Jonah 3

Joonanoŋ Anutuwaa gawoŋ Niiniwe kema mero.

Namo toboganoŋ kamaaro Pombaanoŋ qaa koi ii mombo Joonawaanoŋ kolooro: “Giinoŋ mono waama siti somata Niiniwe kanoŋ kema Buŋa qaa gomaŋati, ii iŋijoŋ uugia kuuwa.” Qaa kaaŋa kolooro Joonanoŋ waama Pombaa qaa jeta teŋ koma Niiniwe keno. Niiniwe sitiwaa soya ii kokaeŋ: Gii goraayanoŋa kanaiŋ kema laligona weeŋ karooŋ tegoro teegeŋ endu keubaga. a  Joonanoŋ kanaiŋ siti uutanoŋ kema laligoro weeŋ motooŋgo tegoro buŋa qaa qama kokaeŋ iŋijoro:

“Weemboria 40 mombo eja. Ii tegoro Niiniwe siti koi mono meleeno kemebaa.”
Qaa kaeŋ qama iŋijoŋ keno Niiniwe kanatuuru yoŋonoŋ Anutuwaanoŋ buzu qaa ii moma laariŋ uugia meleema nene siŋgi laligowombaa kambaŋ koma jeŋ kotiigi. Ii jeŋ kotiiŋ ejemba somata melaa korebore yoŋonoŋ uumeleembaa samo megi selegianoŋ uro too arigi.

Kaeŋ aŋgi iikawaa buzu qaaya ii Niiniwewaa kiŋ (praim minista) iwaanoŋ keuro. Keuro moma jiŋkaroŋ duŋ rarayanoŋga kamaaŋ malekuya kotogoŋ samo meŋ aturaaŋ too utuŋ ariŋ raro. Rama jeŋkooto kokaeŋ ano Niiniwe siti sokondaboroŋ keno: “Oŋo mono kiŋ ano jawiŋuruta nonoonoŋ jeŋkooto koi mobu: Moŋnoŋ mono nene qaaŋ mende newa. Ejemba me bao kuru, lama bulmakao, oŋonoŋ nene qaaŋ newombaajoŋ mende moma oŋombu. Nene siŋgi kaeŋ laligoŋ samo medaboroŋ Anutu kotakotagadeeŋ saama qama kooliŋ muŋ aŋa aŋa kaniagia bologa ii mesaowu! Ejemba uŋuŋ tiwilaaŋ oŋoŋgi sagianoŋ borogia tilooŋ eji, sili ii mono gema qedaborowu. Kaeŋ aniŋ Anutunoŋ iriŋsooŋsooŋaa uugeria qelanjiŋ siŋgisoŋgonana mesaonaga. Ii mesaoro mende tiwilaawonaga. Kaeŋ jejoŋ.”

10 Ii moma asariŋ kaniagia bologa gema qeŋ uugia meleeŋgi Anutunoŋ nanamemeŋgia ii iima wosoya moma oŋoma roromoŋgoya eleeno siŋgisoŋgogiaa iroŋa meleema oŋomambaajoŋ moroti, ii mesaoro. Uutanoŋ kaeŋ kamaaro mende meŋ kileeŋ oŋono. Kiaŋ.

Copyright information for `KSR