a3Eks 15.1
b4Jer 10.7; Ond 86.9
c5Eks 38.21
d8Eks 40.34; 1 Kiŋ 8.10-11; 2 Hist 5.13-14; Ais 6.4

Revelation of John 15

Siwe gajoba 7 ano lombo kanjaŋawo 7.

Kawaa gematanoŋ siwe uutanoŋ uuŋ aŋgoleto somata moŋ kolooro iima kokaeŋ waliŋgowe: Siwe gajoba 7 ii lombo kanjaŋawo (plague) 7 meŋ naŋgi. Ejemba siŋgisoŋgogiaajoŋ Anutuwaa iriŋa soono jeŋ tegoŋ iroŋa meleeno lombo kanjaŋawo qagianoŋ uro mogi uutanoŋ olomooro qaagianoŋ komuwaa. Kawaajoŋ qagia lombo kanjaŋawo konoga 7 qagi.

Ii iima iwoi bilibiliawo kowe kaaŋa iibe gere bolaŋawo melokanjiŋ ero. Iikawaa kooroŋanoŋ Anutuwaa ejemba naŋgi iŋiibe. Yoŋonoŋ haamo ama jeŋnembawaa qaaya mende teŋ koma uŋayaa waeya mende meŋ qataa jaŋgoya selegianoŋ mende aŋaliŋ aŋgoŋ koma laligogi. Anutunoŋ ii motomotooŋ kulele oŋono meŋ naŋgi. Iikanoŋ nama Anutuwaa gawoŋ meme eja Mooseswaa rii ano Lama meriaa renduŋ ii kokaeŋ qagi,

“Oo Poŋ Anutu ku-usuŋ kuuyaa Toya, giinoŋ aŋgoleto somasomata damuyawo amakejaŋ.
Giinoŋ kantria kantria ii kiŋ poŋ ama oŋona nanamemeŋgaa kania ii dindiŋa ano hoŋa tooŋ kolooja. Kawaajoŋ Anutu qaita moŋ kolooŋ laligojaŋ.
Oo Poŋ, goonoŋ nanamemeŋga dindiŋa ii mono asuganoŋ asugiro mojoŋ.
Kawaajoŋ kantri kuuya yoŋonoŋ kaŋ goo waega meŋ mepeseeŋ gomakeju.
Giinoŋ geeŋgodeeŋ toroya koloojaŋ. Kawaajoŋ ama moronoŋ goojoŋ toroko mende monaga? Kuuya nononoŋ goo qabuŋaga meŋ seiŋ mepeseeŋkejoŋ.”
Kawaa gematanoŋ uuŋ iwoi kokaeŋ iibe: Siwewaa mepemepesee jigowaa (tempel) naguyanoŋ tano iikawaa uutanoŋ Anutu daŋgunuyaa opo sel jigoyanoŋ nano iibe. Mepemepesee jigo iikanoŋa Siwe gajoba 7 lombo kanjaŋawo 7 meŋ naŋgiti, iyoŋonoŋ kamaaŋ asuganoŋ kagi. Malekugia tualalakota bilibiligiawo mougi opo jokaŋa maŋkiilaya goulyawo ii iiŋ kasa kaaŋa basamoŋgianoŋ embaaŋ aoŋ naŋgi.

Yoŋonoŋ kagi beŋ jawiŋa 4 yoŋoonoŋga moŋnoŋ goul qambi 7 oŋono Anutuwaa iriŋsoŋsooŋanoŋ qambi ii qaa ootanoŋ kougi. Anutu iriŋa sooji, iinoŋ laligoŋ kouma laligoja ano tetegoya qaa laligoŋ ubaa. Qambi ii oŋono Anutunoŋ asamararaŋa ano kuusuŋa qendeeno iikawaajoŋ kaaso pumpuŋgoŋ mepemepesee jigo (tempel) saa qero moŋnoŋ Siwe jigo ii uu-uutaa so mende kolooro. Siwe gajoba 7 yoŋonoŋ wala qambigia maagi lombo kanjaŋawo 7 asugiŋ hoŋawo koloowaati, iikawaa gematanoŋ saanoŋ mombo ubuya. Kiaŋ. a, b, c, d 

Copyright information for `KSR