Genesis 25

Aabrahambaa esa ambouruta tosaaŋa

1 Hist 1.32-33

Aisaknoŋ emba mero maŋa Aabrahamnoŋ embia moŋ qata Ketura mero. Mero Keturanoŋ Aabrahambaa merauruta kokaeŋ oŋono: Zimran, Joksan, Medan, Midian, Isbak ano Suua. Joksanoŋ merawoita qagara Seba ano Dedan yoroo maŋgaraga kolooro. Dedan iinoŋ Asur kanageso, Letus kanageso ano Leum kanageso yoŋoo beŋisigiaga kolooro. Midiambaa merauruta ii Efa, Efer, Hanok, Abida ano Elda. Ii kuuya Keturawaa esauruta kolooŋ laligogi. Kiaŋ.

Aabrahamnoŋ esuhinaya kuuya ii meria Aisak buŋa qeŋ muro. Ii muroto, embauruta waŋgia mende memeta yoŋoo meraurugia yoŋoojoŋ kaleŋ iwoi jaŋ qeŋ mendeema oŋono. Mendeema oŋoma jaawo laligoŋ wasiŋ oŋono dagia Aisak mesaoŋ baloŋ moŋ weeŋ koukoutanoŋ baageŋ kanoŋ keŋgi. Kiaŋ.

Aabrahamnoŋ komuro roŋ koŋgi.

Aabrahamnoŋ laligoŋ kouro mindimindiri yambuya 175 kolooro komuro. Laaligo yambuyaa jaŋgoyanoŋ uuta kolooŋ sokono waziiŋ eja waŋa kolooŋ sewaŋ aasoŋ konoga horoŋ goroŋ qeŋ komuro Anutunoŋ wano tinitosauruta komugiti, iyoŋoonoŋ kema toroqero. Komuro merawoita Aisak ano Ismael yoronoŋ maŋgaraa qamoya meŋ kema Makpela kobaanoŋ roŋ koni. Kobaa ii Hit eja Efron Zoharwaa meria iwaa baloŋ korianoŋ Mamre gomaŋ mirinoŋa weeŋ koukoutanoŋ baageŋ eja. 10  a  Aabrahamnoŋ baloŋ koria ii Hit kanageso yoŋoonoŋga sewaŋa meroti, iikanoŋ ii ano embia Saara ii roŋ koma oroŋgi. 11 Aabrahamnoŋ komuro Anutunoŋ meria Aisak kotuegoŋ muŋ laligoro. Iinoŋ Negew balonoŋ apu roŋ qata Ber Lahai Roi (Laaligoyawo laligoŋ niimakejiwaa apu roŋa) iikawaa kosianoŋ rama laligoro. Kiaŋ.

Ismaelwaa kanagesouruta

1 Hist 1.28-31

12 Iijipt emba Haagar iinoŋ Saarawaa weleŋ embia laligoro Aabrahamnoŋ mero koro ama meria Ismael mero. Ismaelwaa merauruta yoŋoo qa areŋgia kokaeŋ: 13 Ismaelwaa merauruta yoŋoo qagia ano koloogitiwaa areŋgia ii kokaeŋ: Meria mutuya qata Nebaiot. Iwaa gematanoŋ Kedar, Adbel, Mibsam, 14 toroqeŋ Misma, Duma ano Masa, 15 Hadad, Tema, Jetur, Nafis ano Kedema. 16 Ismaelwaa meraurutanoŋ kaeŋ kolooŋ asa tuuŋgia 12 kolooŋ laligoŋ kougi. Asa qagia qagiti, iikawaa so opo kuuŋ tambogia ano jigo mirigia kaaŋagadeeŋ qama meŋ laligoŋ kougi.

17 Ismaelnoŋ laligoŋ kouro yambuya mindiriŋ 137 kolooro komuro. Kaeŋ eja waŋa kolooŋ sewaŋ aasoŋ konoga horoŋ goroŋ qeŋ komuro Anutunoŋ wano tinitosauruta komugiti, iyoŋoonoŋ kema toroqero. 18 Ismaelwaa gbiliuruta yoŋonoŋ koriganoŋ koriganoŋ deema kema laligoŋ baloŋ qagara Hawila ano Suur yoroo batugaranoŋ gomaŋ meŋ laligogi. Gomaŋgia ii Iijipt kantriwaa jawoyanoŋga kanaiŋ weeŋ koukoutanoŋ Assiria waageŋ keŋgiti, kana iikawaa kosianoŋ kanoŋ eja. Ismaelwaa gbiliuruta yoŋonoŋ Aabrahambaa gbiliuruta tosaaŋa kuuya ii kerekere ama oŋoma laligogi. Kiaŋ.

Iisoo ano Jeikob yoronoŋ koloori.

19 Aabrahambaa meria Aisak iwaa gbiliuruta yoŋoo qa areŋgia ii kokaeŋ: Aabrahambaa meria Aisak. 20 Aisaknoŋ yambuya 40 kolooro Mesopotemia (Padan Aram) kantrinoŋa Aram eja qata Betuelwaa borata Rebeka embia mero. Rebekawaa naaŋa ii Aram eja qata Laban. 21 Aisakwaa embianoŋ aruŋa laligorotiwaajoŋ ama Poŋ qama kooliŋ muro. Qama kooliŋ muro qamakoolia moro Rebekanoŋ koro ano. 22 Koro ano merawoi yoronoŋ nemuŋgaraa goroŋ uutanoŋ utama aori. Ii moma kokaeŋ jero: “Iwoi koi kaaŋa ii mono naambaajoŋ asugiŋ nonja?” Kaeŋ jeŋ kema iikawaajoŋ Poŋ qisiŋ muro.

23  b  Qisiŋ muro kokaeŋ ijoro:

“Goo goroŋ uuganoŋ tuuŋ woi yoŋoo beŋisigiaga ejao.
Iyoroonoŋga kanageso woi asugiŋ deema laligowuya.
Ejemba tuuŋ moŋnoŋ tuuŋ alia uŋuuguŋ ku-usuŋgia kotakota koloowuya.
Datanoŋ koga weleŋ qeŋ muŋ laligowaa.”
24 Mera meme kambaŋanoŋ kaŋ kuuro goroŋ uutanoŋ mera sunesune woi eri. 25 Wala goroŋanoŋga asugiroti, iwaa selianoŋ jejegbili kolooro sele juyanoŋ selia kuuya sokoma ero. Kawaajoŋ qata Iisoo (juyawo) qagi. 26 Iwaa kanianoŋ koganoŋ Iisoowaa kana gbakoyanoŋ borianoŋ meŋ asugiro. Kawaajoŋ iwaa qata Jeikob qagi. (Jeikob qaa kawaa kania woi: gbako ano tiligoja.) Aisaknoŋ yambuya 60 kolooro kambaŋ kanoŋ Rebekanoŋ merawoita woi ii orono. Kiaŋ.

Iisoonoŋ borosamo mewaatiwaa qabuŋaya qewagoro.

27 Mera woi iyoronoŋ asugiŋ somariiri Iisoonoŋ borojaŋ gawombaa kania tororo moma yagoŋ pondaŋ jolonoŋ laligomambaajoŋ moroto, koganoŋ eja bonjoŋa kolooŋ kaparaŋ koma mirinoŋ laligoro. 28 Aisaknoŋ duuyaa oroya nemambaa moma laligoro. Kawaajoŋ uutanoŋ Iisoo mamaga jopagoŋ muŋ laligoroto, Rebekanoŋ uu womboyanoŋ Jeikob mamaga jopagoŋ muŋ laligoro.

29 Kambaŋ moŋnoŋ Jeikobnoŋ koziŋ meŋ iyaŋaajoŋ nene qaaŋ ooŋ raro datanoŋ jolonoŋga kaŋ selia bimooro wosoya mamaga kiro. 30 Kaeŋ kiro Jeikob kokaeŋ ijoro: “Selena bimooro wosona mamaga nijiwaajoŋ mono uulaŋawo koziŋ qaaŋa nejoŋgbala ii nona nemaŋa.” Kawaajoŋ qata Edom (nejoŋgbala) qagi.

31 Kaeŋ ijoro Jeikobnoŋ jero: “Dana, gii wala asuginagi, qabuŋaga ii mono wala togoŋ nona nene qaaŋ ii saanoŋ gombe newa.”
Mutu mera ii waŋgia: Wala kolooroti, iinoŋ kouruta yoŋoo batugianoŋ waŋgia kolooro goda qeŋ qabuŋa muŋ kaleŋa kaleŋa muŋ laligogi. Nemuŋ maŋgianoŋ komuri buŋagara mendeeŋgiti, kambaŋ iikanoŋ wala koloorotiwaa borosamoya ii somaŋa woi toroqeŋ mugi.


32 Kaeŋ jero qaa kokaeŋ meleema muro: “Kona moba, nii komumambaajoŋ anjeŋ. Kawaajoŋ wala asugiwetiwaa qabuŋananoŋ mono nomaeŋ ilaaŋ nonaga?”

33  d  Kaeŋ meleema muro kokaeŋ ijoro: “Iikawaa qaaya ii mono wala jojopaŋ qaanoŋ jeŋ kotiina momaŋa.” Kaeŋ ijoro ii jojopaŋ qaanoŋ jeŋ kotiiŋ muŋ wala asugirotiwaa qabuŋaya ii Jeikob togoŋ muro nenenoŋ sewaŋa mero. 34 Sewaŋa meŋ bered ano koziŋ qaaŋa Iisoo muro neŋ waama nama mesaoŋ keno. Iisoonoŋ wala asugirotiwaa qabuŋaya ii iikawaajoŋ moro kamakamaata kolooro. Kiaŋ.

Copyright information for `KSR