Genesis 28

Kaeŋ jero Aisaknoŋ Jeikob koma hororo karo kotuegoŋ kokaeŋ jeŋ kotoŋ muro: “Merana, gii Keinan yoŋoo naamboragia yoŋoonoŋga moŋ embaga mende mewa. Kaeŋ qaagoto, mono waama Mesopotemia (Padan Aram) balonoŋ kema nemuŋgaa maŋa Betuelwaa mirinoŋ keuma owaga Labambaa borauruta yoŋoonoŋga moŋ embaga mewa. Embaga mena Anutu, ku-usuŋ kuuyaa Toyanoŋ mono gii kotuegoŋ kolooŋseisei gono gbiliuruga yoŋoo jaŋgogianoŋ seiro kanageso tuuŋ mamaga yoŋoo maŋ beŋgiaga koloowa. a  Anutunoŋ mono gii ano gbiliuruga oŋo Aabrahambaa kotumotueya ii toroqeŋ oŋombaa. Kaaŋagadeeŋ baloŋ asaga Aabraham muro giinoŋ iikanoŋ waba kolooŋ laligojaŋi, ii buŋa qeŋ aowaga.”

Kaeŋ jeŋ Jeikob wasiro mesaoŋ Mesopotemia (Padan Aram) balonoŋ Labambaanoŋ kemambaajoŋ keno. Laban ii Aram eja Betuelwaa meriaga, Jeikob ano Iisoo yoroo nemuŋgara Rebekawaa naaŋaga. Kiaŋ.

Iisoonoŋ ala-ala emba moŋ mero.

Aisaknoŋ Jeikob kotuegoŋ muŋ embia mewiwaajoŋ Mesopotemia balonoŋ wasiroti, ii Iisoonoŋ moro. Kotuegoŋ muŋ kokaeŋ jeŋ kotoŋ muro: “Gii Keinan yoŋoo naamboragia yoŋoonoŋga moŋ embaga mende mewa.”

Kaeŋ jeŋ kotoro nemuŋmaŋa yoroo qaa jegara teŋ koma mesaoŋ Mesopotemia (Padan Aram) balonoŋ kenoti, Iisoonoŋ ii kaaŋagadeeŋ moro. Ii moma maŋa Aisaknoŋ Keinan emba togoŋ moma boliŋ aoŋ laligoroti, Iisoonoŋ ii iima moma kotoro. Ii moma kotoŋ maŋaa jaanoŋ sokombaatiwaajoŋ asia Aabrahambaa meria Ismaelnoŋ komuro iwaa mirinoŋ kema borata Malahat, Nebaiotwaa naaŋa ii mero embauruta karooŋ koloogi. Kiaŋ.

Jeikobnoŋ Siwewaa doya gaonoŋ iiro.

10 Jeikobnoŋ Beerseba gomaŋ mesaoŋ Haran gomanoŋ kemambaajoŋ keno. 11 Kema laligoŋ baloŋ moŋnoŋ keuma weeŋ jaaya kemerotiwaajoŋ ama iikanoŋ jamo ragiti, iikanoŋa moŋ meŋ waŋ qemboŋa qeŋ gomantiiŋanoŋ gaoŋ ero. 12  b  Gaoŋ eŋ iikanoŋ gaoŋ kuku moŋ kokaeŋ iiro: Do mombaa kitia namonoŋ kuugi kema qaga ii Siwenoŋ uma kuuŋ nano Anutuwaa gajobauruta yoŋonoŋ iikanoŋ riiŋ uma kamaaŋ aŋgi.

13  c  Kaeŋ aŋgi Poŋnoŋ iwaa kosianoŋ nama qaa kokaeŋ ijoro: “Niinoŋ Poŋ, asaga Aabrahambaa Anutuya ano maŋga Aisakwaa Anutuya koloojeŋ. Baloŋ koi ejaŋi, niinoŋ ii gii ano goo gbiliuruga oŋoo buŋaga qeŋ oŋomaŋa. 14  d  Goo gbiliuruga yoŋonoŋ kolooŋ seisei aŋgi jaŋgogianoŋ namowaa sububuŋ kaaŋa koloowaa. Kaeŋ kolooro juma deema baloŋ weeŋ koukoutanoŋ ano kemekemetanoŋ, Saut ano Noot lee lee, eu ano emu iikanoŋ baageŋ sokoma kema laligowu. Goojoŋ ama goo gbiliuruga yoŋoonoŋga mombaajoŋ ama noo kotumotuenanoŋ mono namowaa kanageso tuuŋ kuuya yoŋoo qagianoŋ uro oyaŋboyaŋ mokoloowuya. 15 Moba, niinoŋ giwo laligoŋ daeŋ daeŋ kema kaŋ laligowagati, iikawaa so mono sopa somoŋgoŋ goma laligoŋ uma guambe baloŋ kokanoŋ mombo eleema kawaga. Niinoŋ gii mende gomesaoŋ qaa jeŋ somoŋgoŋ gombeti, iikawaa so ambe hoŋa koloodaborowaa.”

16 Kaeŋ ijoro Jeikobnoŋ gaoŋ uutanoŋga uuta tooro moma waama kokaeŋ jero: “Poŋnoŋ mono oŋanoŋ baloŋ koi kanoŋ laligojato, niinoŋ ii wala mende mojeŋa.” 17 Kaeŋ jero jeneŋa ororo qaa kokaeŋ jero: “Baloŋ koi mono kowoga ano keemomoyawo kolooja. Koi kanoŋ mono oŋanoŋ Anutuwaanoŋ duŋ raraya ano Siwewaa naguya kolooja.”

18 Kaeŋ jeŋ gomaŋ ano umugawodeeŋ waama jamo qemboŋa qeŋ eroti, ii meŋ waama jawo tooŋ osoŋ kuuŋ qaganoŋ kele apuya maama moriro. 19 Moriŋ gomaŋ iikawaa qata Betel (Anutuwaa miri) qaro. Wala taoŋ iikawaa qata ii Luz qama laligogi. 20 Jeikobnoŋ baloŋ iikawaa qata doŋgoga Betel qama qaa kokaeŋ jeŋ somoŋgoŋ jojopaŋ qaanoŋ jeŋ kotiiro: “Oo Anutu, giinoŋ niwo laligoŋ kana koi kemaŋati, iikanoŋ nii galeŋ koma noma nembanenena ano selenaa esuya mokolooŋ nona 21 saanoŋ luae qaganoŋ maŋnaa mirinoŋ mombo eleema kamaŋati eeŋ, niinoŋ mono goo uuaiŋga teŋ koma laligowe giinoŋ noo Poŋ Anutuna kolooŋ laligowa.

22 Jamo koi meŋ waama jawo tooŋ osoŋ kuujeŋi, iikanoŋ mono goo duŋ raraga ero iwoi kuuya togoŋ noma laligowagi, niinoŋ ii oŋanoŋ mendeembe tuuŋ 10 koloogi iikanoŋa motomotooŋ meŋ leuŋ goma laligomaŋa.” Kiaŋ.

Copyright information for `KSR