aAisaia 62:11; Sekaraia 9:9
bSam 118:25-26
dSam 118:22-23

Matthew 21

Iesu la ula uobu Ierusalem gare non orong

Urie, Iesu ga lop am o usingnualap la betmeng kagarat u Ierusalem. Ga betmeng u pianam Betfage la iot bo pugama Oliva. Ga lesagaong Iesu lopien angan o usingnualap ga leulo, “Mala na uriro pianam titot la ogimabuong. Ga eba kakalait agimamang non donki la avismeng ga dusong. Ga poi ang gat la unama ga irie. Ovikmang iagur ira lie ga lelagimang ga muliong toi. Pa leba noba migana le aramang ties ba me malam ga memarikang me mani ga maga lelagimang litiro donkipien, tie amalava gare ro, ‘Ila Kakani la amaning ubi ira lie’, tie eba kakalait miairang ga ina le lelagiming donkipien ga muliong.” Iriro paga la betong meba tevuoieng uriro ties unuli Aisaia la uaramo la iario parak. La tiesong gare ro,

“Miaramang uriro ties mai teip ga magaulap onim Saion, ‘Agimaming, Orong ming la muo titot. La muo gare migana la tale amaning bonim, ga man unama nakap bo non donki. Unama bo donki ila kubama ga muo.’” a 
Tie, lila lopien angan o usingnualap ga okosarliong gare rie la leulo ra Iesu. Lila alagiliong donki naga ga poi ang, ga liabua saket liang nakap libuo donkipien. Ga unama Iesu nakap libuo. Ga papot ma teip ga magaulap la agimameng iriro paga, ga mirie gat la mainiam sakerip maiam mila laklagam ga maiabuam sakerip na alang meba masingala Iesu gare orong. Pa mirie la mela mebulam muareip ma kuop ga maiabuam na alang. Ga papot ma inamaniap la menum laike a Iesu ga non inamaniap la menum ga mumaio malonim, ga kukupmeng gare ro,

“Buaving bonim a ea ang orong Devit.”
“Morowa la eba agaalie ga ualeng abuo iriro migana la muo na bonim a Ila Kakani.”
“Buaving bonim a Morowa me nakap migat!” b 
10 Na tara la uobu Iesu Ierusalem, mirier teip ga magaulap ganam onim na taun la turupmaiaba kirat ga man nemarikmeng tapmat gare ro, “Iriro migana irie aga migat, a?” 11 Pa teip ga magaulap la menum ga Iesu la megama, “Irie Iesu, irie unuli onim na taun Nasaret na provins Galili.”

Iesu la makalaong inamaniap la masagameng pagap na luguan o lotu

12 Urie, Iesu la ula uobu na kudat a luguan o lotu ga makalaong mirier inamaniap ganam la man okosarmeng sune na luguan o lotu. Malakitong luagap maiam teip la man maigormela kakepup maiam, ga luagap maiam teip la man masagameng kobengip me lavang.
21:12Teip ga magaulap namo masaumeng pagap tapma na kudat a luguan o lotu, usaumeng it ma kakepup a luguan o lotu. Tale kan puomeng meba usaumeng ma kakepup a luguan o lotu. Tale kan puomeng Parasaiop meba usaumeng ma kakepup onim Rom o Grik. Are ratmat ga okosarmeng uriro tatak butamat ma miriro kakepup. Ga kobengip ga bulumakaup ga sipsipup la maiot na luguan o lotu me teip ga magaulap meba masaumeng me lavang.
13 Pa maulo Iesu, “Miptang, Babam ula puaru la tiesieng gare ro, ‘Luguan tuang, irie luguan o marik.’ Pa masagaming pagap, ga okosarming butamat ana. Are ratmat ga akosarming ga betong gare pianam o kagonuriap maiang teip o pula.” 14 Iesu la ula unama na luguan o lotu ga mumaio mila sapsameng ga kibap mila kiram ai, ga ina mamumuriraong. 15 Tie, miridaip mila kakanim ga teip o usingnualap o maimai la agimameng Iesu la mamumuriraong teip mila tafameng ga meptam lop la kukupmeng tapma na kur a luguan o lotu gare ro, “Buaving bonim a ea ang Orong Devit.” Ga mitara bukbukmeng kirat. 16 Ga amarikmeng Iesu gare ro, “Atabo tale kan nupto uriro ties la maiaramo, a?” Pa upulo Iesu ties maiong gare ro, “Eva, tupto. Pa atabo tale kan ovasming uriro ties, ‘Mavuonung ara tatak lop ga madalakip meba maiaving bonim tuo’, a?” 17 Tie, tubiat maulai Iesu ga ula lavie na taun ga ula unama na pianam Betania.

Iesu la tiesong me kuguom o fik ga laluo ga ivara

18 Urie, parabira namur, Iesu la ina unum ga ula na taun Ierusalem ga tafaong me parak. 19 Ga ogimaong non kuguom o fik la dusieng na taralap o alang. Ga ula kagarat u, pa tale ogimaong parak ba la iot ubuo. Karuk. Babap it la maiot. Ga oulo uriro kuguom o fik gare ro, “Tala gat ina lopnuat. Karuk kan.” Pa talet kagat, uriro kuguom o fik la laluo ga ivara. 20 Lop am o usingnualap la agimameng iriro paga ga turupmaiaba kirat. Ga megama, “Are mani ga laluo kuguom o fig kakalait gare tiro?” 21 Ga Iesu la upulo ties maiong gare ro, “Mirulo migat, leba naganming migat ira Morowa ga tala kan mimaning narain agaripien, tie eba puoming leba akosarming tavuk gare tiro la akosartung iro kuguom o fik. Pa tala kan akosarming it iriro. Karuk. Leba gat amilava irobu pugama, ‘Tenara ga tegonang me todang na pirom.’ Tie eba tegoang me todang na pirom. Tie, eba betang iriro paga gare rie la tiesming. 22 Pa leba naganming ira Morowa ga okosarming marik, tie mirier pagap la marikming meba miaram, eba mamila.”

Amarikmeng Iesu aga la uala kaguma aun

23 Urie, Iesu la ula uobu na kur a luguan o lotu ga masinguala teip ga magaulap o ties ang Morowa. Pa miridaip mila kakanim ga teip mila uke a gar Israel la mumaio ai, ga amarikmeng gare ro, “Aga la uala kaguma noun ga munuo ro ga makalanung inamaniap la maigormela kakepup ga masagameng nganeip me ukosar a lavang?” 24 Iesu la upulo ties maiong gare ro, “Turuo gat la mating non umarik. Leba mipulang maset umarik tung, tie eba miralava aga la uala kaguma toun ga makosartung miriro ubiap. 25 Tie, nuvietiap ang Ioanes la maio lagum? Paga onim na panbinim, o pagat maiong inamaniap?” Mepto uritmat ga mirie kan la man tiesmeng, “Teivuo, eba bumama, ‘Paga onim na panbinim’, eba bualava, ‘Are mani ga tale naganming ume?’ 26 Pa leba bumama, ‘Pagap maiam it inamaniap’, tie eba burau me teip ga magaulap la eba bukirarameng. Memani, mirier ganam la naganmeng ira Ioanes irie unuli.” 27 Are ratmat ga mepulo ties ang Iesu, “Tale kan opet.” Pa maulo Iesu, “Turuo gat tala kan mirulo aga la uala kaguma ga keula meba makosartang miriro pagap.”

Ties o uvuvuo me narain kulen angan non mamo

28 Urie, Iesu la maulo miridaip mila kakanim ga teip mila uke a gar Israel gare ro, “Tie, agatming gare mani me iro? Non migana la amaning narain kulen. Ula ai natauan kulot ga aulo gare ro, ‘Poi ruang, titot nala ubinang na ubi a wain.’ 29 Pa natauan kulot la ugama, ‘Karuk. Palalarung ga kikistung.’ Pa tubiat ina oigorula agat ang ga ula ubiong. 30 Tie, inabun ula mamo ai non kulot ga uaramot uriet ties. Pa ugama kulot, ‘Tie, mamo, eba rala.’ Pa tale ula ubiong. Karuk. 31 Tie, me litiro kulen, aga la auluan agat ang mamo?” Pa megama, “Natauan kulot.” Pa maulo Iesu gare ro, “Mirulor migat. Teip la mime maiara takis ga magaulap o sadak la mime maiobu na inamon ang Morowa meke me milam teip o unualap onim Israel. 32 Memani, Ioanes o unuvariap la betong mi ga misinguala a tavuk ila puvuvui, pa tale kan naganming ira a. Pa inamaniap mila maiara takis ga magaulap o sadak la naganmeng it ira a. Pa ogimaming ara urio, pa tale kan maigormila dalap mi ga naganming ira a.

Ties o uvuvuo me teip mila kiram la umaiale bo ubi a wain

33 “Tie, miptang non ties o uvuvuo. Non migana la amaning kimanam ula kakanu ga okosarong ubi a wain ga okudatong. Pa tapma na ubi akosarong lu na tadas meba mabutbutmeng ga mapurasmeng kabop a wain. Ga akosarong non luguan la ut nakap maset maiang teip meba maionang ana ga umaialeng bo ubi. Tie, uabu uriro ubi na kilalap ma non teip meba okosarmeng butamat una. Ga ula na non pianam kakaliat. 34 Tubiat, kagarat a tara maiang kuop a wain meba lopmaiaring, mamo iang ubi la masagaong naien ma teip o ubi ga mela na ubi a wain meba maiaram kabop a wain ang. 35 Pa teip mila uale bo ubi la malagimeng miriro teip o ubi ga mavitmeng, pa menamua irie ga uvara, ga avuremeng irie ma tadasip. 36 Tubiat mamo iang ubi la ina masagaong papot ma teip o ubi ga okurupin natauan uvas la masagaong tinan. Pa teip la umaiale bo ubi, inat akosarmeng iriet tavuk ira ma miriro teip o ubi. 37 Tie, tubiat mamo iang ubi la asagaong poi ang ila migana ga ula mai. Agatong mamo gare ro, ‘Eba meptang maset ties ang poi ruang.’ 38 Pa agimameng miriro teip poi ang la muo, ga tiesmeng kan kabirana ma gare ro, ‘Iriro i migana leba aram mirier pagap ganam am mamo ang. Tie, bunamung ga aving, meba buarang uriro ubi ang.’ 39 Are ratmat ga akilivammeng iriro poi ang ga akalameng ga ula lavie na ubi ga menamua ga uvara.

40 “Tie, agatming gare mani? Tubiat na tara mamo iang ubi a wain leba muong, eba akosarang man tavuk ira ma miriro teip la umaiale bo ubi ang?” 41 Mepulo ties gare ro, “Eba makiraraang maset miriro teip mila kiram. Ga eba abung ubi a wain na kilalap ma non teip meba okosarmeng butamat una. Ga na tara la eba tekakvaieng parak, eba mepamum parakiap am ga maialang aun.” 42 Pa mamarikong Iesu gare ro, “Tie, atabo tale oagatming maset non ties la iot na Babam ula puaru, a?” Tiesieng gare ro,

“‘Iriro tadas, etumarip la agomeng. Pa tubiat irirot tadas la betong natauan tadas meba angangasang luguan. Ila Kakani kan la akosarong iriro paga ga betong, ga agimapang la mitara mumuri maset.’ d 
43 “Are ratmat ga mirulo, Morowa eba ovugutara inamon ang miun Israelip, ga eba alam maun non gar ma teip ga magaulap la omeuluo ties ang ga lopmaiam. 44 Migana leba alaming abuo iriro tadas, eba tepurasang ga kire ba maset. Pa tie eba alaming iriro tadas bo migana ba, eba akiraraang gane ga aving.” 45 Urie, miridaip mila kakanim ga Parasaiop la mepto uriro ties o uvuvuo la uaramo Iesu ga ameit la mavuoong kan ga tavuk maiang la akosarmeng ira Iesu. 46 Are ratmat ga mitara nameng migat meba umiaring a Iesu, pa merau me teip ga magaulap. Memani, teip ga magaulap la naganmeng migat ira Iesu irie non unuli ang Morowa.

Copyright information for `KTO