1 Thessalonians 3

Are ratmat ga na tara la ponama na taun Atens, tie tale gat iga uanpala meba migimapang, pa pava kan la tale puopang meba pala mi. Are ratmat ga paburio ties gare ro, Turuot ga Sailas la eba ionang Atens, pa asagaing Timoti ga ula meba emum agarip mim ga mangangasang dalap mi meba dusming maranit iro nagan. Memani, tale napang meba giginam ba dalap ma teip kabirana mi ga omiolaing nagan maiong, na tara la non ara non ara ngitngirip ga giginanimup la betmeng ira mi. Mimi kan la amit, Morowa kan la buiteong meba buavim miriro ngitngirip. Iriro Timoti, irie papa buang ga migana o ubi ang Morowa me bais ula mumuru ang Karisito. Eva, tinan na tara la ponama ga mimi, mipalo gare ro, “Tubiat eba miaving ngitngit.” Tie, titot la betieng urio ngitngit ga omit ara. Me iriro muana, tale gat iga uantala. Are ratmat ga asagarung Timoti ga ula mi meba oera nagan ming. Memani, ebun ovuvuoong Satan agat ming ga mivanaang ga ubi pang la eba paga ba agarit.

Avaikong Timoti ait ila muri aun Paulo me ekelesiap onim na taun Tesalonaika

Tie, Timoti la miulai ga titot it la muo betong ii. Ga avaikong ait ila muri me iun gare ro, Naganming maranit iro bais ula mumuru ga amiuluan tavuk o na migat me non ekelesiap. Ga mirier taraiap la mime panagiming maset ga temiba na tara la agatming me palam. Ga miga pagimaming are gat tie la paga migimapang. Are ratmat ga ekelesiap papap tuam, na tara la papto ait mi la dusming maranit iro nagan ming, irio ait la mangangasong dalap pa na tara mirier giginanimup la betmeng ira pa ga man pakirarameng teip. Are ratmat ga titot la mumuru ninimiap pang, memani mipet maset la dusming maranit ira Ila Kakani. Tie, tevuruspang me milam o urier tenubap gano na irap a Morowa buang. Tale bira are mani ga eba puopang meba papulam tiesiap o temaieng me aun Morowa? Pa atabo eba okosarpang gare ro, 10 Na ileng ga na arubu, pame okosar papot o marik me ai Morowa meba pagaalie ga pala migimapang. Ga leba kagesming o nagan migat ira Morowa, tie, paga okosarpang nagan ming ga betieng maranit maset ga teaba Morowa.

Marikong Paulo me ai Morowa

11 Are ratmat ga marikpang me ai Morowa Ira buang ga Ila Kakani buang Iesu meba linavang alang me palam meba pala mi. 12 Ga Ila Kakani la eba abodakang tavuk ming o na ang na dalap mi, ga eba naming maset maime ekelesiap papap mim ga mirier inamaniap ganam, are gat pava la maset napang me milam. 13 Ga ana iriro tavuk, Morowa la eba mangangas ang dalap mi, ga na tara Ila Kakani buang Iesu leba ina terigiang ga mirier inamaniap am mila babaim ganam, tie eba migimaang la mibabaum ga karuk o kiribas ba ming na irap a Morowa Mamo buang. Karuk.

Copyright information for `KTO