Jonah 2

Joonanoŋ gajugaju korojoŋanoŋ eŋ qama kooliro.

Joonanoŋ sara uutanoŋ eŋ Poŋ Anutuya qama kooliŋ muŋ kokaeŋ ijoro:

“Oo Poŋ, nii kokojinjiŋ uutanoŋ qama kooliŋ gombe
gii qaana moma leeya meleemba.
Nii koomuwaa senjoŋ dusiitanoŋ eŋ komuŋ tagoŋ welema gombe
gii geja ama jejewelenwelena mojaŋ.
Gii monago kowe biiwi jabiriŋanoŋ (jauŋanoŋ) hagoŋ noŋgi kamaaŋ ejeŋ.
Geeŋgo riiwagoŋ nona gomaŋ siŋsiŋgoyaa dutanoŋ kamaabe
gboulu somatanoŋ esuuŋ nonja.
Goo apu kokopa kuuya ii musuluŋgoŋ nonja.
Goo kowe siriga ii turuŋ neŋ olaaŋ nonja.
Nii kokaeŋ romoŋgojeŋ: Gii geeŋgaa jaasewaŋganoŋa
konjoma nona sooŋ tintuaŋ ejeŋ.
Ii kileŋ nii mombo jaananoŋ goo jiwowoŋ jigo kowogaageŋ
uuwe keno jejeromoŋromoŋ anjeŋ.
Apu ano omanjareya ii qananoŋ uma turuŋ nondaboroja.
Kowe biiwi jauŋagadeeŋ liligoŋ nondaboroja.
Kowewaa tokoleya ii jamojuju kaaŋa waŋna momosiiŋ esuuja.
Nii kowe biiwi jauŋaa dusiitanoŋ koi kanoŋ uluŋgoŋ kamaajeŋ.
Kowe biiwi jauŋaa jaa unuŋa ii koŋgi
pondaŋ qananoŋ eu somoŋgoŋ nonja.
Oo Poŋ Anutuna, nii koi laligojento,
gii mono koomuwaa senjoŋ dusiita
koi kanoŋa gou koma nona
saanoŋ mombo laaligonoŋ koumaŋ.

“Noo laaligonanoŋ qaomambaajoŋ ano kambaŋ koi kanoŋ
oo Poŋ, nii romoŋgoŋ gombe qamakoolinanoŋ keuma
goo Siwe jigo kowoganoŋ eu uma gejaganoŋ kemebaati, ii mojeŋ.

“Ejemba gadokopa beŋ lopioŋ omaya goda qeŋ usugoŋ oŋomakejuti,
iyoŋonoŋ kaeŋ ama kaleŋmoriaŋ Toya gii gema guŋkejuto,
nii mono mepemepesee ooŋsaa qama
mamatewoo ama siimoloŋ ooŋ gomambaajoŋ mojeŋ.
Nii iwoi amambaa qaa jeŋ somoŋgobeti,
iikawaa so mono ama sorogoŋkemaŋa.
Oo Poŋ, gii gou koŋkoŋ Tona koloojaŋ. Qaa ii oŋanoŋ.”
10 Kaeŋ qama kooliro Poŋnoŋ sara ii jeŋ kotoŋ muro
kaŋ kouma Joona lono namo toboganoŋ kamaaro. Kiaŋ.
Copyright information for `KSR