Genesis 35

Jeikobnoŋ Betel keno Anutunoŋ kotuegoŋ muro.

a  Anutunoŋ Jeikob qaa kokaeŋ ijoro: “Gii mono waama Betel gomanoŋ kema rara dunduŋga mokolooŋ kanoŋ Anutuwaajoŋ siimoloŋ alata moŋ mewa. Daga Iisoowaajoŋ oloŋ koma kena Anutunoŋ kambaŋ iikanoŋ asugiŋ gonoti, mono iwaajoŋ alata ii mewa.”

Kaeŋ ijoro Jeikobnoŋ sumaŋa ano ejemba kuuya iwo laligogiti, ii kokaeŋ jeŋ kotoŋ oŋono: “Beŋ doŋlopioŋ iwoi towoya batugianoŋ ejuti, ii mono qetegoŋ giligi keno koma konjoratiŋ meŋ aoŋ selegia soŋgbama opo malekugia utegowu. Nii koŋajiliŋ uutanoŋ laligoŋ Anutu qama kooliwe meleema nono ano daeŋ daeŋ kema kaŋ laligoweti, iinoŋ iikanoŋ niwo laligoŋ kouro. Kawaajoŋ oŋo mono kagi Betel gomanoŋ kemboŋa. Nii iikanoŋ Anutuwaajoŋ siimoloŋ alata moŋ memaŋa.” Kaeŋ jeŋ kotoŋ oŋono borogianoŋ doŋlopioŋ iwoi towoya kuuya egiti ano gejagianoŋ maŋgu sulugiti, ii qetegoŋ kololooŋ Jeikob mugi. Mugi kema jujuu gere moŋ Sekem gomanoŋ nanoti, iikawaa kanianoŋ namonoŋ osoŋ roŋ kono.

Kaeŋ ama waama keŋgi taoŋa taoŋa liligoŋ ragiti, Anutunoŋ kanatuurugia iyoŋoo uugia kuuro sombugia kanjaŋawo moma eleŋgia kamaaro Jeikob ano merauruta ii mende oŋotaagi. Kaeŋ kema laligoŋ Jeikobnoŋ ano kanatuuruya kuuya iwo laligogiti, ii uŋuama Luz gomanoŋ keugi. Luz qata moŋ Betel ii Keinan balonoŋ eja. Kanoŋ keuma Jeikobnoŋ siimoloŋ alata moŋ mero. Dataajoŋ oloŋ koma kenoti, kambaŋ iikanoŋ Anutunoŋ baloŋ iikanoŋ asugiŋ muro. Kawaajoŋ Jeikobnoŋ gomaŋ miri iikawaa qata El Betel qaro. (El Betel = Betelwaa Beŋa) Betel kanoŋ laligogi Rebekawaa weleŋ embia Debora ii komuro. Komuro Betel gomaŋ baatanoŋ jujuu gere mombaa kanianoŋ roŋ koŋgi. Jiŋgeŋ qama saagitiwaajoŋ ama jujuu gere iikawaa qata ‘Jiŋgeŋ saawaa jujuu’ kaeŋ qagi.

Jeikobnoŋ Mesopotemia (Padan Aram) balonoŋa eleema karo Anutunoŋ mombo asugiŋ muŋ kotuegoŋ muro. 10  b  Kotuegoŋ muŋ kokaeŋ jero moro: “Goo qaga Jeikob (tiliqili eja) qamakejuto, iikaaŋa toroqeŋ mende qama laligowu. Kete kanaiŋ uma qaga mono Israel ewaa.” Poŋnoŋ kaeŋ jeŋ qata Israel qaro. (Israel = Anutuwo aoŋ orori.)

11  c  Qata kaeŋ qama toroqeŋ Jeikob kokaeŋ ijoro: “Nii Anutu ku-usuŋ kuuyaa Toya koloojeŋ. Gii saanoŋ kolooŋ seisei ana gbiliuruga yoŋoo jaŋgogianoŋ somariiŋ ubaa. Goonoŋga kanatuuru mamaga kolooŋ kanageso tuuŋa tuuŋa asugiwu. Gii kiŋa kiŋa yoŋoo bemunjalegiaga koloowaga. 12 Niinoŋ baloŋ Aabraham ano Aisak buŋa qeŋ orombeti, ii mono goo buŋa qemaŋa ano goo gemaganoŋ gbiliuruga yoŋoo buŋagia kaaŋagadeeŋ koloowaatiwaajoŋ ii qemaŋa.”

13 Anutunoŋ qaa kaeŋ ijoŋ Jeikob mesaoŋ gomaŋ miri iikanoŋa kanakeewaŋ uro. 14  d  Anutunoŋ qaaya ijoro moroti, Jeikobnoŋ baloŋ iikanoŋ jamo moŋ meŋ waama tooŋ kuuŋ ii wain ooyanoŋ mamatewooya meŋ moriŋ iikawaa qaganoŋ oil gerewaa kelega maaro kemero. 15 Anutunoŋ qaa ijoroti, Jeikobnoŋ gomaŋ miri iikawaa qata Betel (Anutuwaa miri) qaro. Kiaŋ.

Reizelnoŋ komuro.

16 Kawaa gematanoŋ Jeikobnoŋ sumaŋuruta uŋuama Betel gomaŋ mesaoŋ kema laligoŋ Efrata gomaŋ dodowigi Reizelnoŋ mera meme kambaŋanoŋ kaŋ kuuro masu jekania booroŋgia qero. 17 Masu qenjeŋ-mamjeŋawo somata qeroti, kambaŋ iikanoŋ koipu embanoŋ qaa kokaeŋ jero moro: “Oo Reizel, toroko mende moba. Gii mono kambaŋ kokaamba kaaŋagadeeŋ mera ejaga moŋ mombo mewaga.”

18 Kaeŋ jero mera meŋ komumambaajoŋ ama tomoya meŋ kuuro eŋ qata iikawaajoŋ Benoni qaro. (Benoni = siimbobolonaa merana) Kaeŋ qaroto, maŋanoŋ qata Benjamin qaro. (Benjamin = Simbawoŋ merana)

19 Reizelnoŋ kaeŋ komuro Efrata kana goraayanoŋ Betlehem kanoŋ roŋ koŋgi. 20 Roŋ koŋgi Jeikobnoŋ tooŋ jamo moŋ meŋ Reizelwaa qasirinoŋ kuuro. Reizelwaanoŋ tooŋ jamo ii kambaŋ kokaamba kaaŋagadeeŋ toroqeŋ nanja.

21 Kaeŋ kolooro Israelnoŋ gomaŋ ii mesaoŋ toroqeŋ kema laligoŋ Eder miri
Eder: = lama tuumbaa jaagaleŋ meme miri koriga
korigaa teegeŋ keuma opo sel kuuŋa iikanoŋ mororoŋgoŋ kuuro. Kiaŋ.
22 Jeikobwaa sumaŋuruta yoŋonoŋ baloŋ iikanoŋ rama laligoŋ mutu meria Ruuben iinoŋ maŋaa embia sewaŋa mende memeta Bilha iwaanoŋ kema motooŋ eri maŋa Israelnoŋ iikawaa buzuya moro. f 

Jeikobwaa merauruta

1 Hist 2.1-2

23 Jeikobwaa merauruta 12 ii kokaeŋ: Leawaa merauruta Ruuben ii Jeikobwaa meria mutuya. Iwaa gematanoŋ Simeon, Liwai, Juuda, Isakar ano Sebulun. 24 Reizelwaa merawoita qagara Joosef ano Benjamin. 25 Bilha Reizelwaa weleŋ embawaa merawoita ii Dan ano Naftali. 26 Zilpa Leawaa weleŋ embawaa merawoita ii Gad ano Aser. Jeikobwaa merauruta kaaŋa ii Mesopotemia (Padan Aram) balonoŋ koloogi. Kiaŋ.

Aisaknoŋ komuro.

27  g  Jeikobnoŋ kema laligoŋ Kiriat Arba (qata moŋ Hebron) kawaa kosianoŋ Mamre gomanoŋ maŋa Aisakwaanoŋ keuro. Asia Aabraham ano maŋa Aisak yoronoŋ wala baloŋ iikanoŋ waba kolooŋ laligori. 28 Maŋa Aisakwaa laaligo kambaŋa ii yambu 180 kolooro komuro. 29 Eja waŋa kolooro yambuyanoŋ momogoro goroŋ qeŋ komuŋ ambosakoŋuruta yoŋoonoŋ toroqero. Merawoita Iisoo (Eesau) ano Jeikob yoronoŋ qamoya ii roŋ koni. Kiaŋ.

Copyright information for `KSR