aSam 69:9
bSam 18:49
cLo 32:43
dSam 117:1
eAisaia 11:10
fAisaia 52:15

Romans 15

Obuluan agat ga tavuk ang Karisito

Tie, bubuo inamaniap la bumaning nagan ula mamaranu ga agatbuong uakap me iriro. Are ratmat ga buat agatbuong me bulam kan ga akosarbuong it tavuk la teagabulie. Karuk. Pa ubibuong meba magabulie teip ga magaulap la tale mamaranu maset nagan maiong. Ga na tara la tale ameit man paga la tale teuba Morowa aime la akosarmeng, buaving giginanim maiong ga magabulie. Pa bubuo ganam narit narit le ubi buong meba magabulie papap buam, meba akosarmeng tavuk ila mumuri ga eba mamaranu ba nagan maiong. Memani, Karisito gat la tale kan teagatong it meba teagaalie. Are Karisito la aulo Morowa na Babam ula puaru gare ro,

“Inamaniap la tiesmeng me nulam o ties ula kiro, urio ties maiong ula kiro la ilum gat nakap tobuo.” a 
Mirulo gare ro, memani, tiesiap ganam tinan la maiot na Babam ula puaru la mamirmeng meba busingmaiala miruo tiesiap meba mangangasmeng dalap buo ga bukosarmeng meba dusbuong maranit ga auanbula Morowa meba bulagiang. Tie, bume obula ngangas aun Morowa la ume bukosar ga dusbuong maranit iro nagan ga ume buagaulie meba abuuluan maset. Mariktung meba miagaalie Morowa meba amiuluan migat tavuk ang Karisito Iesu ga miaring urio namurit it agat. Are ratmat meba mionang un namurit dalap, meba mimi ba ganam narit narit eba ovienming bonim a Morowa un namurit dalap ga namurit nanam, irie ira ang Ila Kakani buang Iesu Karisito.

Karisito la maagaulie Israelip ga non garip la tale onim Israel

Are ratmat ga mirulo, temila kabirana mi kan ga mionang un narit dalap kabirana mi, are Karisito la amila meba ovienang bonim a Morowa. Mirulo gare ro, Karisito la betong gare migana o ubi meba maagaalie garip onim Iudaia na tavuk o kasau. Okosarong gare tiruo meba osingala ties ang Morowa la migat o. Ga me iruo tavuk la mavuvuoong mirier midaiap ganam la ualam Morowa maun eap maiam. Are gat to, naong me non garip la tale onim Iudaia meba ogimameng kadik ang Morowa ga ovienmeng bonim a, gare Babam ula puaru la igama:

“Are ratmat ga eba tevang temaieng me noun kabirana ma non garip la tale onim Iudaia. Ga eba purara
ma sasangip meba ovientang bonim nuo.” b 
10 Ga na non ties na Babam ang Morowa la ugama,

“Mimi non garip la tale onim Iudaia, temiba ga gar ang kan.” c 
11 Ga na non nap na Babam la tiesong,

“Mimi non garip la tale onim Iudaia, ovienming bonim a Ila Kakani. Mimi inamaniap ganam, ovienming bonim a.” d 
12 Ga Aisaia gat la tiesong gare ro,

“Eba betang migana ba na gar ang Iesi. Ga iruo migana la eba irie ba orong maiang mirier garip ganam na uro kimanam. Mirie non garip la tale onim Iudaia leba auanmela un nagan meba maidangang ga akosarang tavuk ila mumuri ira ma.” e 
13 Are ratmat ga mariktung ira Morowa, irie la ume uala tavuk o uanulap un nagan miun, eba alang tenubap ula kakanu ga malina miun ga eba dakliong na dalap mi. Ga na kukunim ang Muranama Ila Babai, tavuk o uanulap un nagan la eba dakang migat miun.

Teuba Paulo me ubi o lotu la okosarong

14 Ekelesiap papap tuam, nagantung migat gare ro, Dakong tavuk ila mumuri miun kan. Ga mimanim mirier agarip mila murum ganam. Are ratmat ga mimi narit narit la puoming meba nesingmiala kabirana mi. 15 Pa mamirtung non tiesiap mila mamaranim me miun meba temum agarip mim. Memani, Morowa la ualo ubonuvarap ang toun meba okosartang uro ubi. Ga okosartung ubi ang Iesu Karisito kabirana ma teip ga magaulap la talet onim Israel. Okosartung ubi gare miridai ga baistung o bais ula mumuru ang Morowa me maun. Ga tuga malagirang miruo garip me ai Morowa ga Muranama Ila Babai eba makosarang ga babaum ba, ga talam aun Morowa gare kamniap la naong ume.

17 Are ratmat ga ubirung maranit ga avientung Karisito ume urio ubi ang Morowa la okosartung iro bais ula mumuru la baistung o me maun teip ga magaulap la tale onim Israel. 18 Tale ka avaiktung noba paga. Karuk. Pa tugat baistang a iriro namurit paga la are tiruo: Ties ga ubi la okosarong Karisito na nanam ga kilalap tuo kabirana ma teip ga magaulap la tale onim Israel, la mepto ga omeuluan ties ang Morowa. 19 Eva, Muranama Ila Babai la ubiong maranit ira ruo ga tongangasong meba makosartang non ara non ara pagap ga pagap o turupnuabap. Magimameng inamaniap miruo pagap la betmeng ga naganmeng ga omeuluan ties ang Morowa. Are ratmat ga tuptuaro ubi Ierusalem la baistung o ties ula mumuru a Karisito, ga gurarung ga tula na mirier napup ganam ila puoieng Ilirikam. 20 Are gat to, ma mirier taraiap ganam la narung maset meba man baistang o bais ula mumuru ang Karisito. Pa tuga baistang o na pialap teip ga magaulap la tale ka ameit Karisito. Muana la tale tuga okosartang ubi ang Morowa na pialap non inamaniap la lake ra okosarmeng. Karuk. Memani, iruo paga la are la akosartung luguan nakap mabuo libanap am non migana. 21 Pa tuga baistang o urio bais ula mumuru na napup teip ga magaulap la tale kan ameit Karisito are Babam ula puaru la tiesieng gare ro,

“Inamaniap la tale mepto bais ang, eba agimameng. Ga inamaniap la tale mepto ties ang, eba ameira maset.” f 

Naong Paulo meba magimaang inamaniap onim Rom

22 Tie, narung meba baistang o bais ula mumuru ang Karisito na pialap la tale maiam Iudaiap. Are ratmat ga urio ubi la obunakieng alang tung ma papot tarap, ga tale puorung meba murang migimarang. 23 Pa titot la karuk ma pialap ba meba ubirang mana, memani no ra ubi rung. Ga papaluaip ma karaip la narung maset meba tala migimarang. 24 Are ratmat ga tubiat leba tala na kantri Spen, na irie tara la tuga ka murang migimarang lake ga tonang kirat ga mimi meba tevurustang ga mimi. Eva, tubiat eba toagamilie ga mila tomiala na alang me na inamon Spen.

25 Pa eba take me na provins Masedonia ga Akaia. Memani, inamaniap la naganmeng ira Iesu na provins Masedonia ga Akaia, la mavuotmeng kakepup maiam na dalap mila mumurum meba masagameng me maun teip ga magaulap am Morowa la kagesmeng ma pagap Ierusalem. 27 Migat, dalap ma la temeba ga mirie kan la okosarmeng gare tiruo. Pa migat gat, gar onim na provins Masedonia ga Akaia la ame sinauan maun inamaniap onim Ierusalem. Muana, gar onim Israel la mumaio ga baismeng o ties ula mumuru me maun teip ga magaulap la tale onim Israel, ga urio la magiginaraieng muranap ma. Are ratmat ga gar la tale onim Israel le mepulam meba magamelie garip onim Israel ma pagap onim na uro kimanam. 28 Are ratmat ga narung meba ka ointamung urio ubi lake meba ka talam kakepup maun inamaniap onim Ierusalem. Ga tubiat na tara leba tala na Kantri Spen, eba ka tala migimarang. 29 Orit ara leba tala mi, eba daktang o laminais ula kanu ang Karisito ga eba talang miun.

30 Ekelesiap papap tuam, ira Ila Kakani buang Iesu Karisito ga aime iruo tavuk o na ang Muranama Ila Babai, mimariktung maranit meba okosarming ubi o marik ga turuo ga marikming me ai Morowa meba toagaalie. 31 Mimi le marikming meba toagaalie ga eba ualeng tobuo gare ro, Ebun tokirarameng teip ga magaulap onim Iudaia la tale naganmeng ira Iesu ga eba oguekmeng ties ang Morowa. Ga marikming me ai Morowa meba makosarang inamaniap am la maionama Ierusalem meba temeba ga mamela miruo kakepup la eba talam maun, meba murang miroping un tenubap ga orala aganuliap ula mumuru ga mimi. 33 Mariktung ira Morowa, irie muana a malina, irie leba onang ga mimir ganam. Amen.

Copyright information for `KTO