a4Dut 8.3
b8Dut 6.13
c10Ond 91.11
d11Ond 91.12
e12Dut 6.16
f18-19Ais 61.1-2
h251 Kiŋ 17.1
i261 Kiŋ 17.8-16
j272 Kiŋ 5.1-14
k32Mat 7.28-29

Luke 4

Satanoŋ Jiisas aŋgobato meŋ muŋ laligoro.

Mat 4.1-11; Maak 1.12-13

Jonoŋ Jiisas oomulu meŋ muro Uŋa Toroyanoŋ uuta saa qero Jordan apunoŋga eleeno wama baloŋ qararaŋkoŋkoŋanoŋ keno. Kema kanoŋ laligoro Kileŋaa Toyanoŋ aŋgobato meŋ muŋ laligoro weeŋ 40 tegoro. Kambaŋ 40 kanoŋ nene moŋ mende neŋ laligoro tegoro neneyaajoŋ komuro.

Neneyaa komuro Kileŋaa Toyanoŋ kokaeŋ ijoro, “Gii Anutuwaa meriaga koloojaŋi eeŋ, ii mono qendeema jamo koi jeŋ kotona letoma bered kolooro newa.”

Ijoro meleeno, “Qaago! Buŋa Terenoŋ qaa kokaeŋ oogita eja, ‘Nenenondeeŋ ejemba laaligo mende nonomakeja.’”

Meleeno Satanoŋ wama baaŋa koriga moŋnoŋ uma namowaa kantria kantria kuuya ii uulaŋawo qendeema muro. Qendeema muŋ kokaeŋ ijoro, “Niinoŋ kantri kuuya ii galeŋ koma oŋomambaa ku-usuŋa ano esuhina iwoiyaa akadamuya ii noo boronanoŋ aaŋaga eja. Kawaajoŋ ii neenaa aiŋnaanoŋ moroga mumanjeŋ saanoŋ ii mumaŋa. Kawaajoŋ iwoi kuuya koi mono goo boroganoŋ amaŋa. Kawaajoŋ gii waena meŋ mepeseeŋ nombaati eeŋ, ii kuuya mono goo buŋaga koloodaborowaa.”

Kaeŋ ijoro kokaeŋ meleeno, “Qaago! Buŋa Terenoŋ qaa kokaeŋ oogita eja, ‘Gii mono Poŋ Anutugaa waeya meŋ mepeseeŋ ii motooŋgo weleŋ qeŋ muŋ laligowa.’”

Meleeno Satanoŋ Jiisas mombo wama Jerusalem sitinoŋ kema jiwowoŋ jigowaa waareŋanoŋ eu uma kokaeŋ ijoro, “Gii Anutuwaa meria koloojaŋi eeŋ, mono kokainoŋga luguŋ emu kemeba. 10 Buŋa Terenoŋ qaa moŋ kokaeŋ oogita eja, ‘Anutunoŋ gajobauruta jeŋ kotoŋ oŋono saanoŋ galeŋ koma sopa somoŋgoŋ gombu,’ 11 ano qaa moŋ ii kokaeŋ, ‘Yoŋonoŋ borogianoŋ ama nonoŋgoliŋ goŋgi kemeŋ jamonoŋ kanaganoŋ guŋ mijimiji mende ambaa.’” Kawaajoŋ saanoŋ kemeŋ mende tiwilaaŋ gombaa.

12 Kaeŋ ijoroto, Jiisasnoŋ kokaeŋ meleema muro, “Qaago! Anutunoŋ jeja, ‘Gii mono Poŋ Anutuga aŋgobato mende meŋ muba.’”

13 Kileŋaa Toyanoŋ aŋgobato kuuya ii Jiisas ama muro tegoro mesaoŋ keno. Kiaŋ. a, b, c, d, e 

Jiisasnoŋ kanaiŋ hamoqeqe gawoŋ mero

Mat 4.12-17; Maak 1.14-15

14 Jiisasnoŋ baloŋ qararaŋkoŋkoŋa mesaoro Uŋa Toroyaa ku-usuŋanoŋ iwo nano Galili prowinsnoŋ eleeno. Eleeno qaa bujuyanoŋ seiŋ gomaŋ miri liligoŋ rama keŋgiti, ii kuuya sokoma keno. 15 Sokono gomaŋa gomaŋa liligoŋ qamakooli mirigianoŋ uma Buŋa qaa kuma oŋono. Kuma oŋono mogiti, kuuya iyoŋonoŋ aisooŋ mepeseeŋ mugi. Kiaŋ.

Nazaret yoŋonoŋ Jiisas gema qegi.

Mat 13.53-58; Maak 6.1-6

16 Jiisasnoŋ eleema somasomarii taoŋa Nazaret kanoŋ keno. Sonda kendonoŋ karo amakejiwaa so qamakooli mirinoŋ uma Buŋa Tere weeŋgoŋ oŋomambaajoŋ waaro. 17 Waaro gejatootoo eja Aisaiawaa Buju Tere mugi metuma qaa batuya kokaeŋ oogita eji, ii mokolooro:

18 “Pombaa Uŋa Toroyanoŋ noo uunanoŋ kemeŋ gawoŋ memewaajoŋ bedu meŋ noma ejemba

kamaaŋqeqeta yoŋoojoŋ Oligaa Buŋa jeŋ asariŋkejeŋ. Iinoŋ wasiŋ nono qaa kokaeŋ jeŋ seiŋkejeŋ:
Bologanoŋ gbadooŋ oŋono laligojuti, Anutunoŋ mono ii isama metogoŋ oŋono laligowu.

Anutunoŋ jaagoo ejemba jaagia metooro mombo uuŋ iibuya.
Kike taribari ama menduŋgoŋ meŋ kamaaŋ aŋgi laligojuti, Anutunoŋ mono ii metogoŋ oŋono siiseweweya qaa laligowuya.
19 Poŋnoŋ hamoqeqewaa gbani awaa ano kaŋ kuuwaati, niinoŋ iikawaa qeleyaga kaŋ ii jeŋ asariŋkejeŋ.”
20 Qaa kaeŋ weeŋgoŋ tere pipipipiiya ii pipiiŋ galeŋa muŋ kamaaŋ raro. Raro qamakooli mirinoŋ ragiti, iyoŋonoŋ kuuya dorondoŋ ama jaasapo iigigiigi. 21 Iigigiigi kanaiŋ kokaeŋ iŋijoro, “Buju Terewaa qaa koi weeŋgowe gejagianoŋ kemero mojuti, iikawaa hoŋa mono kete koi asugija.”

22 Kaeŋ iŋijoro kaleŋmoriaŋ qaaya qaaya buutanoŋga kamaaro kuuyanoŋ ii moma waliŋgoŋ jeŋ sororogoŋ muŋ qaa iikawaa jeŋkelekeleya ii kokaeŋ jegi, “Eja koi Joosefwaa meriaga me?”

23 Jegi kokaeŋ iŋijoro, “Oŋo kambaŋa kambaŋa gbaqoosoŋ qaa koi jeŋkeju, ‘Meŋqeeaŋgo eja gii mono geeŋga meŋ qeaŋgoŋ aowa.’ Oŋo gbaqoosoŋ qaa ii keteda koi nijowombaajoŋ mojuti, ii mojeŋ. Ii jeŋ kokaeŋ jewuyaga, ‘Gii Kaperneam taonoŋ kema aŋgoleto uuta mena bujuya moniŋi, iikawaa so mono geeŋgaa gomanoŋ koi kaaŋagadeeŋ mewa.’” 24 Kaeŋ jeŋ iŋijoro, “Niinoŋ qaa hoŋa moŋ kokaeŋ iŋijomaŋa: Gejatootoo ejemba moŋ iyaŋaa somasomarii taonoŋ mende moma uma mubuya.

25 “Niinoŋ qaa hoŋaboŋa moŋ kokaeŋ iŋijomaŋa: Elaijawaa kambanoŋ Anutunoŋ Siwe naguya kono gbani karooŋ ano koiŋ 6 kawaa uutanoŋ koŋ mende kiro bodi somata kolooro namo kuuya sokono. Kambaŋ kanoŋ emba malo mamaga Israel uutanoŋ laligogi. 26 Mamaga laligogito, Anutunoŋ Elaija yoŋoonoŋga mombaanoŋ kembaatiwaajoŋ mende wasiroto, waba baloŋ Saidombaa gomaŋ qata Sarefat iikanoŋ emba malo motooŋgoya iwaanoŋ wasiro keno. 27 Gejatootoo eja Elisawaa kambanoŋ manimbanoŋ Israel eja mamaga turuŋ oŋono laligogito, iyoŋoonoŋga moŋnoŋ moŋ mende solaŋaniro. Qaagoto, waba baloŋ Siriaga eja qata Naeman ii motooŋgonoŋ mono Elisawaa qaaya moma laariŋ solaŋaniŋ qeaŋgoro.”

28 Jiisasnoŋ kaeŋ iŋijoro qamakooli mirinoŋ ragiti, iyoŋonoŋ kuuya qaa ii moma iriŋgia soono uuduuduu kolooŋ oŋono. 29 Uuduuduu kolooŋ oŋono waama Jiisas konjoma otaagi taoŋ seleeŋgeŋ keno. Taoŋgia ii baaŋaa sia kosianoŋ megi nanoti, mono iikanoŋ hagogi kemebaatiwaajoŋ keŋgi. 30 Keŋgito, batugianoŋ qendeema oŋomesaoŋ keno. Kiaŋ. f, g, h, i, j 

Kaperneam taonoŋ ome moŋ konjono.

Maak 1.21-28

31 Jiisasnoŋ Galili prowins uutanoŋ Kaperneam taonoŋ kamaaŋ keuma Sabat kendonoŋ ejemba tuuŋ kuma oŋono. 32 Kuma oŋono qaayanoŋ ku-usuŋawo kolooro jero. Kawaajoŋ kanageso yoŋonoŋ ii iima aaruŋ waliŋgogi.

33 Qamakooli miri iikanoŋ eja moŋ omeyawo raro. Raro omeyanoŋ tereŋgoŋ silama qa kokaeŋ qaro, 34 “Ae! Jiisas, Nazaret eja! Gii nomaeŋ ama nonomambaajoŋ anjaŋe? Mono tiwilaaŋ nonomambaajoŋ kajaŋ me? Nii kaniaga moma kotojeŋ. Gii Anutuwaanoŋ eja Tak-kootoya koloojaŋ.”

35 Kaeŋ qaro Jiisasnoŋ temboma kokaeŋ jeŋ muro, “Gii mono qaaga bogoro eja koi mesaoŋ togowa.” Kaeŋ jeŋ muro omenoŋ eja ii meŋ giliro tama batugianoŋ namonoŋ kemero qeŋ mizimizi mende totooŋ kolooŋ kouma mesaoŋ keno.

36 Keno kuuyanoŋ newogia tegoro waliŋgoŋ batugianoŋ amiŋ moma kokaeŋ jegi, “Yei! Qaa koi naa qaaga? Iinoŋ mono esuŋmumu qaganoŋ ome jeŋ kotoŋ oŋono teŋ koma kouma kenju.” 37 Kaeŋ kolooro Jiisaswaa qabuŋayanoŋ seiŋ gomaŋ kuuya kosere rama keŋgiti, iikanoŋ kema sokono. Kiaŋ. k 

Jiisasnoŋ ji ejemba mamaga meŋ qeaŋgoŋ oŋono.

Mat 8.14-17; Maak 1.29-34

38 Jiisasnoŋ waama Kaperneam qamakooli miri ii mesaoŋ Saimon Piitowaa mirinoŋ uro. Uro Saimombaa seuŋanoŋ selegere ji uuta kiro ero. Ero iwaajoŋ ama Jiisas qama kooliŋ mugi. 39 Qama kooliŋ mugi kema usugoŋ kemeŋ selegere jeŋ kotoŋ muro mesaoro iikanondeeŋ waama nene ooŋ uŋuagiro.

40 Weeŋ jaaya tegoŋ kemero kanoŋ ejemba daeŋ yoŋonoŋ alaurugia ji kania kania kanoŋ iŋiro egiti, ii kuuya uŋuama Jiisaswaanoŋ kagi. Kagi boria kuuya yoŋoo qagianoŋ aŋa aŋa ano qeaŋgodaborogi. 41 Ome yoŋonoŋ kaaŋagadeeŋ ejemba mamaga yoŋoo uugianoŋga kouma silama kokaeŋ qagi, “Gii Anutuwaa meria koloojaŋ.”

Jiisasnoŋ Hamoqeqe Toya Kraist kolooji, iyoŋonoŋ ii mogitiwaajoŋ Jiisasnoŋ jeŋ oŋoma buugia muuŋguŋ oŋotaaro. Kiaŋ.

Hamoqeqe gawoŋa ii Galili sokono.

Maak 1.35-39

42 Jiisasnoŋ gaoŋ ero gomaŋ weŋgeraŋ suluro waama iyaŋa tiriŋ kotoŋ kemeŋ goria moŋnoŋ keno. Kenoto, ejemba yoŋonoŋ iwaaŋ muŋ kema mokolooŋ mende oŋomesaoŋ kembaatiwaajoŋ batogoŋ aŋgoŋ koma mugi. 43 Aŋgoŋ koma mugito, kokaeŋ iŋijoro, “Niinoŋ Anutu bentotoŋaa Oligaa Buŋa ii taoŋ tosia yoŋoojoŋ kaaŋagadeeŋ jeŋ asariŋ oŋombe sokombaa. Anutunoŋ mono iikawaajoŋ wasiŋ nono.”

44 Kaeŋ jeŋ kema Galili prowins liligoŋ qamakooli mirigianoŋ Buŋa qaanoŋ uu kuuŋ oŋoma laligoro. Kaeŋ.

Copyright information for `KSR