŋ laligoŋ oŋoŋgiti, ii uŋuama gomaŋgia mesaoŋ Keinan balonoŋ kembombaajoŋ kema kema iikanoŋ keugi.

Abramnoŋ baloŋ kanoŋ kema laligoŋ gomaŋ qata Sekem kanoŋ kouma jujuu gere somata qata More kawaa kosianoŋ kuuŋ meŋ raro. Kambaŋ kanoŋ Keinan ejemba yoŋonoŋ baloŋ iikanoŋ laligogi. c  Kaeŋ laligogi Poŋnoŋ Abram asugiŋ muŋ kokaeŋ ijoro: “Baloŋ koi ii mono goo gbiliuruga buŋa qeŋ oŋomaŋa.” Kaeŋ ijoro Abramnoŋ Poŋ iwaanoŋ asugiroti, iwaajoŋ siimoloŋ ooŋoombaa alata moŋ mero.

Iikanoŋadeeŋ mesaoŋ toroqeŋ Beetel gomambaa weeŋ koukoutanoŋ baageŋ baloŋ baaŋawo kanoŋ kema opo sel kuuŋa mororoŋgoŋ mero nano. Kaeŋ nano Beetel gomaŋ kanoŋ weeŋ kemekemetanoŋ baageŋ raro Ai taoŋnoŋ weeŋ koukoutanoŋ baageŋ raro. Kaeŋ rari batugaranoŋ nama Pombaa siimoloŋ alata moŋ iikanoŋ meŋ Pombaa qata qama kooliŋ muro. Kawaa gematanoŋ baloŋ ii mesaoŋ toroqeŋ Saut waageŋ kema distrik qata Negew kanoŋ rama laligogi. Kiaŋ.

Abramnoŋ Iijipt kantrinoŋ kema laligoro.

10 Kambaŋ kanoŋ Keinan balonoŋ bodi kolooro. Bodi iikanoŋ kotiiŋ biŋawo kolooro Abramnoŋ Iijipt kantrinoŋ tawayagadeeŋ laligowombaajoŋ keŋgi. 11 Kananoŋ kema Iijipt dodowigi Abramnoŋ embia Saarai qaa kokaeŋ ijoro: “Moba, giinoŋ emba iimasiiŋsiiŋgawo koloojaŋi, ii mojeŋ. 12 Kawaajoŋ Iijipt eja yoŋonoŋ gii giima kokaeŋ jewuya: ‘Koi iwaa embiaga.’ Kaeŋ jeŋ nii nugi komumaŋato, gii giima koboogi laligowaga. 13  d  Kawaajoŋ gii mono kokaeŋ jewa: ‘Nii iwaa naaŋaga.’ Kaeŋ jenago goojoŋ ama awaagadeeŋ ama noma noo laaligona gou gajona koŋgi laligomaŋa.”

14 Abramnoŋ Iijipt keuro Iijipt ejemba yoŋonoŋ Saarai iigi emba iima-aiŋaiŋawo awaa soro kolooro. 15 Iikanondeeŋ Faarao kiŋ pombaa poŋ qereweŋa jawiŋuruta yoŋonoŋ ii iigitiwaajoŋ Faarao kimbaanoŋ kema Saaraiwaa selia mepeseegi moro. Ii moma jero Saarai wama kiŋ pombaa jiŋkaroŋ miri uutanoŋ ugi. 16 Ugi Faarao kiŋnoŋ Saaraiwaajoŋ ama Abram awaagadeeŋ ama muro. Kaeŋ ama muro iwoi koi kaaŋa ii Abrambaa buŋa kolooro: lama, bulmakao, doŋgi ejia ano embia, weleŋqeqe eja ano emba ano kamel jaasooŋgoya ii Abram muro buŋa qeŋ aoro.

17 Ii buŋa qeŋ aoroto, Poŋnoŋ Abrambaa embia Saarainoŋ Faarao kimbaa mirinoŋ laligorotiwaajoŋ ama jero ji bologa kotiganoŋ Faarao kiŋ ano ejemba iwaa jiŋkaroŋ mirinoŋ laligogiti, iyoŋoo qagianoŋ uro. 18 Kaeŋ uro Faarao kiŋnoŋ Abram koma hororo karo kokaeŋ qisiŋ muro: “Gii mono naa terega ama nona? Naambaajoŋ ‘Ii embanaga,’ kaeŋ mende jena mobe? 19 Naambaajoŋ ‘Ii noo naanaga,’ jena? Kaeŋ jena niinoŋ ii embanaga kolootiwaajoŋ oombe? Embaga koi. Mono ii wama kembao.”

20 Kaeŋ jeŋ ejauruta jeŋ kotoŋ oŋono Abram wama kananoŋ kema oŋooŋgi embia ano ilawoilaya kuuya eŋ muroti, ii meŋ uŋuama keŋgi. Kiaŋ.

Copyright information for `KSR