1 Timothy 3

Ties maiong teip mila umaiale bo lotu

Tie, uriro ties la migat o la tiesieng gare ro: Migana la namo onang ga irie ba migana o unualeap ma ekelesiap, naong me ubi ula muru. Are ratmat ga migana o unualeap le maset auluan tavuk ila puvuvui ga onang maset ga tale puomeng inamaniap meba omaioping kiribas ba ang o kirinim ba na ninimiap ang. Onang it gare ba lai iang namurit magabun. O magiang it a namurit tara. Onang maset ga oauluan agat ula mumuru ga makosarang mirier tavukup mila puvuvum. Nepapaang ga mirier inamaniap ga maagailie ga ualeng mabuo. Ga betang gare migana ila muri o usingnualap. Buat tapu a papot wain ga menang, ga buat papamnam dalap a ga bukbukang kakalait. Karuk. Mateteiliattang inamaniap, ga buat bukbukong tapmat me non inamaniap. Ga buat man agattong busit me kakepup. Maset ualeng bo numeilup am, ga maset maunoang lop am meba omeuluan ties ang. Memani, migana la tale ume maset uale bo numeilup am o magabun ga lop am, eba ualeng maset gare ba mani bo garip ma ekelesiap o lotu ang Morowa, a? Tale kan puoong! Ekelesia ila nei tala kan unama ga betang gare ba migana o unualeap memani, ebun uara kakuma ga betong gare ba migana o pringesnges. Babun avukutuara Morowa gare rie la avukutuara karorama me tavuk ang o pringesnges. Are ratmat ga migana la auluan tavuk ila mumuri uadan ma inamaniap la tale naganmeng ira Iesu, iriro i migana la muri, ga amaning bonim ula muru. Migana la are tiro la puoong meba betang ga onang migana o unualeap. Leba tale aouluan tavuk ila muri, tie eba muliaba na irap ma mirie inamaniap, ga eba okiraraang ubi ang ga eba uaring ubianama ang karorama a.

Ties maiong teip o ubi o lotu

Aret tiro, teip o ubi o lotu le maset agatmeng me ubi maiong ga ameuluan tavuk ila mumuri. Ga tala kan man tiesmeng agarit tapmat o ties ga buat tapmaio a papot wain ga menmeng. Mirie gat la buat agatmeng maset me kakepup. Miaring maranit ga omeuluan uriro ties migat la bume agat ume na dalap mila babaim. 10 Pa lake ka mimerang ubi maiong. Leba ubimeng maset, tie eba maionang gare teip o ubi o lotu. 11 Ga kualap maiam teip o ubi le maset agatmeng me tavuk la akosarmeng. Ga buat tiesmeng tigit me non teip ga magaulap. Maionang teiliat ga akosarmeng tavuk ila mumuri ga ameuluan. 12 Teip o ubi le maionang gare ba lai iang namurit magabun ga magiang it o namurit la. Ga maset umaialeng bo numeilup maiam. 13 Inamaniap la maionama na ubi o lotu ga okosarmeng ubi ula muru, eba memaning bonim ula muru! Ga puomeng meba maiaramang bais ula muru ang Karisito Iesu.

Muana o ties a tavuk ang Morowa

14 Migat, tuga tala kakalait noi ga nogimarang, pa titot la omirtung uriro ties na babam me noi. 15 Memani, leba noba pagap la eba onomein alang tung ga tale kakalait bettung, tie ebat ogimanang uriro ties la omirtung na babam ga eba anera tavuk maiang butamat ang Morowa la ameuluan. Eva, butamat ang Morowa urie lotu ang Morowa la ame ninimiap. Mimi teip ga magaulap o lotu la mimi gare labinama ila mamarani ga kimanam ula mumuru la miario ties migat. 16 Eva, iriro muana o ties ang Morowa irie paga ila kakani migat. Ga tale kan puomeng inamaniap meba abomaionang. Tale kan puonung meba anera pa tubiat Morowa kan la eba avaikang. Iriro muana o ties me Iesu Karisito la businguala a tavuk ang Morowa la naong me bulam le abuluo, la betong gare migana migat, ga betong la uakap. Muranama Ila Babai la asinguala puvut maset o tenuarap ang Iesu. Angelop gat la agimameng na panbinim. Ties ang la ila mai mirier garip ma teip ga magaulap. Papot ma inamaniap onim na kimanam la nagantmeng ira a. Ga Morowa la ina alagiong ga ina ula na panbinim.

Copyright information for `KTO